Read Lelemi Ala Alɛdi 2 30 Bible Online

Ala Alɛdi 2 30 - Lelemi bible

Ala Alɛdi 2 30

¹Hesekia ɔ́sia Israel ku Yuda kadi bekyuli kenye ka bebo Unwoti Katɔti kakpakɔ na Yerusalem na badi Kukpi Lili Bɔvia Limeyi. Na ɔ́sia Eƒraim ku Manase kalɛkɛ badi lɛnɔ ƒui kenye ka bebo.

²Na Ɔga ku nwuna bakutine benengu ku kasalakɔ bekyuli bammɔ na Yerusalem bálɛ ugyii ka badi Kukpi Likpi Lili Bɔvia Limeyi lɛmmɔ na kɔbuli kunyɔdi kemmo.

³Bátakana limeyi lɛmɛni bɔdi na kɔbuli kedeedi kemmo aani kalɛ na use use, ɔsika bakpane pii bátakana lɛlɔ bɔbla sɛɛn ɔdi ɔmmɔ bɔbla na baklibi lɛlɔ bete limeyi lɛmmɔ bɔdi. Na bekyuli pii lɛnɔ bátakana bubo bubasala na Yerusalem mmɔ.

⁴Na Ɔga ku kasalakɔ bekyuli bammɔ ƒui bánu ka kasusu kammɔ kadia.

⁵Anwuɔsu básia Israel kalɔ bekyuli bammɔ ƒui kenye ɔ́si Beerseba útédu Dan na bálɔ-ma ka bebo Yerusalem mmɔ na badi Kukpi Lili Bɔvia Limeyi bete Unwoti Israel Katɔti. Na benengu bammɔ alati baatina ka ɔ́si kuuku ƒui ni, bátasiaku bekyuli lisu lɛmɛni udu ka bebo limeyi lɛmɛni kadikɔ lɛni kudii.

⁶Amu na Hesekia batu bani na ɔ́tala mmɔ báyu ulu linyesia ɔku ɔmɛni bésienku Israel kesii biala. Na ɔku ɔmmɔ kenye kaasu kanini, “Israel kadi bekyuli, ka kuli kɔ́dia-bu na bɔ́lɛ Asiria baga enu kemmo na kekpo kéteƒie-bu ƒui ni, bɛya na ɔƒɛni anwu bunwini bubo Unwoti Katɔti ɔni na bula bati kuuku Abraham ku Isak ku Yakob bákpa kudɔ. Na si bɛ́bla ɔmɛni ni, ɔdubɔda kɔnyi buti bɔkya-bu ɔya.

⁷Bitasiaku bina bati kuuku ku Israelƒuɔ lɛlɔ bekyuli bani na bakya kalɔ kammɔ kɔtɔ kakɛ mmɔ. Bátasiaku Unwoti kama siin, anwuɔsu na ɔ́ni-ma kɔtu geen.

⁸Na bitabla atuɔkplu aani bina bati kuuku bammɔ. Bɛlɛ ugyii geen ɔƒɛni ka bɛdubɔdi Unwoti bula Katɔti litemi lɛlɔ! Bibo Yerusalem na bibadi limeyi na bɛkpa-nwu na nwuna kakpakɔ kani ndubɔdi nwuna kadi uwi ƒui na ɔdubɔda kɔnyi buti bɔkya-bu ɔya.

⁹“Na bekisine bani néƒie bina lɛlɔ bekyuli badi bátɔlɔku ni, badubɔya na basɔ benwini bebo ɔma. Unwoti Katɔti ubo lɛƒɔndia na ɔɔnu kɔnyana. Na si bínwini bíbo-nwu kudɔ ni, ɔsɔ ɔɔɔdubo nwuna kama bunwini bɔkya-mii kudii.”

¹⁰Na sɔsɔ ni, batu bammɔ lɛnɔ bésie ɔma biala kemmo na Eƒraim kalɛkɛ ku Manase kalɛkɛ na ɔƒɛ kanukɔ kakɛ. Na béti bákɔ bésie katɔ ƒui bétédu Sebulon kalɛkɛ kemmo, nsu bɔma kani ukyuli biala ɔ́ma-ma na bédumi-ma.

¹¹Nkyuli ɛlɛɛ badi kani nási Aser ku Manase kakɛ kani nésie ɔƒɛ kanukɔ ku Sebulon adua kemmo béboku lɛlɔ kalɔ na bébo Yerusalem.

¹²Na Katɔti ɔlati ɔ́ya na lɛlɔ kemmo kaatɔ́ ɔdi biala na Yuda ƒui ka babla lɛla lɛni na Hesekia ku nwuna benengu básu mmɔ.

¹³Na kɔbuli kunyɔdi kemmo ni, bekyuli lisu bonwu lɛdi líbo líbasala na Yerusalem ka badi Bodobodo Ɔni Néteƒu Limeyi.

¹⁴Na akpabi ani na bátu bálɛ Yerusalem béte kadi bamba baƒiɔ biala ku oloƒui kɔkyulakɔ ƒui ni, bágyu ala ammɔ bene ƒui bétébo béwi Kidron Kɔwɛ kemmo.

¹⁵Amu na kɔbuli kunyɔdi kɔmmɔ kuna limeyi leevu-linedi lɛlɔ ni, Lewiƒuɔ bammɔ bése kalɔ ku baƒonu bakɔdi bɔdu úte Kukpi Lili Bɔvia Limeyi Bɔdi, ɔsika bekyuli bani nébo babakpa mmɔ pii beeese sɛɛn na ɔdi kenye na bétete-ma kuƒi ka badu bebuo bammɔ ama alati. Na lɛnɔ ni, bakpane ku Lewiƒuɔ badi lɛnɔ bátabla lɛlɔ sɛɛn bétese na ɔdi ɔmmɔ kenye na kɔƒa geen kuukpó-ma. Ɔmmɔ ɔsu usi na bakɛ na bábla ɔmmɔ kɔnakunwi na béduo kakpakɔ na bátákyula akpala ani mɔɔyɔ́ Unwoti kaƒɔ béte-nwu. Ɔmmɔ kama bakpane bammɔ ku Lewiƒuɔ bammɔ bésie béténye bana kunyekɔ aani kalɛ na Katɔti kabla ɔblane Mose ɔda bubo bɔmmɔ bɔ́tina.

¹⁸Bekyuli bani na bási Eƒraim ku Manase ɔƒɛ kanukɔ kakɛ ku Isakar ku Sebulon bébo mmɔ akɔ pii bátakana lɛlɔ bɔbla sɛɛn ɔdi ɔmmɔ kemmo bɔvi, nsu bédie Katɔti ɔda bubo bɔmmɔ atu na ama lɛnɔ bádi Kukpi Lili Bɔvia adila ammɔ. Hesekia ɔ́nu ɔmmɔ ɔ́ti, anwuɔsu ɔ́kpali Katɔti na úvele-nwu ɔnini, “Unwoti Katɔti bekyuli bamɛni beeese sɛɛn na lɛlɔ bɔbla sɛɛn ɔdi ɔmmɔ kenye, nsu ama lɛnɔ benye baakya lili kalɔ teete-ɔ aani kalɛ na bana bati kuuku bábla, anwuɔsu muuvele-ɔ nu-ma kɔnyana na eti akyiɛ-ma.”

²⁰Na Unwoti lɛnɔ únu kalɛ na Hesekia ɔ́kpali-nwu úvele mmɔ na úti bana bɔƒiɔ bɔmmɔ ɔ́kyiɛ-ma sɔsɔ na útani-ma kɔtu.

²¹Lɛlɔ lɛ́yɔ Israelƒuɔ bani nkya Yerusalem mmɔ geen na bádi Bodobodo Ɔni Néteƒu Limeyi emeyi maatɛ sɔɔn. Na Lewiƒuɔ ku bakpane bammɔ bédie lɛnu bémwi Unwoti limeyi ndi limeyi na baagyá bana agyala ammɔ ƒui.

²²Hesekia ɔ́gya Lewiƒuɔ bammɔ enu na kabla kabuni kani na bábla ɔsu ku kalɛ na bátɔnku lɛkpa na emeyi ammɔ bɔdi kemmo. Bekyuli bani nébo mmɔ bábakpa lɛnɔ bádi limeyi lɛmmɔ emeyi maatɛ sɔɔn na béteeboku etela ani na béti bákpa na baadi adila kedee na baagyá bana bati kuuku Unwoti Katɔti enu.

²³Limeyi bɔdi bɔmɛni bɔ́da ukyuli biala ebiti geen ɔni na bana ƒui bénu kalɔ besie anumi badi-ni emeyi maatɛ bamba bebu.

²⁴Ɔmmɔ ɔsu ni, Hesekia úte bekyuli bammɔ ɔmantɛ bakɔ apim unwi ku baƒonu mpim maatɛ ka beti bakpa na badi-nya lɛnɔ aani adila kedee. Na nwuna benengu ama béte ɔmantɛ bakɔ apim unwi ku baƒonu mpim leevu. Bakpane pii lɛnɔ bénu kalɔ ka babla lɛlɔ bɔbla sɛɛn ɔdi ɔmmɔ.

²⁵Lɛlɔ lɛ́yɔ ukyuli biala geen ku bani na bási Yuda ku Israel ku bakpane ku Lewiƒuɔ bammɔ ƒui ku baƒɔ bani na bakya Yuda ku Israel kalɔ lɛlɔ ƒui.

²⁶Na ka ɔ́si Dawid ubidi Ɔga Salomo uwi ƒui ni, limeyi lɛni ndi limeyi linengudi ƒui lɛmɛni udu, bátadi-ni kudii.

²⁷Bakpane ku Lewiƒuɔ bammɔ bévele Katɔti ka ɔya na nwuna kusɛ kusɛ ɔsiaku bekyuli bammɔ na sɔsɔ ni, únu-ma buvele ɔ́siku nwuna keliekɔ kedee kammɔ na katɔ ƒui.