Read Lelemi Ala Alɛdi 2 6 Bible Online

Ala Alɛdi 2 6 - Lelemi bible

Ala Alɛdi 2 6

¹Salomo ɔ́su ɔnini, “Bula Unwoti, awɔ násu ka adubɔkya liƒlukutu suu kemmo.

²Na ɔƒaani ni, lɛ́tu kakpakɔ kani muukeye kesii kani na adubɔkana na elie uwi ƒui.”

³Salomo únwini lɛlɔ ɔ́tina bekyuli bani nnye mmɔ na úte-ma kusɛ kusɛ.

⁴Na ɔ́su-ma ɔnini, “Bemwi Unwoti Israel Katɔti! Kuuku ƒui ni, anwu nákpanku nwuna bekyuli ɔ́lɛku Egyipte kalɔ lɛlɔ. Na nwuna kama ni, ɔ́di nwuna linyese lɛlɔ ka wabla mina ɔti Dawid Israelƒuɔ ɔga. Na úse-nwu kenye lɛnɔ ka Yerusalem ndubɔbla nwuna ɔma unengudi kesii kani na badubɔtu nwuna kakpakɔ benyene. Na ɔƒaani ni, linyese lɛmmɔ líbo líte lɛni sɔsɔ.

⁷“Uwi ɔni na mina ɔti ɔ́wia ka ɔtu kakpakɔ ute Unwoti Israel Katɔti ni,

⁸Unwoti ɔ́su-nwu ɔnini, ‘Ɔdia ka ábla kasusu ka atu kakpakɔ ete-mi na bekyuli bataakpa-mi na mmɔ.

⁹Nsu ɔɔɔdi awɔ ndubo-ka bɔkana bɔtu mmomu ƒ'ubidi ndubo kakpakɔ kammɔ bɔtu bute-mi na bakyuli bete-mi ɔbu.’

¹⁰“Na Unwoti ɔ́di kenye kani na úse lɛlɔ na ami ndi Israelƒuɔ ɔga ɔƒaani. Na lɛ́tu kakpakɔ líte Unwoti bula Katɔti.

¹¹Líti Bunyimi Adaka ɔmmɔ lɛnɔ líse kakpakɔ kammɔ kemmo. Na adaka ɔmmɔ kemmo ni, atabi bɛbɛɛbɛ anyɔ ani lɛlɔ na Unwoti únweni lɛla lɛni na únyimiku bula bati kuuku ɔ́sia uwi ɔni na ɔ́kpanku-ma ɔ́lɛku Egyipte kalɔ lɛlɔ akya-nwu kemmo.”

¹²Amu na uwi ɔmmɔ kemmo ni, Salomo ɔ́ɔgyu ɔ́tɔ ɔ́ya na bábla kenyekɔ ubili ɔdi ku abuala egyiedi. Na kenyekɔ kamɛni kadi lɛgba maane maane lɛƒɛnyi ine bɔmmɔ ƒui na ɔ́kuku lɛgba ɛlɔ na kaduli kenengudi kammɔ ntɛntɛ na lɛkpabi lɛmmɔ kudɔ. Na Salomo ɔ́kɔ únye ubili ɔmmɔ lɛlɔ na úti nwuna anumi ɔ́tina lɛkpabi lɛmmɔ. Na bekyuli bakladi ƒui benye-nwu kama. Mmɔ na ɔ́kɔliku enu katɔ na ɔ́lɛ akɔnkɔ kalɔ,

¹⁴na ɔ́kpali Katɔti ɔnini, “Unwoti Israel Katɔti, ɔyikune ƒui, ɔdi ɔsɔ uuubo na katɔ iye kalɔ lɛlɔ mɛni na use aani ƒula kalɛ! Átayiƒala lɛla lɛni na ényimi ku ƒula kadi bekyuli kudii. Na aasia ƒula litemi kama siin taadi-ni lɛlɔ teete ukyuli biala ɔni na mɔɔsia ƒula ala bɔtina kama siin taadi-ni lɛlɔ na ulalɛ-ɔ kama.

¹⁵Mina ɔti Dawidi ɔ́bla ƒula kabla. Na ɔmwi ni, ádi ƒula kenye biala na ése-nwu lɛlɔ.

¹⁶“Ése-nwu kenye ka nwuna ɔtɔ kemmo na ukyuli ɔdubɔsi uwi biala kemmo na ɔdi lɛga na Israel kalɔ lɛlɔ si bákya ɔkplu na bábla básia ƒula ɔda bubo lɛlɔ aani kalɛ na anwu lɛnɔ ɔ́bla.

¹⁷Muuvele nnii sia anu kenye kani na ése ƒula kabla ɔblane Dawid mɛni kaduɛ lɛni kani.

¹⁸“Nsu ni, bulie na Katɔti, ɔdubulie kayawi kamɛni kemmo geen geen? Ɔ́si katɔ útédu katɔ kakaaka ƒui muedi kalakana-a bɔda. Amu bátaka kakpakɔ kani na lɛ́tu lite-ɔ na kétedu lɛla lɛdi mɛni kemmo?

¹⁹Nsu muuvele-ɔ ka enu-mi bɔkpali, na anu-mi kɔnyana, ƒula kabla ɔblane kalɛ.

²⁰Aanu ƒula kakpakɔ kani na áƒuna ka bekyuli bataakpa-a na kana kemmo. Muuvele nnii nu-ka lɛlɔ usien ku ɔƒɛ na enu-mi bɔkpali si uwi biala na línwini mɔɔnu-ka na lɛ́kpali-ɔ.

²¹Ƒula kabla ɔblane na ndi na Israel kadi bekyuli bammɔ ƒui awɔ mbo-ma. Anwuɔsu uwi biala na bekyuli bamɛni akɔ ɔdi únwini ɔ́nu kakpakɔ kamɛni na ɔ́kpali-ɔ ni, na enu-nwu bɔkpali asiku katɔ kesii kani na eli mmɔ na eti bula alaekpidi akyiɛ-bu.

²²“Si banii ukyuli ɔdi ɔ́da ɔkpanadi kenye ka ɔ́bla likpidi bonwu lɛdi na úbo úte ka ukyuli ɔni kenye na báda mmɔ unye lɛkpabi lɛmɛni anumi na ƒula kakpakɔ kamɛni kemmo na ɔ́su ɔnii, ‘Lɛ́kanku ka lɛɛɛgyi lɛla lɛdi’ ni,

²³na enu-nwu bɔkpali asiku katɔ mmɔ na edie ukyuli ɔni náƒiɔ atina. Na ani ukyuli ɔni náƒiɔ mmɔ kɔtu na ukyuli ɔni nátaƒiɔ uteesie ƒaa.

²⁴“Na si ɔƒɛni kalɛ ƒula kadi bekyuli Israelƒuɔ báƒiɔ-ɔ, na bana bekisine bádi-ma lɛlɔ na bábla kasusu ka bebo bebevele-ɔ na eti bana ekpidi akyiɛ-ma ni,

²⁵si bébo na enu ete-ma asiku ƒula keliekɔ na katɔ mmɔ. Na eti bana ekpidi akyiɛ-ma na asɔku-ma eboku kalɔ kani na éti éte bana bati kuuku mmɔ lɛlɔ.

²⁶“Ɔƒɛni kalɛ bakana na baƒiɔ-ɔ na ani-ma kɔtu na étile kayaa na ɔnantu ɔsɔ ulana. Nsu si báda bana ekpidi bɔbla báya na bénwini bánu kakpakɔ kamɛni na bévele-ɔ lɛla lɛdi na ƒula lɛnyi kemmo ni,

²⁷na enu-ma bɔkpali asiku ƒula keliekɔ na katɔ mmɔ na eti akyiɛ-ma. Israel kadi bekyuli ƒui badi ƒula kabla bablane, anwuɔsu tina-ma kalɛ na belie ngba siin na ulu lɛlɔ. Na aya na ɔnantu ɔna uwi kalɔ kani na ese kenye ete bana bati kuuku lɛlɔ ka beti uwi ƒui mmɔ.

²⁸“Ɔkana na ubo ute uwi ɔdi ka baalɔlɔ bebile ala iye edula ammɔ ebu na kalɔ kemmo, Na ɔmmɔ ɔsu kɔka kubataada ƒula bekyuli, iye bekisine babaka kalɔ kammɔ ƒui bakya, iye ɔlɛ buɛ ubo kalɔ kammɔ bekyuli lɛlɔ na bese kalɔ beteekpi.

²⁹Muuvele nnii nu ukyuli biala ɔni ndubɔkpali-ɔ uvele buti taakyiɛ na údie enu ɔ́tina ƒula kakpakɔ kamɛni ka nwuna ekpidi éduo-nwu geen.

³⁰Agyi lɛla lɛni na lɛkya ukyuli biala kayi kemmo, anwuɔsu nu ɔdi biala buvele na abla ete-nwu ɔkɛnku nwuna ɔbladu ku lɛla lɛni nkya ukyuli ɔmmɔ kayi kemmo kenye asiku ƒula keliekɔ na katɔ mmɔ.

³¹Na ƒula bekyuli badubo-ɔ bɔbu na benu-ɔ litemi uwi ɔni ƒui na béti belie kalɔ kani na éti éte bana bati kuuku mmɔ lɛlɔ.

³²“Baƒɔ badubo ƒula kɔku bunu na bati ƒula ɔyikun bonwu ɔni na ebo na bebelie abu ƒula kadi bekyuli Israelƒuɔ akɔ. Si bana ɔdi ɔɔnu kakpakɔ kamɛni na úvele-ɔ lɛla lɛdi ni,

³³na enu ete-nwu asiku ƒula keliekɔ na katɔ mmɔ na badubɔnu bati ka ami nátu kakpakɔ kamɛni líte ƒula lɛnyi bumwi ku bɔbu.

³⁴“Uwi ɔdi ni, adubɔsu ƒula kadi bekyuli kpakplaa ka bekpoku bana bekisine. Na ama lɛnɔ badubo bunwini na banu ƒula kakpakɔ kani na lɛ́tu líte-ɔ na ƒula ɔma unengudi ɔni na áƒuna mɛni kemmo na bakpali-ɔ.

³⁵Nu-ma bɔkpali siku katɔ kesii kani na eli mmɔ na aya na badi lɛlɔ.

³⁶“Ukyuli biala ɔɔbla likpidi. Nsu si banii ƒula kadi bekyuli báƒiɔ-ɔ akana na eti kɔnyi kpakplaa geen na akana na aya na bana bekisine beƒie-ma batɔlɔku.

³⁷Nsu si kama ƒui na bánu bana bɔƒiɔ báti na bénwini bánu kakpakɔ kamɛni na bévele-ɔ ni, na eti akyiɛ-ma asiku katɔ kesii kani na eli. Aka na lɛ́tu líte-ɔ na ƒula ɔma unegudi kemmo mɛni na kalɔ kani na éti éte bula bati kuuku mɛni kemmo.

⁴⁰“Unwoti Katɔti, nu-bu bɔkpali si buuvele-ɔ lɛla lɛdi taasiku kakpakɔ kamɛni kemmo.

⁴¹“O Unwoti Katɔti, ta ku ƒula Bunyimi Adaka na atina ƒula ɔyikun. Na esie etélie ƒula keliekɔ. Unwoti Katɔti, ya na ƒula bakpane bataabla ala ani nse siin uwi biala. Na aya na ƒula bekyuli kedee lɛlɔ lɛyɔ na lɛla lɛni na ábla éte-ma lɛlɔ.

⁴²Na muuvele nnii taakali kalɛ na áyɔ ƒula kabla ɔblane Dawidi uwi biala, na teni ƒula ukyuli Ɔƒunadi ɔmmɔ.”