Read Lelemi Ala Alɛdi 2 33 Bible Online

Ala Alɛdi 2 33 - Lelemi bible

Ala Alɛdi 2 33

¹Akwa leevu-anyɔ na Manase ɔ́ƒɔ asa na bése-nwu lɛga na Yuda. Na úlie Yerusalem mmɔ ɔ́di lɛga akwa liti ku ɛlɔ.

²Manase útenu Unwoti litemi mmomu ɔsiaku kadi bamba bekyuli bani na ɔ́bɔku ɔ́lɛku bana kɔlɔ kemmo na Israelƒuɔ anumi mmɔ ɔdi ɔni muusé Unwoti lɛlɔ mmɔ kama.

³Ɔ́sɔku kadi bamba bekyuli bammɔ aƒiodu ani na ɔti Hesekia ɔ́bwɛ mmɔ ɔ́tu. Na ɔ́tu lɛkpabi úte Baal baƒiɔ na ɔ́sɔku Asera baƒiɔ beledi lɛƒiɔgyii ɔ́lɛ. Na ɔsiaku ayabi kama ɔɔkpá-nya.

⁴Na kakpakɔ geen kemmo muedi kesii kani na nka Unwoti lɛti kani na ɔlɛka bakpa ni, Manase ɔ́tu kadi bamba baƒiɔ akpabi ɔ́lɛ ku

⁵akpabi bamba úse ka bataakpa ayabi lɛnɔ. Na ɔ́ya na bálɛ akpabi amɛni na Unwoti kakpakɔ kɔduli akpa anyɔ ammɔ kemmo.

⁶Ɔ́kyula nwuna bebi bananabi ɔ́kpa na Ben Hinom Kɔwɛ kemmo. Na uubó like na ɔɔbla evo ala na ɔɔkpali bekpine ku ayu bamba na ɔ́bla ekpidi bonwu bonwu lidu lidu na Unwoti anumi na ɔ́ya na Unwoti úti kɔnyi geen.

⁷Manase ɔ́nwi atabi baƒiɔ badi na úti útálɛ Unwoti kakpakɔ. Mmɔ na Unwoti ɔ́su Dawid ku ubidi Salomo ɔnini, “Kakpakɔ kamɛni kemmo ku Yerusalem ɔma ɔni na lɛ́ƒuna na Israel bekyuli ƒui akɔ ni, mmɔ na ndubɔsia mina lɛnyi ute uwi ƒui.

⁸Si mina bekyuli badubɔsia anumi na badi ɔda bubo bɔni na mina kabla ɔblane Mose úte-ma ni, nsɔ lɛɛɛdubo-ma bɔbɔku bɔlɛku kalɔ kani na líti líte bana bati kuuku ka beti benwini bana ɔdi kemmo kudii.

⁹Nsu Yuda ku Yerusalem bekyuli ƒui béni na bénu Manase litemi mmomu na bábla alaekpidi enengudi ani na etulo ani na kadi bamba bekyuli bani na lɛ́bɔku lɛ́lɛku-ma anumi muedi bábla.”

¹⁰Unwoti ɔ́dɔnku Manase ku bekyuli bammɔ ƒui kɔlɛ kɔlɛ, nsu béni.

¹¹Anwuɔsu na ɔ́ya na Asiria bekpone benengu bébekpo Yuda na béƒie Manase na béti lɛbuala lɛdi bákya-nwu enwu na bébo-nwu kɔgba na béti-nwu bésienku Babilon.

¹²Uwi ɔni na kekpo kéƒie Manase na úusie ɔkya mmɔ ni, úvele Unwoti Katɔti ɔnii uti nwuna ekpidi ɔkyiɛ-nwu na ubunku-nwu.

¹³Unwoti únu-nwu buvele na ɔ́nu kalɛ na nwuna ekpidi éduo-nwu. Anwuɔsu ɔ́ya na ɔ́sɔ únwini úsie Yerusalem na ɔ́sɔ úsie ɔɔdi lɛga. Na ɔ́si uwi ɔmmɔ úsela ni, Manase ɔ́nu ɔ́ti ka Unwoti ndi Katɔti sɔsɔ.

¹⁴Ɔmmɔ kama ni, Manase ɔ́sɔku Yerusalem kowodu kɔmadi kɔni nésie ɔƒɛ katukɔ kakɛ ɔ́tu na ɔ́ya na kɔ́kuku kúbu. Kowodu kakɛ kamɛni kási kesii kani baalɔ banii Gihon Kɔwɛ na ɔkɛ mmɔ na ɔ́kɔ úsie kesii kani baalɔ banii Kabɛ Ɔban kenye. Na ɔ́ka ɔ́mana ɔma kakɛ kani na baalɔ Oƒel Kɔbi. Na lɛma linengudi lɛni na bátu awodu bámana na Yuda ƒui ni, ɔ́ya na bekpone benengu baagyumana-ni.

¹⁵Amu na kadi bamba baƒiɔ ku baƒiɔ lɛtabi lɛni na ɔ́tu únyene Katɔti kakpakɔ mmɔ ni, ɔ́ya na báda-nya ƒui bágyu bédie mmɔ. Na akpabi ammɔ ƒui ni, básala-nya na bálɛku-nya bétéwiakun ɔma ɔmmɔ kama.

¹⁶Na ɔ́sɔku Unwoti lɛkpabi ɔ́klibi na bábla unwi bɔbla akpala nwuna lɛlɔ na bágya Unwoti enu na bévele-nwu kusɛ kusɛ. Na úbo bani ƒui na bakya Yuda mmɔ ɔda ka ɔdi biala utaakpa Israel Unwoti Katɔti.

¹⁷Bekyuli bammɔ bénu lɛla lɛni na Manase ɔ́su-ma, nsu ama alati bana aƒiodu na baakpá Unwoti.

¹⁸Na lɛla biala na Manase ɔ́sɔ ɔ́bla uwi ɔni na ɔdi ɔga ku kalɛ na útaakpali Katɔti teevele ku kalɛ na kenye bediene bálɛ-nwu bávinku ƒui ni, bénweni bákya Israel ala alɛdi ɔku kemmo.

¹⁹Kenye udiene Hosai únweni ala pii ɔ́siku Manase lɛlɔ úbunku kalɛ na útaakpali Katɔti ku kalɛ na Katɔti únu-nwu bɔkpali. Nsu ala ekpidi ani na ɔ́bla lɛnɔ asa na ɔdubɔsɔ unwini kayi ni, únweni ana ƒui. Na únweni ala ɔ́siku kesii kani bene na ɔ́tu kadi bamba baƒiɔ ku aƒiodu ɔ́lɛ ku kesii kani na ɔ́ya na bátaakpa Asera baƒiɔ beledi bammɔ.

²⁰Manase úbekpi na báva-nwu na baga kaduli kevomadɔ mmɔ na ubidi Amon úbenwini Ɔga.

²¹Akwa aavlanyɔ-inyɔ na Amon ɔ́ƒɔ asa na úbenwini ɔga na Yuda. Na Yerusalem mmɔ na úlie ɔ́di lɛga akwa anyɔ.

²²Amon útenu Unwoti litemi kalɛ kani na ɔti Manase ɔ́bla na ɔ́kpa baƒiɔ bani na ɔti ɔ́tu.

²³Manase únwini kayi úbo Unwoti kudɔ, nsu ubidi Amon anwu úni na útabla ɔmɛni mmomu ekpidi enengudi na ɔ́bla ɔ́sia kama útulo ɔti ƒui.

²⁴Ɔmmɔ ɔsu Amon alati benengu badi bényimi-nwu lɛlɔ na bádu-nwu na baga kesii mmɔ kani.

²⁵Nsu Yudaƒuɔ lɛnɔ bádu Amon badune bammɔ na béti ubidi Yosia bése lɛga.