Read Lelemi Ala Alɛdi 2 3 Bible Online

Ala Alɛdi 2 3 - Lelemi bible

Ala Alɛdi 2 3

¹Na Hebriƒuɔ kɔbuli kunyɔdi kɔni baalɔ banii Siw limeyi linyɔdi lɛlɔ ni, Salomo kabla bablane bése kalɔ ku kakpakɔ kammɔ bɔtu na Yerusalem akwa ene kama ka bése Salomo lɛga na Israel. Na bátu-nwu na Moria Kɔbi lili kesii kani na Unwoti údie lɛlɔ ɔ́tina Dawid na Yebusni ɔnana ɔni baalɔ Arauna kakpa kesii kani na úteewiile nwuna edula.

³Kakpakɔ kammɔ kemmo bɔkɔku bɔdi lɛgba liti ku aavlene na bɔbɛbɛ bɔdi lɛgba avlaatɛ na bati kuuku bammɔ ala bɔkɔku kenye.

⁴Na kakpakɔ kammɔ anumi ni, bátu lɛgbanya lɛdi bényene na ɔ́bɛbɛ ɔ́ƒɔ ɔtɔ mmɔ anumi ƒui. Na ɔ́kuku lɛgba avlaatɛ. Na bákwa nwuna awodu ani kemmo ku sika ugyiedi ntu.

⁵Salomo ɔ́ya na bánwi ligyii bákana bámana kakpakɔ kammɔ keliekɔ geen kemmo awodu lɛlɔ ƒui asa na béti sika ugyiedi ntu bákwaa-ni lɛlɔ bávi ƒui. Na bánwi ala adi bényene aani ebo udu ku kɔgba béti bákya-nwu bɔdia bámana.

⁶Na úti atabi ani náƒɔ kuye geen ɔ́kya ɔtɔ ɔmmɔ bɔdia na úti sika ugyiedi ɔni ɔ́kada ɔ́siku kalɔ kani baalɔ banii Parvaim

⁷ɔ́klibi ɔtɔ ɔmmɔ kemmo lɛta lɛni nda lɛsa na eli ku kɔyakun ligyii ku lɛkpunu lɛmmɔ ƒui ku awodu lɛlɔ. Na ɔ́ya na ala banwine bánwi bebweyi badi udu ku avwi bákya awodu ammɔ kemmo.

⁸Na kesii kani nse kedee ntulo ƒui na ɔ́ƒɔ kakpakɔ kammɔ lɛbɛbɛ ƒui bɔkɔku bɔdi lɛgba avlaatɛ ɔƒɛnyi biala. Na béti sika ugyiedi ɔni unu mabla aani anta aƒo eti aku unu bákwaa awodu ammɔ ƒui bámana.

⁹Na kɔbuɛlɛ kɔmmɔ eli ni, anta akɔkɔ leevu sika ugyiedi unu na béti béwi-ku eli. Na lɛtɔ wɛlɛwɛlɛ lɛni kemmo na beesé ala lɛnɔ ni, bákwaa awodu ammɔ ƒui ku sika ugyiedi ntu.

¹⁰Salomo ɔ́ya na bátu bebweyi ku avwi kavɔ inyɔ badi bényene kesii kani na nse kedee ntulo ƒui mmɔ, na ɔ́ya na béti sika ugyiedi bákwaa-ma lɛlɔ ƒui.

¹¹Bebweyi inyɔ bamɛni ɔdi biala ubo avwi anyɔ. Na ɔ́si kɔvwi kunwi kenye úsie kɔvwi kunyɔdi kenye ubo lɛgba leevu-ɛlɔ bɔbɛbɛ. Na ɔ́ya na bényene-ma bámanaku lɛlɔ na kesii kani nse kedee ntulo ƒui mmɔ na bana anumi aatina kayakun. Na bágyingya bana avwi benye na avwi ammɔ áƒɔ ɔtɔ lɛgba avlaatɛ ɔmmɔ lɛbɛbɛ lɛmmɔ ƒui.

¹⁴Kakpakɔ bule kɔdi ni, kugyii kama evuo na béti bábla kɔdi kɔmmɔ na béti unwo ɔni náƒɔ kuye geen na bákya-nwu evogyii lidu lidu bédi-ku na báta bebuo ku avwi lidu bákya-ku kemmo béti bákya-ku bɔdia.

¹⁵Bátu akpa anyɔ adi bényene kayakun na ɔdi biala ɔ́kuku lɛgba liti ku inyɔ na kɔbwa kɔdi lɛnɔ kubi-ku eli na aku lɛnɔ kɔ́kuku lɛgba maatɛ ku kakɛ.

¹⁶Na akpa amɛni eli ƒui ni, bábla ala adi báda aani kɔgba béti bákya akpa ammɔ bɔdia na bánwi egyiibi adi udu aani eti anyɔ lɛnɔ básia-nya lɛlɔ.

¹⁷Salomo ɔ́ya na lɛkpa linwi linye kada kakɛ na baalɔ-ni banii Yakin. Na ɔ́ya na linwi linye katɔ kakɛ na baalɔ-ni banii Boas.