Read Lelemi Ala Alɛdi 2 4 Bible Online

Ala Alɛdi 2 4 - Lelemi bible

Ala Alɛdi 2 4

¹Salomo ɔ́ya na béti abuala egyiedi bábla lɛkpabi lɛdi na lɛ́kuku lɛgba leevu-ɛlɔ na nina bɔbɛbɛ ku bune ƒui bɔdi bɔkɔku bunwi na ɔdi lɛgba avlaatɛ.

²Amu na ɔ́nwamana lɛbuala lɛdi ɔ́bla ntu kewikɔ bonwu kunu kunu lɛdi na ɔ́si ɔvi unwi úsie ɔkladi ubo lɛgba bɔka leevu-ɛlɔ. Na nwuna bɔkuku bɔdi lɛgba bɔka maatɛ. Na nwuna bɔka bɔmana bɔdi lɛgba bɔka aavlene-ɛlɔ.

³Ɔmantɛ bakɔ bavɔdi badi benye ntu kewikɔ kammɔ kalɔ bámana na lɛgaala inyɔ kemmo na lɛdanku lɛkyami lɛmmɔ na bebo leevu na lɛgba bɔka ine ku kakɛ bɔka biala kemmo.

⁴Ɔ́vɔ ntu kewikɔ bonwu kamɛni ɔ́lɛ bakɔ bebuo bavɔdi leevu-inyɔ lɛlɔ. Na ɛtɛ baanu katɔ kakɛ na ɛtɛ baanu ɔƒɛ kanukɔ na ɛtɛ baanu kada kakɛ na ɛtɛ baanu ɔƒɛ katukɔ. Ntu kewikɔ bonwu kamɛni kalɛ bebuo bamɛni lɛlɔ na bebuo bamɛni ƒui lɛka líbasala ntu kewikɔ bonwu kamɛni kalɔ na ntɛntɛ.

⁵Na ntu kewikɔ kamɛni bumini úbalɛ atu bɔbla aani lɛnimi bune. Na nwuna kenye kewi aani ɔɔƒɛɛ na use aani kugyii anwula ani nébimi. Ntu kewikɔ kammɔ kadubɔƒɔ aani ntu lɛsii bonwu mpim leevu-unwi ku eti leevu (11,500).

⁶Amu na ɔ́sɔ ɔ́bla akyami wɛlɛ wɛlɛ leevu bamba na úti ɛlɔ únyene lɛkyami linengudi lɛmmɔ ɔƒɛnyi unwi na úti ɛlɔ únyene ɔƒɛni unyɔdi. Na akyami wɛlɛ wɛlɛ ammɔ kemmo na baakpila bebuo bani na baadú taakyula na lɛkpabi lɛmmɔ lɛlɔ aani akpala kalɛ. Na lɛkyami linengudi lɛmmɔ kemmo ntu na bakpane beedú taaƒɔ bana enu.

⁷Na ɔ́bla sika ugyiedi asogya ligyii leevu na udu ɔni na bátina-nwu kenye. Na Salomo úti-ni únyene kakpakɔ kammɔ ɔtɔ unengudi ɔmmɔ kemmo. Na ɛlɔ bunye kakɛ kenwi na ɛlɔ lɛnɔ bunye kakɛ kakladi.

⁸Na ɔ́nwi ala kasiakɔ leevu úse ɔtɔ unengudi ɔmmɔ kemmo. Na ɛlɔ bunye kakɛ kenwi na ɛlɔ lɛnɔ bunye kakɛ kanyɔdi. Na ɔ́bla sika ugyiedi ntu kuwikɔ kesii kani na beewi ntu taakuna teewi bekyuli lɛlɔ.

⁹Salomo ɔ́ya na békulo kɔduli inyɔ, kenengudi kenwi ku kebliidi kenwi. Na bakpane kani muuduo kebliidi kammɔ kemmo. Na kɔyakun kɔmmɔ ƒui eli ni, abuala egyiedi na béti bébi-ku.

¹⁰Na lɛkyami linengudi lɛni baalɔ banii ɛpu mmɔ ni, béti-ni bése kakpakɔ kammɔ kada kakɛ na ɔƒɛ katukɔ.

¹¹Na Huram ɔ́sɔ ɔ́bla ebui ku kɔlɛkɛ kɔni na beedie ogya ku akyami lidu ku kesii kani na beewi ntu taakuna. Anwuɔsu Huram ɔ́wɔlɔ Katɔti kakpakɔ kabla kani ƒui na Ɔga Salomo úte-nwu ka ɔbla.

¹²Ɔ́bla akpa anyɔ ammɔ ku ligegu kubila inyɔ kɔni na ɔ́bla úbi akpa ammɔ eli. Na ɔ́bla abuala ani na ɔ́vili ku lɛlɔ kasala bun bun akpa anyɔ ani na úti ɔ́kya akpa ammɔ eli ligegu kubila kɔmmɔ bɔdia.

¹³Ɔ́bla kugyii ebi udu eti maane (400) ani na ɔ́bla na lɛgaala inyɔ kemmo ɔ́ka ɔ́mana abuala ani na ɔ́vili ku lɛlɔ bun bun akpa anyɔ mmɔ úti ɔ́kya ligegu kubila kɔni mbi akpa ammɔ eli bɔdia,

¹⁴ku ala kɔsiakɔ ku ana akyami.

¹⁵Ɔ́bla ntu kewikɔ bonwu ku bakɔ leevu-inyɔ bani lɛlɔ na ntu kewikɔ kammɔ kenye,

¹⁶akyami ani kemmo na beewi ogya ntɔ ku abuala kɔlɛkɛ ku abuala ani na baatu lɛna. Ala amɛni ƒui na Huram ɔ́bla ɔ́lɛku abuala ani na békuo na eekeye kemmo.

¹⁷Na bɔnwamana na ɔɔnwamana abuala amɛni teewi ala ani na ɔ́vɔ únyene kesii kani baalɔ banii Sukot ku Sereda na Yordan Ketu kɔtu mmɔ lɛlɔ.

¹⁸Na abuala egyiedi ala ani udu nse kakpakɔ mmɔ emomo geen ɔni na ukyuli ɔdi ɔsɔ uláti abuala egyiedi ani bumomo na béti bábla-nya.

¹⁹Salomo úbo-ma ɔda ka básɔ bábla kakpakɔ ala bamba bése mmɔ. Sika ugyiedi lɛkpabi ku ala kasiakɔ kesii kani na baasia bodobodo ɔni muusé Unwoti anumi

²⁰ku sika ugyiedi asogya kasiakɔ ligyii kesii kani na baatu ogya taalɛ na Katɔti katɔma kedee kammɔ anumi kalɛ na bátina

²¹ku egyii anwula bɔdia lidu lidu ku lɛsogya ku abuala ani na beedie ogya na asi kemmo ani na bábla ku sika ugyiedi

²²ku sika ugyiedi asogya kɔbuli linyenela ku ntu kuwikɔ kɔni kemmo na beewi ntu taakuna teewi bekyuli ku akyami ku oloƒui kewikɔ ku lɛvili ku ogya kewikɔ kɔlɛkɛ ku kɔyakun kɔni na baasia teeduo Katɔti katɔma kedee kemmo ku kakpakɔ keliekɔ kammɔ geen kemmo.