Read Lelemi Ala Alɛdi 2 34 Bible Online

Ala Alɛdi 2 34 - Lelemi bible

Ala Alɛdi 2 34

¹Akwa maane na Yosia ɔ́ƒɔ asa na úbenwini Yudaƒuɔ ɔga. Na úlie Yerusalem ɔ́di lɛga akwa avlaatɛ-unwi.

²Na Yosia ɔ́bla lɛla lɛni mɔɔƒɔ́ Unwoti anu. Na ɔ́siaku ɔti kuuku Ɔga Dawid ɔbladu kama siin. Na ɔ́di Katɔti ɔda bubo ƒui lɛlɔ.

³Yosia úse kalɔ ku Katɔti bɔkpa uwi ɔni kani na ɔ́ƒɔ akwa leevu-aku aani nwuna nana Dawid kalɛ. Na akwa ene kama ni, ɔ́lɛ ugyii ka ɔ́yila kadi bamba baƒiɔ ku aƒiodu ani ƒui na akya Yuda ku Yerusalem ku lɛƒiɔgyii lɛni na bálɛ béte Asera baƒiɔ beledi ka bataakpa.

⁴Na anwu ɔlati unye ɔɔnu asa na beebó Baal akpabi ammɔ ku abi ani lɛlɔ na baakyula oloƒui mmɔ taabwɛ ku Asera lɛƒiɔgyii ku baƒiɔ lidu lɛni ƒui na bátu mmɔ. Na béti ala abwɛdi ammɔ bégyingya béwi bekyuli bani nákpa baƒiɔ bammɔ kɔƒiɔtɔ lɛlɔ.

⁵Ɔmmɔ kama Yosia ɔ́ya na bákyula babwɛlɛ bammɔ ekubi na bana akpabi ammɔ lɛlɔ. Na ɔmmɔ ɔɔtina ka akpabi ammɔ eesé lɛlɔ na ásɔ átamanku ka bakpa baƒiɔ badi na ana lɛlɔ. Ulu ɔmmɔ lɛlɔ na Yosia ɔ́sia na ɔ́da lɛƒiɔkpa údie Yuda ku Yerusalem.

⁶Na lɛni kani na ɔ́bla na lɛma libliidi kemmo ƒui lɛnɔ na Manase ku Eƒraim ku Simon kɔlɛkɛ útédu Neƒtali ɔmii ku amadɔ mmɔ ƒui.

⁷Na kesii biala na Israel lɛga kadikɔ kani na katɔ kakɛ ni, lɛni kani na Yosia ɔ́bwɛ baƒiɔ bammɔ ku ana akpabi ƒui ku Asera lɛƒiɔgyii lɛmmɔ ku oloƒui kɔkyulakɔ ƒui kpɛtɛ kpɛtɛ únwini ɔtumu. Ɔmmɔ kama ni, Yosia ɔ́sɔ únwini úsie Yerusalem.

⁸Na lɛkwa leevu-maanedi ka Yosia ɔɔdi lɛga na ɔɔwia ka ɔklibi kalɔ kammɔ na ɔbla Katɔti kakpakɔ kammɔ kedee ni, ɔ́tala nwuna benengu ɛtɛ badi ka batásɔku Katɔti kakpakɔ kammɔ baklibi. Na ama ndi Asalia ubidi Saƒan ku Yerusalem aban ɔgadine unengu Maaseia ku Yoahas ubidi Yoas bani mɔɔda aban ala alɛdi ɔku mmɔ.

⁹Na nkyuli ɛtɛ bamɛni bésie ɔkpane unengudi Hilkia kudɔ na béti egulabi ani na Lewiƒuɔ bagyumanane báƒɔ básiku bekyuli bani nkya Manase ɔƒɛ katukɔ kakɛ ku Eƒraim kalɛkɛ ku Israel kakɛ kakladi ƒui kudɔ ku bani na beli Yuda ku Benyamin ku Yerusalem lɛnɔ béboku.

¹⁰Na béti egulabi ammɔ béte bekyuli bani mɔɔnu kabla kammɔ lɛlɔ na béti adi báƒɔ kabla bablane kayu.

¹¹Na béti ɔkladi béte banwine ku batune na béti béye atabi ku ligyii lɛni na baawia na beti baklibi lɛtɔ bamba lɛni na Yuda baga bani néelie bábavi bátakana bɔklibi.

¹²Kabla bablane bammɔ bádi bana litemi lɛlɔ siin na bana lɛlɔ banune ndi Yahat ku Obadia ɔni nási Lewiƒuɔ kɔdua kɔni ndi Merari ku Sekaria ku Mesulam bani nási Lewiƒuɔ kɔdua kɔni baalɔ banii Kohat kemmo. Na Lewiƒuɔ bamba bani na bagyi lɛnu budie kaduɛ ni,

¹³ama muuti atula teesienku kabla bablane bammɔ na baanu kabla bablane bammɔ lɛlɔ. Na Lewiƒuɔ bamba benye baagyumana kakpakɔ kammɔ bámana.

¹⁴Ɔƒɛni uwi ɔni na beeti egulabi ammɔ teete kabla lɛlɔ banune bammɔ ni, Hilkia úbanu Katɔti ɔda bubo ɔku ɔni na úte Mose.

¹⁵Na Hilkia úti ɔku ɔmmɔ úte unengu Saƒan na ɔ́su-nwu ɔnini, “Nu! Lɛ́nu Ɔda Bubo Ɔku na Katɔti kakpakɔ.”

¹⁶Amu na Saƒan ɔ́ƒɔ ɔku ɔmmɔ na úti úsienku Yoas na útásu-nwu ɔnini, “Ƒula benengu badaku kabla kammɔ kalɛ na aawia ka babla-ka.

¹⁷Báƒɔ egulabi básiku kakpakɔ mmɔ na béti bésienku bekyuli bani mɔɔnu ekpo ammɔ bɔklibi kabla lɛlɔ.

¹⁸Nsu ni, Ɔbune, lɛla bamba lɛnɔ lɛ́lɛ. Aanu ɔku ɔni na Ɔkpane Hilkia úti úte-mi.” Mmɔ ni, Saƒan ɔ́ka ɔku ɔmmɔ momoomo úte-nwu na únu.

¹⁹Na ka Yosia únu ala ani na akya Katɔti Ɔda Bubo Ɔku ɔmmɔ kemmo ni, ɔ́ni nwuna awu ɔni na ɔkya ɔ́bwɛ ku kɔnyana.

²⁰Kɔnakunwi ni, ɔ́ya na bálɔ Hilkia ku Saƒan ku Saƒan ubidi Ahikam ku Mika ubidi Abdon na ɔ́ya na bálɔ Miaya ubidi Akbor lɛnɔ ku anwu ɔga ɔmmɔ ɔlati kabla ɔblane bábasala na ɔ́su-ma ɔnini,

²¹“Mɔɔnu ka Katɔti úti kɔnyi ɔ́kya-mi ku ukyuli biala na ɔkya Israel ku Yuda kalɔ kammɔ ƒui lɛlɔ, ɔsika bula bati kuuku bátadi ɔda bubo bɔni nkya ɔku ɔmɛni kemmo lɛlɔ. Anwuɔsu bisie na bitáwia lɛla lɛni ka Katɔti ɔɔwia ka bɔbla.”

²²Amu na Hilkia ku nkyuli ine bakladi bani na ɔga ɔ́tala ni, bátɔlɔ mmɔ kɔnakunwi bésie uleku Kenye Udiene Hulda kudɔ batátɛmiku-nwu. Na Hulda ɔgyani ndi Salum. Na Salum ɔmɛni ni, Hasra ubidi ɔni na baalɔ Tokat náwɔ-nwu. Na Hasra mɔɔnu ɔga adala kesekɔ lɛlɔ. Hulda keliekɔ kakya Yerusalem katɔ kakɛ. Na uwi ɔni na bása na nwuna kaduli mmɔ ka batɛmi ni,

²³kenye udiene ɔmmɔ ɔ́su-ma ɔnini, “Ɔga Yosia nátala-mii. Na Unwoti Israel Katɔti ɔnini,

²⁴‘Yosia, ami ndi Unwoti! Na lɛ́lɛ ugyii ka lɛni ukyuli biala na ɔkya kalɔ kamɛni kemmo kɔtu kalɛ na ɔku ɔmɛni kemmo etemila aatina.

²⁵Yuda ku Israel bekyuli ƒui béni-mi. Na bábla akpala béte kadi bamba baƒiɔ ku ala ani na ama alati bávɔ béte lɛlɔ. Na nsɔ lɛɛɛdubo bɔkana bunye bɔnu ɔmɛni gyɔlɔɔ, ɔsika livo liiƒí-mi geen.

²⁶“ ‘Binwini na bitásu Yuda ɔga ɔni nátala-mii ɔnii bibeye kenye udiene binu lɛla lɛni na ami Israel Katɔti mɔɔkali ɔ́siku ala ani na únu ɔ́siku ɔku ɔmmɔ kemmo lɛlɔ.

²⁷Ka kayi kágyu-ɔ uwi ɔni na énu ala ani na lɛ́su ka mabla kalɔ kamɛni ku kana bekyuli ni, éboku lɛlɔ kalɔ na kayi kemmo na áni ƒula awu ábwɛ na éwulo na mina anumi. Na mɔɔsu-ɔ geen ka línu ƒula buvele. Anwuɔsu nu lɛla lɛni na ndubo bɔbla.

²⁸Ndubo-ɔ bɔkpanku bɔtɔlɔku busienku ƒula bati kudɔ na badubɔva-a ku keyi buɛɛ. Na ƒula anumi alanu ɔgbankpi ɔni ndubo bɔlɛku kalɔ kamɛni ku kana bekyuli lɛlɔ.’ ” Amu na bekyuli bammɔ bénwini bátásu Yosia ala ani na bénu básiku uleku Kenye Udiene Hulda kudɔ.

²⁹Mmɔ ni, Ɔga Yosia ɔ́lɔ Yuda ku Yerusalem benengu bammɔ ɔ́sala.

³⁰Na anwu ku Yuda ku Yerusalem bekyuli bɔmmɔ ƒui ku bakpane ku Lewiƒuɔ bétéduo kakpakɔ mmɔ. Amu na kawɔlɔ ƒui uwi ɔni na bana ƒui báasa buduo ni, ɔ́ka Katɔti ɔda bubo ɔku ɔni na bánu na kakpakɔ mmɔ kemmo etemila momoomo na bénu.

³¹Na uwi ɔni na ɔ́ka ɔku ɔmmɔ ɔ́wɔlɔ ni, Yosia úsie úténye kesii kani na bédie bése sɛsɛɛ béte baga mmɔ. Na ɔ́lɔ Katɔti lɛnyi úse kenye ka ɔdubɔdi Unwoti ɔda bubo ku nwuna etemila ƒui lɛlɔ siin aani kalɛ na ɔkya ɔku ɔmmɔ kemmo.

³²Ɔmmɔ kama ni, ɔ́lɔ Yerusalemƒuɔ ku bani na bási Benyamin kɔdua kemmo mmɔ ƒui ka ama lɛnɔ bakpali Unwoti bese kenye kammɔ bete-nwu ka badubɔdi ɔda bubo ku etemila ani ƒui na Unwoti Katɔti ɔni bana bati kuuku bákpa mmɔ úte-ma lɛlɔ siin. Na bábla lɛni sɔsɔ.

³³Amu na Yosia ɔ́yila baƒiɔ bani ƒui na bakya Israel kalɛkɛ kammɔ lɛlɔ na úbo bana ƒui ɔda na Israel mmɔ ka bataakpa Unwoti Katɔti lɛti kani. Na básɔ bétenwini kama bátakya Unwoti Katɔti kudii na Yosia lɛga bɔdi uwi.