Read Lelemi Ala Alɛdi 2 28 Bible Online

Ala Alɛdi 2 28 - Lelemi bible

Ala Alɛdi 2 28

¹Ahas ɔ́ƒɔ akwa aavlanyɔ asa na bése-nwu Yudaƒuɔ ɔga. Na úlie Yerusalem mmɔ ɔ́di lɛga akwa leevu-aku. Ahas ngba bulie bútasiaku nwuna nana ati Dawid bɔdi lɛlɔ na ulu biala lɛlɔ munu munu, ɔsika Ahas útasiku Unwoti kama siin.

²Anwu lɛnɔ ɔ́bla likpidi aani Israel baga bamba kalɛ na ɔ́bla baƒiɔ na Baal udu kenye úse úte lɛlɔ.

³Ɔ́bla akpala úte ala bamba na kesii kani baalɔ banii Ben-Hinom Kɔwɛ kemmo. Na ɔni na utulo ƒui ndi ɔni na ɔsiaku kadi bamba ɔbladu kama na úti ubidi ɔnanabi ɔ́kyula ɔ́kpa. Na ɔmmɔ ɔdi lɛla lɛni muusé Katɔti lɛlɔ geen. Anwuɔsu na ɔ́bɔku-ma ɔ́lɛku Israel kɔlɔ kemmo.

⁴Ahas ɔ́kɛ ekpo ekpo ƒui ɔɔkyula oloƒui na aƒiodu ani nkya abi eli ku egyii enengudi ani mbo ɔyuli kalɔ.

⁵Ahas ku Yuda kadi bekyuli ƒui bábla likpidi báƒiɔ Unwoti na bénwini kama bákya Katɔti ɔni na bana bati kuuku bákpa. Anwuɔsu na Katɔti úti-ma ɔ́kya Aram kadi bekyuli enu kemmo na bétiku nwuna bekyuli pii bátɔlɔku aani bekyuli biƒiedi bésienku Damasko. Na lɛni kani na Israelƒuɔ lɛnɔ bésusu-ma geen na kekpo kammɔ kéƒie bana bekyuli pii bátɔlɔku.

⁶Limeyi linwi kemmo ni, Remalia ubidi Peka ɔ́du bekpone mpim eti anyɔ ku aavlanyɔ na Yuda ɔ́si ɔni na bédie Unwoti ɔni ndi bana bati Katɔti ɔsu.

⁷Na kekpo kammɔ kemmo ni, Israelni ɔnana ɔni baalɔ banii Sikri ɔ́du Yudaƒuɔ banana ɛtɛ. Na ama ndi Maaseia ɔni ndi ɔga ubidi ku Asrikam ɔkutine ɔni mɔɔnu ɔga kesii kammɔ lɛlɔ. Na ukyuli ɔtɛdi ɔmmɔ ndi Elkana ɔni muunye ɔga kenye.

⁸Na Israelƒuɔ bekpone bammɔ béƒie beleku ku banamu mpim eti ene bátɔlɔku bésienku Samaria ɔni ndi bana ɔma unengudi. Na bétiku ala bamba pii lɛnɔ bátɔlɔku ina ka bagyi ka Yudaƒuɔ bani bana lɛlɔ bekyuli.

⁹Samaria mmɔ na Oded ɔmɛni ɔ́kya na ɔdi Unwoti Katɔti kenye udiene. Uwi ɔni na Israelƒuɔ bási kekpokɔ na Yuda badubo ni, útásiaku-ma na ulu lɛlɔ na ɔ́su-ma ɔnini, “Unwoti bina bati kuuku Katɔti ɔ́ya na bɛ́di Yudaƒuɔ bekpone lɛlɔ, ɔsika úti kɔnyi ɔ́kya-ma. Nsu ɔɔɔdi lɛni ƒui na ɔdi ka bɛbla-ma ulikplu ala bitédu.

¹⁰Na si bíti Yudaƒuɔ ku Yerusalemƒuɔ bínwini bina kabla bablane ni, amii lɛnɔ bɛ́bla likpidi aani kalɛ na ama bábla báƒiɔ Unwoti.

¹¹Bɛsɔku bekyuli beƒiedi bammɔ bimene bana ɔma, ɔsika bina lɛlɔ bekyuli kani na badi. Na si bítabla ɔmɛni ni, Unwoti ɔdubo-mii kɔtu bɔni ku kɔnyi geen.”

¹²Uwi ɔni kani na benye baasu ɔmɛni ni, Israelƒuɔ batɔnkune ine badi báda bábalɛ. Na ama ndi Yohanan ubidi Asaria ku Mesilemot ubidi Berekia ku Salum ubidi Yehiskia ku Hadlai ubidi Amasa. Na ama lɛnɔ bénu kalɔ ka lɛla lɛni a Israelƒuɔ bekpone bammɔ bábla ni, lɛɛɛdia sɔsɔ.

¹³Na básu lɛnɔ banini, “Si bíti bekyuli bamɛni bíboku Samaria ni, ɔmmɔ lɛnɔ ɔdubɔsɔ unwini likpidi bamba lɛni na bɔ́bla bɔ́ƒiɔ Unwoti. Ɔsika bɔ́ɔbla ala pii bɔ́ƒiɔ Unwoti na nwuna kɔnyi kɔsia-bu lɛlɔ.”

¹⁴Anwuɔsu na bɔtɔnkune bammɔ ku bekyuli bakladi anumi ni, bekpone bammɔ bányonu beƒiene bammɔ ku ala ani ƒui na béti bátɔlɔku Yuda kalɔ lɛlɔ mmɔ.

¹⁵Anwuɔsu batɔnkune bammɔ béti adi awɔdi ku lɛgbanvuo ku adila béte bekyuli bani mɔɔyaki adi na bényimi-ma lɛlɛ ku nnɔmii. Na bani na bábla kpɛtɛ kpɛtɛ ni, bágyu-ma básia bebuo ala betine lɛlɔ na bákpanku bana ƒui básɔku bésienku bana banwani kudɔ na Yeriko kesii kani na ebo akya geen. Ɔmmɔ kama na batɔnkune bammɔ bénwini bébo Samaria.

¹⁶Amu na uwi ɔdi kama ni, Edomƒuɔ básɔ bésie bétékpo Yuda lɛma lɛni nkya katɔ kakɛ na béƒie bekyuli bátɔlɔku. Na Ƒilistiƒuɔ lɛnɔ bétékpo lɛma lɛni nkya ɔƒɛ kanukɔ na abi ammɔ kaƒɔna ku kalɔ kakwiidi kani na kewi késie kada kakɛ mmɔ kemmo lɛnɔ na uwi ɔmmɔ kani kemmo na bádi Bet-Semes ku Aiyalon ku Gederot ku Soko ku Timna ku Gimso ku akpaklɔ ani nkya amadɔ mmɔ. Ɔmmɔ kama na Ƒilistiƒuɔ badi bésie bétélie mmɔ. Ahas ɔ́kya Asiriaƒuɔ Ɔga Tiglat Pileser ɔtu na úvele-nwu ka ubebunku-nwu.

²¹Na Ahas úti etela ɔ́siku Unwoti kakpakɔ ku ɔga kesii mmɔ ku Israelƒuɔ benengu bamba kɔduli úmene-nwu, nsu Asiriaƒuɔ ɔga ɔmɛni úni ka ubunku Ahas.

²²Ala enengudi ani nálɛku Ahas mɛni ƒui kama ni, ɔ́sɔ ɔ́bla alaekpidi enengudi ani nébie etulo kudeedi ƒui ɔ́ƒiɔ Unwoti.

²³Ɔ́su lɛlɔ ɔnini, “Use-mi aani Siriaƒuɔ baƒiɔ bamɛni nébunku-ma ɔsu na bákana-mi lɛlɔ bɔdi. Anwuɔsu ɔƒɛni kalɛ si lɛ́bla akpala líte-ma ni, badubɔkana na bebunku-mi.” Ɔmmɔ ndi likpidi likplodi lɛni na Ahas ɔ́bla na lítiku-nwu lítákya kukpi kemmo ku Yuda bekyuli udu bɔyii.

²⁴Ala ani ƒui na bánwi bése kakpakɔ kammɔ kemmo ni, Ahas útiku-nya ɔ́lɛku na útáƒɛ-nya ekuku ekuku na ɔ́kalɛ kakpakɔ kammɔ únyene. Ɔmmɔ kama na úsie útátu akpabi ɔ́lɛ lilu ƒui lɛlɔ na Yerusalem úte kadi bamba baƒiɔ.

²⁵Na lɛma linengudi ku lɛma lɛkladi ƒui kemmo na Yuda kalɔ lɛlɔ ni, Ahas ɔ́tu baƒiɔ ɔ́mana kalɛ na bekyuli bataakpa. Na ala amɛni bene ƒui náya na Unwoti Katɔti ɔ́kɛ kɔnyi geen.

²⁶Na ala bamba ani ƒui na Ahas ɔ́sɔ ɔ́bla ni, bénweni-nya bákya Yudaƒuɔ ku Israelƒuɔ baga ala alɛdi ɔku kemmo.

²⁷Ahas úbekpi na báva na Yerusalem, nsu ɔɔɔdi baga kɔƒiɔtɔ kemmo. Na ɔmmɔ kama bése ubidi Hesekia lɛga na nwuna kenyekɔ.