Read Lelemi Ala Alɛdi 2 9 Bible Online

Ala Alɛdi 2 9 - Lelemi bible

Ala Alɛdi 2 9

¹Seeba beleku ɔga únu kalɛ na Salomo ɔ́ƒɔ lɛnyi, anwuɔsu úsie Yerusalem ɔni utákɔku nwuna lɛnunda ɔnu na uye-nwu etemila kpakplaa adi. Na útiku nwuna bakutine pii badi ɔda na útile nwuna bebuo ala betine benengudi ku etela pii ani ndi kutu akyala ku asɛɛ ebi ani náƒɔ kuye ku sika ugyiedi lɛnɔ. Ka útéduo mmɔ ni, anwu ku Salomo bátɛmi atɛ pii geen básiku ala ani na nwuna kasusu kákana bukeyi lɛlɔ.

²Na Salomo lɛnɔ údie ɔdi biala kenye ina dɛ na lɛla lɛmmɔ libo ɔkplu.

³Na Salomo lɛnunda lɛmɛni lítakɔsi na lɛ́bla beleku ɔga ɔmɛni kalɛ kadi geen. Na bɔnwuna muedi bɔ́si-nwu ka ɔ́nu kakpakɔ ku ala ani na Salomo ɔ́tu ku adila ani na asia adila kadikɔ ku nwuna bakutine ku nwuna kabla bablane bana ƒui na bana lɛwu kemmo ku akpala ani udu na ɔ́bla na Unwoti kakpakɔ.

⁵Mmɔ na ɔ́su ɔnini, “Salomo, ɔ́si mina kalɔ lɛlɔ ƒui na línu kalɛ na ebo lɛnunda geen ku ala ani udu na ábla.

⁶Nsu ńtaƒɔ ńtadi úti úbedu uwi ɔni na ami ɔlati lɛ́nu ɔmɛni ku mina anumi! Na lɛ́nu ala bamba pii ani na etulo ani na línu asa na líbo mɛni. Na geen ni, etulo kalɛ na básu-mi muedi.

⁷Kuli kɔdia ƒula bakutine ku kabla bablane ka bakya mɛni na beteenu ƒula lɛnunda etemila ani na aasu.

⁸“Muumwi Unwoti ƒula Katɔti. Ƒula lɛlɔ lɛ́yɔ-nwu kaƒɔ na ɔ́bla-a Israelƒuɔ ɔga. Na Katɔti ɔɔyɔ́ kadi kamɛni bekyuli na uledie-ma atu lɛnɔ kudii, anwuɔsu na úte-ma ɔga ɔni ndubɔdi-ma lɛlɔ na ɔtɛ lɛla biala na ulu siin lɛlɔ.”

⁹Seeba uleku ɔga ɔmɛni úte Salomo sika ugyiedi bumomo bɔni unu ndubɔbla antabi aƒo liti ku asɛɛ ebi ku kutu akyala abuni ƒui ani na ukyuli ɔ́ɔkana na úti anumi ɔ́nu dii.

¹⁰Amu na Salomo lɛnɔ údie-nwu kasi ku etela ani udu na ɔɔwia ku ala pii ani na etulo ani na uleku ɔga ɔmmɔ úte-nwu. Na ɔmmɔ kama uleku ɔga ɔmmɔ ku nwuna bakutine básɔ bénwini bésie bana kalɔ lɛlɔ. Na ɔmmɔ kama ni, Ɔga Hiram ɔkɔlɔ bakane béti sika ugyiedi ku egyii abuni kpakplaa udu ɔdi ku aseebi ani náƒɔ kuye geen básiku Oƒir béboku-nwu. Na Salomo úti ugyii ɔmmɔ na ɔ́bla lɛgba kasiakɔ ubili úte kakpakɔ ku ɔga kesii kammɔ. Na ɔ́nwi lɛbentaa ku agyala bamba lɛnɔ úte agyangba bagyane bammɔ. Na bátabla lɛla lɛmɛni udu na Yuda.

¹³Na lɛkwa ndi lɛkwa ni, Salomo ɔɔƒɔ́ sika ugyiedi aani antabi aƒo eti alɔ unu

¹⁴na balaka lɛla lɛni mɔɔsí beyedine ku bani mɔɔsíku ala limomo ɔlɔgyu teebeye kudɔ. Lɛni kani na Arabiaƒuɔ ɔga ku Israel aban bagadine lɛnɔ beeboku-nwu sika ugyiedi ku ɔƒualadi.

¹⁵Amu na Salomo ɔ́bla kayi agyumanala eti ene ku sika ugyiedi na ɔdi biala udu ubo antabi lɛkyami linwi ku akɔkɔ anyɔ unu.

¹⁶Na ɔ́sɔ ɔ́bla ani na ese blii suɛ etulo ammɔ udu eti aku na anya lɛnɔ ɔdi biala unu ubo antabi lɛkyami kakɛ unu na úti anya úse ɔtɔ bonwu ɔni baalɔ banii Lɛku Ɔtɔ kemmo na ɔga kesii mmɔ.

¹⁷Na nwuna lɛgaboku ni, atu ɔtunkpɛ na béti bábla-ni na bákwaa-ni ku sika ugyiedi.

¹⁸Na libo lɛgba kanyakɔ kani ndanku liboku lɛmmɔ kesii kani na baasia enu na sika ugyiedi na béti bábla-ka. Na bábla gyata kavɔ udu bálɛ lɛgaboku lɛmmɔ ɔƒɛnyi ɔni ku ɔni.

¹⁹Na bagyata kavɔ udu bamba balɛ lɛgba kanyakɔ libili ɛku lɛni néti lɛ́kɔ lísie lɛgaboku lɛmmɔ kudɔ ɔƒɛnyi ɔni ku ɔni. Na bebo leevu-inyɔ. Na lɛgaboku lɛdi lɛsɔ liiibo kayawi kamɛni na lise aani Salomo lɛdi lɛmmɔ.

²⁰Salomo lɛɛƒɛɛ ku akyami ani nsi Lɛku Ɔtɔ ɔmmɔ kemmo, ɔsika na uwi ɔmmɔ kemmo ni, sika ɔƒualadi ɔɔɔdi lɛla lɛdi.

²¹Na uwi ɔmmɔ kemmo ni, Salomo ubo lɛkɔlɔ libendi pii lɛni muusié ketu lɛlɔ teete-nwu. Na akwa atɛ biala kemmo ni, ɔɔtala na beeti-ni ku Ɔga Hiram lɛkɔlɔ na beesié ntu anumi na beesié teetéti sika ugyiedi ku sika ɔƒualadi ku atunkpɛ ku bagyii ku baasɛ bonwu badi muubimi lɛlɔ si beesié teeboku-nwu.

²²Na sɔsɔ ni, Salomo nádi ɔlakɛne ubendi ɔnundane unengudi ƒui utulo na kayawi.

²³Na lɛkwa ndi lɛkwa ni, baga bamba beebo teebenu lɛnunda etemila ani na Katɔti ute Salomo na nwuna kudɔ. Na beeboku-nwu etela aani sika ugyiedi ku ɔƒualadi ku adala ku ekpola ku kutu akyala ku bapɔnkɔ ku bebuo ala betine.

²⁵Salomo ubo bapɔnkɔ kɔkyakɔ ku bapɔnkɔ kɛɛkɛ mpim ine bani na bákya-nwu Yerusalem ku lɛma bamba lɛnɔ kemmo.

²⁶Amu na ɔ́di kayawi kemodi kammɔ lɛlɔ ɔ́si Euƒrate Ketu na kalɔ kammɔ katɔ kakɛ útédu Ƒilistia na kada kakɔ na Egyipteƒuɔ ɔmii lɛlɔ.

²⁷Na Salomo lɛgadi uwi ni, ɔ́ya na sika ɔƒualadi ɔ́bu na Yerusalem aani atabi. Na ɔ́ya na bálɛ sida egyii na émomo geen aani kɔnwingyie egyii ani nábu akya Yuda abi kaƒɔna mmɔ.

²⁸Na Salomo bapɔnkɔ bammɔ ni, nwuna beyedine néye-ma básiku Egyipte ku kɔlɔ bamba lɛlɔ.

²⁹Na lɛla bamba biala na Salomo ɔ́bla ni, bénweni-mi bákya Kenye Udiene Natan ala alɛdi ɔku kemmo ku Ahiya ɔni na ɔ́si Silo ku Ido ɔni nénweni ala ɔ́siku Yeroboam ɔni nási Nebat.

³⁰Ka Salomo ɔ́di lɛga na Yerusalem akwa aavlene kama ni,

³¹úbekpi na báva-nwu na Dawid ɔma unengudi kemmo. Na ubidi ɔnanabi ɔni baalɔ banii Rehoboam únwini ɔga.