Read Lelemi Ala Alɛdi 2 32 Bible Online

Ala Alɛdi 2 32 - Lelemi bible

Ala Alɛdi 2 32

¹Ka Ɔga Hesekia ɔ́di Unwoti litemi lɛlɔ na ɔ́bla ala amɛni ƒui ɔ́wɔlɔ lɛni ni, Asiriaƒuɔ Ɔga Sanaherib ɔ́bla kasusu ka usie utékpoku Yuda. Na útékpo lɛma linengudi lɛni na bátu awodu bonwu bámana mmɔ na ɔ́kali ka ɔdubɔkana-ni bɔbwɛ na uƒie-ma ɔtɔlɔku.

²Uwi ɔni kemmo na Ɔga Hesekia ɔ́ti ka kasusu kamɛni udu na Sanaherib uuti na Yerusalem lɛlɔ ni,

³anwu ku nwuna benengu bábla kasusu ka abiɔ ku ntu bɔni ƒui na bɔkya keyi na awodu ammɔ kama ni, beekúlo-mu kalɛ na si Asiriaƒuɔ bébo mmɔ ni, na balákɛ ntu bɔdi baláni.

⁵Amu na Hesekia ɔ́ya na batune badi bátásɔku ɔma ɔmmɔ kowodu kesii kani nábwɛ mmɔ báklibi. Na ɔ́ya na bátu kɔgyumanakɔ, na bátu kowodu bamba kɔni nábwɛ mmɔ kama. Na awodu kugyikpo kɔni na bátu bédi Dawid ɔma unengudi ɔmmɔ awodu ani nésie ɔƒɛ katukɔ kakɛ lɛnɔ ni, básɔ báklibi-nya bɔtu kaduɛ. Ɔmmɔ kama ɔ́ya na bábla ekpola ku kekpo kayi agyumanala pii.

⁶Na ɔ́ƒuna bekpone batɔnkune bani ndubɔtɔnku bekpone esu esu ammɔ. Amu na ɔ́lɔ bekpone esu esu ammɔ ɔ́sala kanwaadikɔ na ɔma unengudi ɔmmɔ anumi na ɔ́su-ma ɔnini,

⁷“Bise kayi na bɛƒɔ lɛlɔ bɛdi! Naaanu lɛla lɛni ɔsu na ɔlɛka bɛyia Ɔga Sanaherib ku nwuna bekpone kpakplaa bammɔ. Abu bubo ɔyikun butulo-nwu ƒui.

⁸Ɔsika Unwoti bula Katɔti muukpó bula kekpo teete-bu. Na Asiriaƒuɔ ama ni, bekyuli keeke ɔyikun lɛlɔ na bana anu asia.” Ka Yudaƒuɔ bekpone bammɔ bénu etemila amɛni ni, ákya-ma kayi ogya geen.

⁹Amu na uwi ɔni na Ɔga Sanaherib ku nwuna bekpone bébo bábada keliekɔ na bakya Lakis ɔma ni, ɔ́kya Ɔga Hesekia ku Yerusalemƒuɔ ɔtu ɔdi ɔnini,

¹⁰“Ami Siriaƒuɔ Ɔga Sanaherib mɔɔyá-a na ati ka lɛ́ɛka lɛ́mana Yerusalem na muuye-ɔ si aakali ka adubɔkana-mi kekpo kenye bunye na akɛ ngba?

¹¹Amii Yerusalemƒuɔ bina Ɔga Hesekia ɔɔsu-mii ka bina Unwoti Katɔti ɔdubo bukpo bute-mii na ɔƒɔ-mii ngba, nsu bɔtɔlɔ na ɔda-mii na bɛdubo mmɔ bɔkya na kɔka ku ntukwɛ ɔdu-mii.

¹²Ɔɔɔdi Hesekia ɔlati ntɔnku-mii na úbo baƒiɔ akpabi ƒui ku ani na akya abi eli ƒui ɔ́bwɛ na ɔ́su amii Yuda ku Yerusalemƒuɔ ɔnini, ‘Lɛkpabi linwi pɛ lɛlɔ na ɔdi ka bɛkpa na bɛkyula oloƒui’?

¹³“Bínu lɛla lɛni na ami ku mina bati kuuku bɔ́bla kadi bamba bekyuli ƒui. Bɔkana na bana baƒiɔ badi bákana kadi kadi bekyuli bɔƒɔ?

¹⁴Mɔɔsu-mii ka baƒiɔ badi bátakana bana bekyuli ngba bɔƒɔ na bakɛ bɔnwuna na Siriaƒuɔ baga ɔdi enu kemmo. Na bɔkali geen na amii bɛda bɛnii bina Katɔti anwu ɔdubɔkana lɛla lɛdi bɔbla butulo baƒiɔ bamba bammɔ?

¹⁵Bitaya na Hesekia use-mii lisusu lɛmmɔ udu! Baƒiɔ badi bátakana bunye bɔsiaku Asiria kudii na baƒɔ bana kadi bekyuli badi. Anwuɔsu bɛƒɔ-mi bɛdi ka bina Katɔti lɛnɔ ɔɔɔdubo-mii bɔkana bɔƒɔ!”

¹⁶Asiriaƒuɔ benengu bammɔ bátɛmi enyekpi na bédumi Unwoti Katɔti ku nwuna kabla ɔblane Ɔga Hesekia.

¹⁷Na ɔku ɔni na Sanaherib únweni kemmo ni, ɔ́kya Unwoti lɛlɔ lɛma na ɔ́su ɔnini, “Kadi bamba baƒiɔ bátakana bana kadi bekyuli bɔƒɔ bɔsiku Asiriaƒuɔ enu kemmo na Hesekia Katɔti ɔni na ɔɔkpá lɛnɔ ɔɔɔdubo lɛla lɛdi bɔkana bɔbla.”

¹⁸Na ala amɛni ƒui ni, Yudaƒuɔ lɛdi kemmo na Asiria benengu bammɔ benye baasu-nya kalɛ na si Yerusalemƒuɔ bani na bakya ɔma unengudi ɔmmɔ kemmo na awodu ammɔ kemmo bénu ni, na bayia na bete lili.

¹⁹Na geen ni, bɔtɛmi kani na benengu bammɔ benye baatɛmi Unwoti Katɔti lɛlɔ kɔtɛ aani baƒiɔ keeke badi iye ala ani na bekyuli keeke nábla-ma bése lɛlɔ.

²⁰Na uwi ɔmmɔ kemmo ni, Hesekia ku Amos ubidi Kenye Udiene Yesaia bévele Unwoti ka ubunku-ma.

²¹Na Unwoti úmene nwuna ɔtu ɔdi na úbo na úbadu ukpone biala ku bana kekpo batɔnkune ƒui na Asiriaƒuɔ keliekɔ kani na báda na belie mmɔ kemmo. Amu na Sanaherib ɔ́sɔ únwini úsie Asiria ku kɔƒa geen. Na ɔmmɔ kama limeyi lɛdi ni, úsie nwuna koƒiodu na ɔƒiɔtɔ kemmo mmɔ na anwu ɔlati bebi bananabi bádu-nwu.

²²Unwoti údie Hesekia ku Yerusalemƒuɔ ƒui na Sanaherib enu ku bekisine bamba enu kemmo.

²³Bekyuli béti etela béboku Unwoti na Yerusalem na béboku Hesekia ala ani na áƒɔ kuye geen. Na ka ɔ́si limeyi lɛmmɔ lɛlɔ ni, kadi bamba bekyuli baabu Hesekia geen.

²⁴Uwi ɔmmɔ kemmo kani na ɔlɛ ɔdi úbebo Hesekia ɔni na ɔ́yu-nwu ɔkplu na ɔɔyɔ́ ukpi muedi. Mmɔ na ɔ́kpali Unwoti úvele-nwu na anwu lɛnɔ údie lɛla lɛdi ɔ́tina-nwu ka ɔlɛ ɔmmɔ ɔdubɔba-nwu.

²⁵Nsu Hesekia úbo ɔɔtalaku lɛlɔ katɔ geen ɔni na ɔ́yiƒala Unwoti enu muedi bɔgya. Na ɔmɛni ɔdi lɛla lɛni néƒi Unwoti livo, anwuɔsu ɔ́ni Hesekia ku Yuda ku Yerusalemƒuɔ ƒui kɔtu.

²⁶Na kama ƒui ni, bekyuli bamɛni bánu ka báƒiɔ na békpi kɔtɔ na bévele Unwoti banii uti ɔkyiɛ-ma. Anwuɔsu Unwoti ɔ́sɔ útani-ma kɔtu uwi ɔni ƒui na Hesekia ɔ́sɔ úlie utaadi lɛga mmɔ.

²⁷Hesekia úbenwini ɔlakɛne geen na ukyuli biala ɔɔbu-nwu. Ɔ́tu egulabi kesiekɔ kesii kani na uusé nwuna sika ɔƒualadi ku ugyiedi ku atabi bamba ani na áƒɔ kuye ku kutu akyala ku kekpo kayi agyumanala ku ala lidu bamba ani lɛnɔ náƒɔ kuye geen.

²⁸Ɔ́tu kesii bamba na mmɔ na uusé nwuna edula aani kamu ku antabi udu ku nnɔ. Na ɔ́tu bebuo lidu lidu kɔkyakɔ lɛnɔ, ɔsika Unwoti úte-nwu lɛkɛ geen.

²⁹Katɔti úse ɔ́ya na kɔnu kemmo kadia Hesekia geen, anwuɔsu ɔ́sɔ úye bese ku baƒonu pii úbu ku ɔmantɛ bɔkɔ lɛnɔ. Na ɔ́da akpakɔlɔ pii ute-ma.

³⁰Na údie ubu ɔni kemmo na beeti ntu taasiaku ɔ́si Gihon libiɔ útéduoku Yerusalem ɔma unengudi ɔmmɔ kemmo. Na sɔsɔ ni, ala ani ƒui na Hesekia ɔ́bla ni, álɛ kɔsia na átɛ geen.

³¹Na uwi ɔni na Babilonƒuɔ batɔnkune bátala batu badi banii betéye Hesekia na ɔ́su-ma ala adi ɔsiku akɔla budie taatina ani nálɛ na nwuna kalɔ kemmo mmɔ ni, Katɔti únye ɔ́nu Hesekia na anwu ɔlati udie kenye na anwu ɔlati kasusu kenye na ɔnu si ɔmu ɔsiaku-nwu kama siin.

³²Lɛla bamba biala na Hesekia ɔ́sɔ ɔ́bla uwi ɔni na ɔɔdi lɛga mmɔ ku kalɛ na ɔ́siaku Unwoti kama siin ni, bénweni-ni bákya Kenye Udiene Yesaia ala alɛdi ɔku kemmo.

³³Uwi ɔni na Hesekia úkpi ni, báva-nwu na kesii kani na bédie bése sɛsɛɛ ka bataava baga bani lɛlɔ mbo ɔbu geen. Na ukyuli biala na Yuda ku Yerusalem bábu-nwu. Ɔmmɔ kama na bébese ubidi Manase Yudaƒuɔ Ɔga.