Read Lelemi Ala Alɛdi 2 36 Bible Online

Ala Alɛdi 2 36 - Lelemi bible

Ala Alɛdi 2 36

¹Ka Yosia úkpi kama ni, Yudaƒuɔ bése ubidi ɔnanabi Yehoahas Yudaƒuɔ ɔga na Yerusalem.

²Na akwa aavlanyɔ-atɛ na ɔ́ƒɔ na uwi ɔmmɔ lɛlɔ. Na Yerusalem mmɔ na úlie ɔ́di lɛga abuli atɛ.

³Egyipteƒuɔ Ɔga Neko úƒie Yehoahas na únye Yudaƒuɔ lɛlɔ na beeyi lɛlɔ bɔdi kayu kani ndi sika ɔƒualadi aani antabi aƒo bonwu aavlene unu ku sika ugyiedi antabi akyami aavlanyɔ-atɛ unu teete-nwu.

⁴Na Ɔga Neko ɔ́ƒuna Yehoahas ɔnwani Eliakim úse lɛga na Yuda na ɔ́vumana-nwu lɛnyi ɔnii Yehoiakim. Na Yehoahas anwu ni, úti-nwu ɔ́tɔlɔku úsienku Egyipte aani ɔtɔntɛne kalɛ.

⁵Akwa aavlanyɔ-alɔ na Yehoiakim ɔ́ƒɔ asa na báƒuna-nwu ka ɔdi lɛga. Na úlie Yerusalem mmɔ ɔ́di lɛga akwa leevu-unwi. Yehoiakim útadi Unwoti nwuna Katɔti litemi lɛlɔ mmomu ɔ́bla atu ɔkplu na ɔ́bla ala ekpidi.

⁶Uwi ɔni na Yehoiakim ɔɔdi lɛga ni, Babilon Ɔga Nebukadnesar úkpo Yuda na úƒie Yehoiakim na úbo-nwu kɔgba na úti-nwu úmene Babilon ɔma unengudi kemmo.

⁷Nebukadnesar úti ala abuni bamba ani na áƒɔ kuye geen lɛnɔ na kakpakɔ kammɔ kemmo ɔ́tɔlɔku útése nwuna ɔga kesii na Babilon.

⁸Na ala bamba ani na Yehoiakim ɔ́sɔ ɔ́bla uwi ɔni na ɔɔdi lɛga ku ala ekpidi ani na ɔ́bla ku ani muusé lɛlɔ ƒui ni, bénweni-nya bákya Israel ku Yudaƒuɔ ala alɛdi ɔku kemmo. Na ɔmmɔ kama bése ubidi Yekonia lɛga.

⁹Akwa leevu-maane na Yekonia ɔ́ƒɔ asa na bése-nwu Yudaƒuɔ ɔga. Na úlie Yerusalem mmɔ ɔ́di lɛga abuli atɛ ku emeyi leevu. Anwu lɛnɔ útadi Unwoti litemi lɛlɔ na ala ekpidi ani na ɔ́bla ɔsu.

¹⁰Uwi ɔni na ketudi keesé kalɔ ni, Babilon Ɔga Nebukadnesar ɔ́ya na béƒie Yekonia na úti-nwu úsienku Babilon na ɔ́sɔ útiku ala abambadi ani lɛnɔ náƒɔ kuye geen ɔ́siku kakpakɔ kammɔ kemmo. Ɔmmɔ kama Nebukadnesar ɔ́ƒuna Sedekia ka unwini Yudaƒuɔ ɔga.

¹¹Sedekia ɔ́kɛ akwa aavlanyɔ-unwi asa na ɔ́di lɛga. Na ɔ́di lɛga lɛmmɔ na Yerusalem akwa leevu-unwi.

¹²Ɔ́bla likpidi na Unwoti nwuna Katɔti anumi na úni ka uboku lɛlɔ kalɔ ina ka Katɔti Kenye Udiene Yeremia ɔ́dɔnku-nwu geen.

¹³Amu na Sedekia ɔ́ta únye Ɔga Nebukadnesar lɛlɔ ina ka ɔ́kpali Unwoti lɛnyi na úse ɔga ɔmmɔ kenye ka ɔdubɔdi nwuna litemi lɛlɔ siin. Nsu Sedekia ɔ́bla atu ɔkplu na úni ka ɔvumana kayi na unwini ubo Unwoti Israel Katɔti kudɔ. Na ɔ́ta únye Nebukadnesar lɛlɔ.

¹⁴Yuda kadi bekyuli ku bana bakpane bani ndi bana batɔnkune ƒui muedi béni ka badi Unwoti litemi lɛlɔ siin. Na bakɛ basiaku kadi bekyuli bani ablala muusé Katɔti lɛlɔ mmɔ ɔbladu kama na báya na Unwoti kakpakɔ kedee kammɔ keesé lɛlɔ na kásɔ kátamanku ka bakpa na mmɔ.

¹⁵Nsu Unwoti Katɔti kadi bekyuli bammɔ lɛlɔ lɛ́kywi-nwu kaƒɔ na ɔni na ɔkyula kakpakɔ kammɔ na kayii udu ni, bɔtala mmomu na ɔ́tala nwuna kenye bediene na bábadɔnku-ma kɔlɛ kɔlɛ na bana ekpidi ɔsu.

¹⁶Nsu bɔma kani na bekyuli bamɛni báma kenye bediene bammɔ na bédumi-ma na béni ala ani ƒui na Katɔti ɔɔwia ka ɔsu-ma. Na ɔkɛnku ɔmɛni ɔsu kɔnyi kúbakɔ Unwoti Katɔti kɔ́vili útédu ka ɔni Yuda ku Yerusalem kɔtu.

¹⁷Unwoti ɔ́tala Babilon Ɔga Nebukadnesar ka utékpo Yerusalem. Na úsie útádu bakloƒu bani nkya kakpakɔ kammɔ kemmo na útanu ɔdi kɔnyana. Uleku o-o, ɔnana o-o, unengu o-o, ɔnamu o-o ni, Katɔti ɔ́ya na ɔ́du bana ƒui na ɔma unengudi ɔmmɔ kemmo.

¹⁸Na úti Katɔti kakpakɔ kemmo ala enengudi ku ebliidi ani nse mmɔ ƒui ɔ́tɔlɔku úsienku Babilon ku ɔga ɔmmɔ ku nwuna benengu akɛla ani nse kakpakɔ mmɔ.

¹⁹Ɔmmɔ kama bátu ogya bákya Katɔti kakpakɔ kammɔ na báƒɛ Yerusalem awodu ammɔ béwi kalɔ, na bákyula baga kesii kammɔ ƒui na bébile ala ani náƒɔ kuye mmɔ ƒui.

²⁰Bekyuli bani ƒui na bátadu na kuwii kenye ni, ɔga ɔmmɔ ɔ́ya na béƒie-ma bátɔlɔku, na bénwini anwu ku nwuna bebi kabla bablane úti útédu uwi ɔni na Persia lɛgakadikɔ kébo kaadi lɛlɔ.

²¹Na uwi ɔni na ɔgbankpi ɔmɛni úbo kalɔ kammɔ ƒui lɛlɔ na basɔ balátuma-ka ni, kalɔ kammɔ kákɛ kana bɔnwuna lɛkwa aani lɛnwunameyi kalɛ útédu akwa liti ku aavlanyɔ ani na Unwoti ɔ́sia nwuna kenye údie Yeremia lɛlɔ ɔ́su úse.

²²Ɔmɛni kama na Persia kalɔ Ɔga Kores lɛga bɔdi lɛkwa lideedi kemmo ni, Unwoti úti ɔ́sia-nwu kayi ka ute bɔti bɔdi na nwuna kalɛkɛ lɛlɔ ƒui kalɛ na Yeremia kenye kani na ɔ́su kebo-nwu kemmo na ɔ́ya na bénweni lɛla lɛmɛni bése.

²³“Lɛni na ami Ɔga Kores mɔɔsu, “ ‘Unwoti Katɔti Ɔyikune úti kayawi lɛga kɔdikɔ ƒui ɔ́kya-mi kalɔ, na ɔ́ƒuna-mi ka lɛtu kakpakɔ lite-nwu na Yerusalem na Yuda kalɔ lɛlɔ. Anwuɔsu nwuna kadi bekyuli akɔ ɔdi biala na ɔkya-mii akɔ ni, nwuna Katɔti ɔsiaku-nwu na unwini usie mmɔ.’ ”