Read Lelemi Ala Alɛdi 2 29 Bible Online

Ala Alɛdi 2 29 - Lelemi bible

Ala Alɛdi 2 29

¹Akwa aavlanyɔ-alɔ na Hesekia ɔ́ƒɔ asa na bése-nwu Yudaƒuɔ lɛga. Na úlie Yerusalem mmɔ ɔ́di lɛga akwa aavlanyɔ-yaalenwi. Na uni ndi Sekaria ubidi ɔni baalɔ Abiya.

²Hesekia únu Unwoti litemi na ɔ́siaku-nwu kama siin aani nwuna nana ati Dawid kalɛ.

³Na nwuna lɛga bɔdi lɛkwa lideedi lɛmmɔ kɔbuli kudeedi kɔni baalɔ bani Abib iye Nisan kemmo ni, Hesekia ɔ́ya na bálɛmi Katɔti kakpakɔ kammɔ kɔyakun na bɔsɔku-ku báklibi.

⁴Na ɔ́ya na bálɔ bakpane bammɔ ku lewiƒuɔ bammɔ usienku kakpakɔ kaduli kani na kewi késie ɔƒɛ katukɔ kakɛ.

⁵Mmɔ na ɔ́su-ma ɔnini, “Uwi údu ka bɔsɔku bula bati kuuku Unwoti Katɔti kakpakɔ bɔbla kedee. Na amii Lewiƒuɔ na ɔdi ka bɛka lɛlɔ bɔbla kedee ɔdi ɔmmɔ bɔbla kalɛ na biduo kakpakɔ kammɔ kemmo na bitéti ala ani ƒui muusé lɛlɔ na Katɔti ulawia-nya ulanu mmɔ bɛlɛku.

⁶Bula bati kuuku badi ɔbladu útadia bɔnu munu munu, ɔsika bátasiaku-nwu kama siin. Na ɔɔɔdi ɔmmɔ lɛti mmomu béni Katɔti kakpakɔ muedi ƒui kede kede.

⁷Bákalɛ kakpakɔ kammɔ bényene na lɛsogya lɛmmɔ ƒui líni. Na basɔ balákyula oloƒui ɔdi iye babla akpala adi bete Katɔti lɛnɔ.

⁸“Kɔnyi kpakplaa geen na Katɔti úti ɔ́kya Yuda kadi bekyuli ku Yerusalemƒuɔ. Na ala ani ƒui na ɔ́bla úti ɔ́ni-ma kɔtu adi liƒu ala geen ete bekyuli bani nánu ala amɛni kalɛkɔ. Na ɔɔɔdi

⁹bukpi kani na bula bati kuuku békpi na kekpokɔ, mmomu béƒie abu alati bula bebi ku beleku lɛnɔ bátɔlɔku.

¹⁰Anwuɔsu lɛ́lɛ ugyii geen ka bɔsɔku abu ku Israel Unwoti Katɔti ntɛ bunyimi bɔbla ɔwɔdi. Ɔƒɛni kalɛ si bɔ́bla ɔmɛni ni, nwuna kɔnyi na bula lɛlɔ kɔdubɔyɔ-nwu.

¹¹Anwuɔsu ni, banwa, bitaya na bubile uwi. Amii na Unwoti ɔ́ƒuna ka bɛbla nwuna bakpane na biti akpala bite-nwu.”

¹²Amu na uwi ɔni na Hesekia ɔ́wɔlɔ-ma bɔtɛmiku ni, Lewiƒuɔ batɔnkune bani nsia bésie mmɔ bése kabla kalɔ kɔnakunwi. Na bana anyi ndubo mɛni. Amasai ubidi Mahat ku Asaria ubidi Yoel bani nási Kohat kɔdua kemmo. Na Abdi ubidi Kis ku Yehalel ubidi Asaria ama lɛnɔ bási Merari kɔdua kemmo. Na Sima ubidi Yoa ku Yoa ubidi Eden ama lɛnɔ bási Gerson kɔdua kemmo. Na Simri ku Yeuel bási Elsaƒan kɔdua. Na Sekaria ku Matania ama bási Asaƒ kɔdua. Na Yehuel ku Simei bási Heman kɔdua. Na Semaia ku Usiel bási Yedutun kɔdua.

¹⁵Batɔnkune bamɛni bátásala Lewiƒuɔ bakladi na bana ƒui bábla lɛlɔ bɔbla sɛɛn ɔdi ɔmmɔ kalɛ na bese sɛɛn. Na ɔmmɔ kama bése kalɔ baabla kakpakɔ kammɔ lɛnɔ kedee ɔkɛnku Unwoti ɔda bubo kenye aani kalɛ na Ɔga Hesekia úbo ɔda kalɛ.

¹⁶Bakpane bammɔ béduo kakpakɔ kemmo na bátáda ala ani ƒui na muusé lɛlɔ mmɔ bédie bébewi kakpakɔ kaduli kemmo. Na ɔmmɔ kama Lewiƒuɔ bammɔ bála-nya bálɛku ɔmmɔ kemmo bétéwi kesii kani baalɔ banii Kidron Kɔwɛ kemmo.

¹⁷Bakpane ku Lewiƒuɔ bammɔ bése kabla kamɛni kalɔ na kɔbuli kudeedi limeyi lideedi lɛlɔ. Na uyolu unwi na béti bábla kakpakɔ kaduli kamɛni sɛɛn. Na uyolu unyɔdi lɛnɔ na béti bábla kakpakɔ kammɔ ɔlati lɛnɔ sɛɛn. Anwuɔsu limeyi leevu-lɛkundi lɛlɔ ni,

¹⁸bénwini bésie Ɔga Hesekia kudɔ na bátásu-nwu banini, “Ɔga Ɔbune, bɔ́wɔlɔ bula kabla na kakpakɔ kammɔ ƒui kese sɛɛn. Na Katɔti lɛkpabi lɛmmɔ ku ebui ku akyami ammɔ ƒui ku bodobodo kedee ɔmmɔ kasiakɔ ka akyami ani kemmo na beeƒí-nwu mmɔ bene ƒui ese sɛɛn.

¹⁹Ɔƒɛni ala ani ƒui na Ɔga Ahas uti ɔ́lɛku kakpakɔ kammɔ kemmo uwi ɔni na útadi nwuna litemi lɛlɔ mmɔ ni, bɔ́sɔku-nya búboku na bɔ́bla-nya sɛɛn na búti-nya búse ana kesekɔ na lɛkpabi lɛmmɔ anumi.”

²⁰Mmɔ kani na Hesekia ɔ́lɔ Yerusalemƒuɔ bakutine bammɔ ɔ́sala na bɔ́tɔlɔ bésie kakpakɔ mmɔ.

²¹Na badanku ɔmantɛ bɔkɔ maatɛ ku baƒonu bagyani maatɛ ku baƒonu bɔkɔdi maatɛ ku betukpa leevu bani na badubuti babla ekpidi lili buvele akpala na Hesekia ku nwuna kaduli bekyuli lili ku Yuda kadi bekyuli ƒui lili ku kakpakɔ kammɔ ƒui bɔbla kedee ɔsu. Anwuɔsu Hesekia ɔ́su bakpane bani ndi Aaron kaba kemmo bebi ɔnii beti bebuo bammɔ bakpa na Katɔti lɛkpabi lɛmmɔ lɛlɔ.

²²Amu na bakpane bammɔ lɛnɔ bádu ɔmantɛ bakɔ bammɔ ku baƒonu bagyani bammɔ na bákuna béwi lɛkpabi lɛmmɔ lɛlɔ.

²³Na béti bese bammɔ ama bésienku Hesekia ku bekyuli bani nébo kakpakɔ mmɔ na béti bana enu básia-ma eli.

²⁴Ɔmmɔ kama bakpane bammɔ bádu bese bammɔ na béti bana ubugya bákuna béwi lɛkpabi lɛmmɔ lɛlɔ aani ekpidi lili buvele akpala na Israelƒuɔ ƒui lili.

²⁵Amu na ɔmmɔ kama ni, Hesekia ɔ́ya na Lewiƒuɔ bammɔ bésie béténye bana kunyekɔ na bana kabla kenye na kakpakɔ kammɔ kemmo. Na úti enukpɛ agyala ku lɛbentaa ku agyala bamba ani na béti kɔbuli bábla úte-ma aani kalɛ na Unwoti úbo Ɔga Dawid ku kenye bediene bani ndi Gad ku Natan ɔda kalɛ.

²⁶Na Lewiƒuɔ báklibi lɛlɔ na benye kagyumana ka bagya agyala ani adi Ɔga Salomo adi mmɔ. Na bakpane bammɔ lɛnɔ báklibi na benye kagyumana ka bavwi kɔkpɛɛ kɔmmɔ.

²⁷Amu na uwi ɔni kani na Hesekia údie kɔnu ɔ́tina bekyuli bammɔ ka bese kalɔ ku akpala ammɔ bɔkyula na lɛkpabi lɛmmɔ lɛlɔ ni, bagyane bammɔ lɛnɔ bése kalɔ beedie bumwi lɛnu na baagyá bana agyala

²⁸na ukyuli biala ɔɔkya lili kalɔ teete Unwoti na bábu-nwu. Na ɔmmɔ lɛlɔ kani na bewi útédu ka bákyula lɛla biala báwɔlɔ.

²⁹Ɔmmɔ kama ni, Hesekia ku kasalakɔ bekyuli bammɔ ƒui bálɛ akɔnkɔ kalɔ na bákya lili kalɔ béte Unwoti.

³⁰Na Hesekia ku nwuna bakutine benengu bammɔ bébo Lewiƒuɔ bammɔ ɔda banii beteedie bumwi lɛnu lɛni na Ɔga Dawid ku Kenye Udiene Asaƒ bénweni bése mmɔ. Anwuɔsu béboku eli kalɔ na bédie bumwi lɛnɔ béte Unwoti ku lɛlɔyɔ.

³¹Amu na Hesekia ɔ́su kasalakɔ bekyuli bammɔ ɔnini, “Ka bɔ́sɔku lɛlɔ bɔ́bla ɔwɔdi búte bula Unwoti ɔsu ni, biti bina etela ku akpala biboku na biti bibagya-nwu enu.” Bekyuli bammɔ bábla lɛni na bádi muedi béti bebuo béboku ku kaƒɔ ƒaa banii badu-ma bakpa.

³²Na bebuo bammɔ bumomo bɔdi ɔmantɛ bakɔ liti ku aavlanyɔ ku baƒonu bagyani eti anyɔ ku baƒonu bakɔdi eti ene banii beti bakyula na babla akpala ani mɔɔyɔ́ Unwoti kaƒɔ.

³³Na bada ɔmantɛ bakɔ eti leevu-anyɔ ku baƒonu mpim ɛtɛ béboku banii bakyula na béti ɔmmɔ beevele Unwoti kusɛ kusɛ ka ɔsiaku-ma.

³⁴Nsu bakpane bammɔ beeemomo kalɛ na bakana bebuo bammɔ ƒui lɛku budie, ɔsika ɔɔɔdi bakpane bammɔ ƒui nákana lɛlɔ bɔbla sɛɛn ɔdi ɔmmɔ bɔbla kalɛ na babla kabla kammɔ. Nsu ka Lewiƒuɔ bammɔ ama bana ƒui bábla lɛlɔ sɛɛn ɔdi ɔmmɔ ɔsu ni, bébunku bakpane bammɔ útédu ka bédie ebuo ukplodi ɔku báwɔlɔ.

³⁵Na bebuo bani na bádu bákyula bábla akpala ammɔ kama ni, beti bana ƒui lɛmwi bábakyula kede aani unwi bɔbla akpala na béti ntɛ akpala ammɔ ƒui lɛnɔ béwi lɛkpabi lɛmmɔ lɛlɔ. Anwuɔsu kakpakɔ kammɔ kásɔ kénwini kébese aani kuuku kalɛ, na baakpá Unwoti na mmɔ.

³⁶Na Hesekia ku Yuda kadi bekyuli bammɔ bádi limeyi na lɛlɔ lɛ́yɔ-ma, ɔsika Unwoti úbunku-ma na bákana na bábla ɔmɛni kɔnakunwi.