Read Lelemi Ala Alɛdi 2 7 Bible Online

Ala Alɛdi 2 7 - Lelemi bible

Ala Alɛdi 2 7

¹Uwi ɔni kani na Salomo ɔ́wɔlɔ Katɔti bɔkpali kani na ogya ɔ́bwɛ ɔ́si kayaa úbo úbakyula akpala ammɔ. Na Katɔti bukeye bɔni mɔɔtu anumi geen búbaƒɔ kakpakɔ kammɔ kemmo ƒui tɛtɛɛtɛ,

²na bakpane bammɔ muedi bátakana na beduo ɔtɔ ɔmmɔ kemmo.

³Amu na uwi ɔni na bekyuli lisu bani nnye mmɔ bánu ogya ku Katɔti bukeye bɔmmɔ ni, bana ƒui bálɛ akɔnkɔ na bákya lili kalɔ béte Katɔti na bákpali-nwu basu banini, “Ɔsika ɔdia na ɔɔyɔ́-bu uwi ndi uwi.”

⁴Salomo ku bekyuli bammɔ bédie kakpakɔ kammɔ keyi na bádu ɔmantɛ bakɔ mpim aavlanyɔ-inyɔ ku baƒonu mpim eti anyɔ ku aavlanyɔ béti bése kakpakɔ kammɔ likpo béte Katɔti.

⁶Na ɔdi ɔmmɔ bɔbla kemmo ni, ukyuli biala ɔ́ta únye. Na bakpane benye bana kenyekɔ kani na béte-ma na baavwi bana kɔkpɛɛ. Na Lewiƒuɔ lɛnɔ bana anumi aatina bakpane bammɔ kudɔ na baagyá bana lɛbentaa ku agyala ani na Dawidi ɔ́bla úte-ma ka bataagya si uwi ɔni na beemwi Katɔti na kalɛ na ɔɔyɔ́-bu uwi ndi uwi na uuubo kawɔkɔ ɔsu.

⁷Na limeyi lɛmmɔ kani lɛlɔ ni, Salomo úse kakpakɔ kammɔ kaduli kani nwi kakpakɔ anumi mmɔ likpo úte ka bataabla-ka lɛlɔ kabla. Na ka abuala egyiedi lɛkpabi lɛni na ɔ́bla lise blii suɛ ɔsu ni, kaduli kammɔ kemmo na ɔ́bla akpala bɔkyula ƒui ɔdi ɔni mɔɔyɔ́ Katɔti kaƒɔ mmɔ úte-nwu ku antabi udu edula ku lɛmwi bamba akpala bɔkyula ɔni uyɔ nákɔ úsie Katɔti kudɔ ku ɔnyi ƒɛƒɛɛ.

⁸Amu na emeyi maatɛ kemmo ni, Salomo ku bekyuli bammɔ bádi kevo kemmo bulie limeyi. Na bekyuli bási ɔgyu aani Egyipteƒuɔ lɛba ɔkwalɛ na kada kakɛ ku kesii kani baalɔ banii Hamat na katɔ kakɛ bébo.

⁹Na kadi kegye ni, bana ƒui bébo bábasala kalɛ na bakpa Katɔti. Na emeyi ani ƒui na béti bábla ala amɛni adi emeyi leevu-ene. Emeyi maatɛ ute lɛkpabi lɛmmɔ keyi budie ku likpo buse bute nina kabla. Na emeyi maatɛ bamba lɛnɔ úte adi kevo kemmo bɔkya limeyi lɛmmɔ bɔdi.

¹⁰Ɔmmɔ kama kɔbuli maatɛdi limeyi aavlanyɔ-lɛtɛdi lɛlɔ ni, Salomo údie ɔdi biala ulu na ɔ́sɔ únwini úsie nwuna ɔma. Na lɛlɔ lɛ́yɔ-ma geen uwi na bakɛ ulu bésela na ala abuni ani na Unwoti ɔ́bla úte Dawid ku Salomo ku nwuna kadi bekyuli Israelƒuɔ ƒui ɔsu.

¹¹Báwɔlɔ Unwoti kakpakɔ ku Salomo ɔga kesii kammɔ bɔtu ɔƒɛni amu. Na geen ni, lɛla biala na Salomo ɔ́lɛ ugyii ka ɔbla ni, lɛ́sa bɔbla na.

¹²Amu na uwi ɔdi kama ni, Unwoti údie lɛlɔ ɔ́tina Salomo na kɔna kemmo na ɔ́su-nwu ɔnini, “Línu ƒula bɔkpali na lɛ́ƒuna kakpakɔ kamɛni aani kesii kani na bekyuli badubo akpala butaakyula teete-mi.

¹³“Ɔkana na ubo ute ka lítile kayaa na ɔnantu ɔ́sɔ ulana iye baalɔlɔ bébile edula ammɔ iye ɔlɛ buɛ ɔdi úbo bekyuli bammɔ.

¹⁴Si ami ɔlati mina kadi bekyuli badubo lɛlɔ kalɔ buboku na bakpali-mi bevele na benwini bebo-mi kudɔ na bada ekpidi bɔbla baya ni, ndubunu bana buvele na liti bana ekpidi lɛkyiɛ-ma na lɛya na kalɔ kammɔ kasɔ kataadia edula.

¹⁵Na ala ani ƒui na bɛdubo-mi bɔkpali buvele na kakpakɔ kamɛni kemmo ni, ndubunu na lɛbla lɛsia lɛni

¹⁶ɔsika kakpakɔ kammɔ kadi mina kadi na mɛni na bekyuli badubo-mi butaakpa ɔ́si ɔƒɛni úsela uwi ƒui. Na lɛɛɛdubo-ka lɛlɔ bɔda bɔnu bɔya kudii.

¹⁷“Salomo, ƒ'ɔti Dawid únu-mi litemi na ɔ́di-ni lɛlɔ. Awɔ lɛnɔ ɔlɛka abla lɛni kani. Bla siaku mina ɔda bubo ku ala ani na mɔɔtina lɛlɔ.

¹⁸Na kenye kpakplaa kani na líse-nwu ka nwuna ɔtɔ kemmo na ukyuli ɔdubɔsi ɔdi lɛga na Israel kalɔ uwi biala ni, ndubɔdi-ka lɛlɔ lite-nwu.

¹⁹“Nsu si awɔ iye Israel kadi bekyuli bammɔ akɔ ɔdi úse kalɔ ɔɔkpá baƒiɔ bani na kadi bamba bekyuli baakpá mmɔ ni,

²⁰ndubo-mii bɔbɔku budie kalɔ kani na líte-mii mɛni kemmo na aani kalɛ na baagyú lɛla lɛdi teedie nina kenyekɔ na lidie kakpakɔ kani na lɛ́su ka bekyuli badubo-mi butaakpa mmɔ atu na lɛda-ka liwi na bekyuli ƒui na kesi kesii beti kenye kammɔ babla aani lɛƒiankula na baataakya-ka lɛlɔ lɛma.

²¹Kakpakɔ kamɛni kadi kesii kani na káƒɔ kuye geen na bekyuli baabu-ka ɔƒɛni. Nsu si ala ani ɔda na líbo-mii mɛni álɛ ni, ukyuli biala na ɔ́sia mɛni ɔɔví ni, ɔdubo-nwu bɔbla kalɛ kadi na uye ɔnini, ‘Bi ɔsu na Unwoti ɔ́bla lɛla lɛni na libo ɔkplu lɛni?’

²²Na ama badubudie kenye banini, ‘Ɔni na Israelƒuɔ béni Unwoti bana Katɔti ɔni nédie bana bati kuuku ɔ́lɛku Egyipteƒuɔ enu kemmo na bése kalɔ baakpá kadi bamba baƒiɔ ɔsu.’ ”