Read Lelemi Ala Alɛdi 2 35 Bible Online

Ala Alɛdi 2 35 - Lelemi bible

Ala Alɛdi 2 35

¹Na uwi ɔmmɔ ni, Yosia úbo ɔda ka badi Kukpi Lili Bɔvia Limeyi na Yerusalem na beti babu Unwoti. Anwuɔsu na kɔbuli kudeedi limeyi leevu-linedi lɛlɔ ni, bádu baƒonu bakɔdi béte limeyi lɛmmɔ bɔdi.

²Amu na limeyi lɛmmɔ lɛlɔ ni, Yosia ɔ́sia bakpane bammɔ anu kaduɛ kalɛ na ɔdi biala ɔti lɛla lɛni na ɔdubo bɔbla na kakpakɔ mmɔ.

³Na Lewiƒuɔ bani mɔɔbla Unwoti kabla na baatina bekyuli Unwoti ɔda bubo bɔmmɔ etemila ni, ɔ́lɔ-ma ɔ́sala na ɔ́su-ma ɔnini, “Bɛsɔ bɛɛɛdubo Katɔti Bunyimi Adaka ɔmmɔ buteeti taavinku ekpo ƒui ɔƒɛni amu. Mmomu ɔdubuse Katɔti kakpakɔ kani na Ɔga Salomo ɔni ndi Dawid ubidi ɔ́tu mɛni kemmo kesii kani na amii ku nwuna kadi bekyuli Israelƒuɔ bɛdubo nwuna kabla butaabla.

⁴Anwuɔsu bɛklibi lɛlɔ na bitátaabla bina kabla kani na Ɔga Dawid ku Salomo béte-mii ka bitaabla ɔkɛnku bina adua ammɔ kenye.

⁵“Bile lɛlɔ bɛkya kasala akpa akpa kemmo na binye kunyekɔ kɔni na bíle bíte lɛlɔ kalɛ na si atɔƒi ammɔ bekyuli bébo kakpakɔ na bana ɔdi biala ɔkɛ kebunku ɔsiku bina ɔdi kudɔ.

⁶Na si uwi ɔni na bekyuli bammɔ béti bana lɛkpa koƒonu ubi béboku ni, na bɛdu-ku na bɛwawa-ku bite ka bakpa bete Unwoti. Bɛnu kaduɛ kalɛ na bekyuli bammɔ badi limeyi lɛmmɔ basiaku ulu ɔni lɛlɔ na Unwoti úbo Mose ɔda. Na bɛbla lɛlɔ bɔbla sɛɛn ɔdi ɔmmɔ kalɛ na bilásɔ na Unwoti anumi na biteese-nwu lɛlɔ.”

⁷Yosia úte bekyuli bammɔ baƒonu ku bese mpim avlaatɛ ku ɔmantɛ bakɔ mpim ɛtɛ ɔ́siku anwu ɔlati bebuo akɔ ka beti bakpa.

⁸Yosia benengu bammɔ lɛnɔ béte bakpane ku Lewiƒuɔ bammɔ bebuo badi ku kaƒɔ ƒaa básiku bana bebuo akɔ ka beti bakpa. Na Hilkia ku Sekaria ku Yehiel bani ndi benengu bani mɔɔnu kakpakɔ kammɔ lɛlɔ lɛnɔ béte bakpane ku Lewiƒuɔ bammɔ baƒonu ku baƒonu bakɔdi mpim inyɔ ku eti leevu-anyɔ. Na béte ɔmantɛ bakɔ eti aku banii beti bakpa na Kukpi Lili Bɔvia Limeyi lɛmmɔ lɛlɔ.

⁹Na Konania ku nwuna banwani inyɔ bani ndi Semaia ku Netanel ku Hasabia ku Yeiel ku Yosabad ni, ama ndi Lewiƒuɔ benengu. Na ama béte Lewiƒuɔ bakladi baƒonu ku bese mpim ɛlɔ ku ɔmantɛ bakɔ eti leevu ka beti babla akpala.

¹⁰Amu ka uwi údu ka badi Kukpi Lili Bɔvia limeyi lɛmmɔ ni, bakpane ku Lewiƒuɔ bammɔ bésie béténye bana kunyekɔ aani kalɛ na Yosia ɔ́su-ma.

¹¹Na Lewiƒuɔ bammɔ bádu Lɛkpa baƒonubi bammɔ na bédie-ma lɛku na béti ubugya ɔmmɔ ɔdi béte bakpane bammɔ na bákuna béwi lɛkpabi lɛmmɔ lɛlɔ.

¹²Lewiƒuɔ bammɔ bédie bebuo bammɔ kɔdikɔ kɔdikɔ kɔni na badubuti babla bɔkyula ƒui ɔdi aani kalɛ na Mose ɔda bubo bɔɔtina bése bekyuli bani néboku bebuo bammɔ. Na lɛni kani na bábla ku ɔmantɛ bakɔ bammɔ lɛnɔ.

¹³Bákyula akpala ammɔ na lɛkpabi lɛmmɔ lɛlɔ, na béƒulo lɛna lɛkladi na ebui lidu lidu kemmo úte etela ɔdi bamba lɛnɔ bɔbla na bábabala béti lɛna lɛmmɔ béte bekyuli bammɔ kalɛ na bakun.

¹⁴Anwuɔsu limeyi limodi lɛmmɔ ƒui ni, bakpane bammɔ bátakɛ kɔnu kɔdi, mmomu benye baabla akpala na baakyula bebuo bammɔ lɛmwi na lɛkpabi lɛlɔ. Na uwi ɔni na bekyuli bammɔ ƒui ɔdi biala ɔ́wɔlɔ ni, Lewiƒuɔ bánwa Kukpi Lili Bɔvia adila ammɔ béte lɛlɔ ku bakpane bammɔ.

¹⁵Na uwi ɔni na baadi limeyi lɛmmɔ ni, Lewiƒuɔ badi bánwa adila ammɔ béte lɛnu bediene ku bagyumanane bammɔ kalɛ na Lewiƒuɔ lɛnu bediene bammɔ ɔdi ulágyu nwuna kenyekɔ kani na béte-nwu ka unye aani kalɛ na Dawid ku Asaƒ ku Heman ku Yedutum ɔni ndi kenye udiene ute ɔga ɔmmɔ bátina. Na bagyumanane bani na benye kakpakɔ kɔyakun lɛban kenye muedi ɔdi útalɛ ka ɔdi ɔgyu nwuna kenyekɔ.

¹⁶Anwuɔsu na limeyi lɛmmɔ lɛlɔ ni, bádi kukpi Lili Bɔvia Limeyi lɛmmɔ béti bákɔliku Unwoti katɔ na bákyula akpala na lɛkpabi lɛlɔ béte-nwu aani kalɛ Yosia úbo ɔda.

¹⁷Na bekyuli bani nébo kakpakɔ mmɔ bésie anumi na bádi Bodobodo Ɔni Néteƒu Limeyi bɔdi emeyi maatɛ.

¹⁸Yerusalem ɔma ku lɛma lɛni na Yuda ku Israel kalɔ ƒui bekyuli bébo mmɔ. Na ka ɔ́si Kenye Udiene Samuel uwi ƒui ni, bátadi Kukpi Lili Bɔvia Limeyi lɛmɛni lɛni kudii. Na geen ni, ɔ́si uwi ɔni na bése kalɔ ku limeyi lɛmɛni bɔdi ni, ɔmɛni ndi limeyi linengudi ƒui lɛni na bádi dii na Israel!

¹⁹Na ala amɛni ƒui álɛ na lɛkwa leevu-maanedi kemmo na Yosia Yuda lɛga bɔdi kemmo.

²⁰Amu na uwi ɔdi kama ni, Egyipteƒuɔ Ɔga Neko ɔ́tɔnku nwuna bekpone úsienku Karkemis ɔma unengudi kemmo na Euƒrate Ketu kɔtu. Na Yosia lɛnɔ útiku nwuna bekpone útásiaku kalɔ kammɔ katɔ kakɛ kalɛ na utásiaku Egyipteƒuɔ bammɔ na kekpokɔ.

²¹Mmɔ na Neko ɔ́kya Yosia ɔtu ɔnini, “Ɔɔɔdi awɔ Yuda Ɔga na líbo mbekpoku! Na ami ku awɔ bútakɛ lɛla lɛdi na buukpó. Katɔti násu-mi ɔnii mbekpoku mina ukisine na unye-mi kama lɛnɔ sɔsɔ. Anwuɔsu si awɔ ákali ka enye ada-mi ni, Unwoti ɔdubo-ɔ kɔtu bɔni.”

²²Nsu ɔmɛni ƒui ni, Yosia útenu Neko litemi ina ka Katɔti náya na ɔ́su-nwu kenye kammɔ! Mmomu úti ala adi na ɔ́bɛla nwuna anumi kalɛ na balanu-nwu baláti na úsie útásiaku-nwu ka bekpo na kesii kani baalɔ banii Medigo Ɔkwalɛ.

²³Ka benye kekpo kammɔ lɛlɔ ni, Egyipteni ukpone ɔdi úbo kataminta lɛtula ɔ́lɛ Yosia. Mmɔ kani na Yosia ɔ́su nwuna bekpone akɔ unwi ɔnini, “Babla na ada-mi edie mɛni, ɔsika lɛtula lɛdi lɛ́kɛ-mi.”

²⁴Anwuɔsu báda Yosia bédie kɛɛkɛ ɔmmɔ kemmo bátákya ɔbambadi ɔdi kemmo na béti-nwu bátɔlɔku mmɔ bésienku Yerusalem kesii kani na uwi ɔ́sɔ útetu asa na úkpi. Báva-nwu na kesii kani na nwuna bati kuuku batɛ na ukyuli biala na Yuda ku Yerusalem mmɔ úwulo-nwu geen.

²⁵Amu na Kenye Udiene Yeremia údie ɔkwanu ɔdi úti ɔ́kɔliku-nwu lɛnyi katɔ. Na ɔ́si uwi ɔmmɔ lɛlɔ ni, ukyuli biala muuwulo Yosia kukpi ni, uudie ɔkwanu ɔmmɔ. Na bénweni ɔnu ɔmmɔ bákya lɛkwanu ɔku kemmo.

²⁶Na lɛla bamba biala na Yosia ɔ́sɔ ɔ́bla na nwuna lɛgadi kemmo ku kalɛ na ɔ́siaku Unwoti kama siin ni,

²⁷bénweni-ni bákya Israel ku Yuda ala alɛdi ɔku kemmo.