Read Lelemi Esra 4 Bible Online

Esra 4 - Lelemi bible

Esra 4

¹Uwi ɔni na bekisine bani nási Yuda ku Benyamin bénu ka bekyuli bani kekpo kéƒie-ma bénwini bébo mmɔ bakya baatú kakpakɔ bete Unwoti ɔni ndi Israelƒuɔ Katɔti ni,

²bésie Serubabel ku Israelƒuɔ lɛtɔ benengu kudɔ na básu-ma banini, “Bɛya na bubebunku-mii na bɔtu kakpakɔ kammɔ. Ɔsika Katɔti ɔni bɛɛbu ni, anwu kani na abu lɛnɔ bɔɔbu. Na búuse kalɔ bɔɔbla akpala teete-nwu ɔ́si uwi ɔni na Asiriaƒuɔ Ɔga Esarhadon ɔ́ya na bubo bɔ́kya-nwu kudɔ.”

³Amu na Serubabel ku Yesua ku Israel lɛtɔ benengu bammɔ bédie kenye banini, “Biiibo kuƒi ka bibebunku-bu na ɔtɔ ɔni bɔɔtu bute bula Katɔti kemmo. Abu kani bɔdu bɔkana na bɔtu ɔtɔ ɔmmɔ bute Unwoti ɔni ndi Israelƒuɔ Katɔti aani kalɛ na Persiaƒuɔ Ɔga Kores úbo-bu ɔda.”

⁴Ɔmmɔ kama bekyuli bani na belie bede-ma bákya ɔkplu ka baƒɛ Yudaƒuɔ enu. Na baya liƒu liduo-ma kemmo na bada ɔtɔ ɔmmɔ bɔtu baya.

⁵Na báwia egulabi béte bekyuli badi kalɛ benye betile kabla kammɔ. Na bétile-ma ulu lɛni laa ɔ́si Persiaƒuɔ Ɔga Kores lɛga bɔdi uwi útédu Ɔga Dario uwi.

⁶Uwi ɔni na Ɔga Ahasweros úse kalɔ ɔɔdi lɛga ni, bekyuli badi bátáda Yudaƒuɔ ku Yerusalemƒuɔ kenye bátina-nwu.

⁷Na ɔ́si uwi ɔni na Ɔga Artasasta ɔɔdi lɛga na Persia kalɔ lɛlɔ ni, Bislam ku Mitradat ku Tabeel ku nwuna bekyuli badi bénweni ɔku béte Artasasta. Na bénweni ɔku ɔmmɔ na Siria kunweni kemmo na bédie-nwu kalɔ na Siria lɛdi kemmo.

⁸Na Rehum ɔni ndi bekpone ɔtɔnkune ku Simsai ɔni ndi unwenine bénweni ɔku bémene Artasasta na báda Yerusalem kenye banini,

⁹“Ɔmɛni ɔ́si Rehum bekpone ɔtɔnkune ku Simsai ku bana bakpana ku litemi batɛne Dina ku Aƒarsatka ku Tarpela ku Aƒarsa ku Arkewa ku Babel ku Susan ku Deha ku Elam

¹⁰ku bekyuli bani na Asnapar ɔni náƒɔ lɛnyi mmɔ ɔ́bɔku, na úti-ma útákya Samaria ku bakladi bani nkya ketu ɔvi kudɔ.”

¹¹Na ɔku ɔni na béti bémene Ɔga Artasasta kemmo etemila ndi amɛni. “Ɔ́si ƒula kabla bablane banana bani nkya ketu ɔvi kudɔ.

¹²“Bɔɔyɔ́ ka ɔga ɔti ka Yudaƒuɔ bani nási ƒula kudɔ na bébo-bu kudɔ, bésie bákya Yerusalem na básɔku likyulikpi ku atuɔkplu ɔma unengudi ɔmmɔ baatú. Na básɔku nwuna awodu lɛnɔ baatú. Na benye baaklibi ekpo ekpo ani na ébie lɛnɔ.

¹³“Na bɔɔyá na asɔ ati ka, si básɔku ɔma unengudi ɔmmɔ bátu ku nwuna awodu ni, bekyuli bammɔ basɔ baaadubo kuyii kɔni na ékulo éte-ma bɔƒɔ. Na ɔma kavumi kadubo bɔbwɛ.

¹⁴“Ɔsika bula ƒui bubo kuƒi ka bɔnu ka ƒula lɛgadi liisié anumi. Na bulayɔ ka ala amɛni udu ataalɛ. Ɔmmɔ ɔsu bɔɔyɔ́ ka

¹⁵ebo ɔda na bawia ƒula bati kuuku kɔkunkɛ kemmo banu. Si ábla lɛni ni, adubɔnu bɔti ka ɔma unengudi ɔmɛni ni, ɔdi atuɔkplu ɔma. Na ɔ́si kukuuku ƒui ni, ɔɔta teenye bagadine lɛlɔ. Na bekyuli bammɔ bɔda bubo ɔkplu. Na ɔmmɔ ɔsu ɔlɛka bayila ɔma ɔmmɔ udu.

¹⁶“Anwuɔsu bɔɔnu ka si áya na básɔku ɔma unengudi ɔmmɔ ku ana awodu bátu ni, bula ɔga ɔbune, asɔ alakana ɔvi ɔmmɔ lɛlɔ bɔnu.”

¹⁷Amu na ɔga ɔmmɔ údie kakunkɛ kani bénweni-nwu kenye na úti úmene ɔnii, “Rehum ɔni ndi bekpone unengu ku ɔku unwenine Simsai ku nwuna bekyuli bakladi bani nli Samaria ku ketu ɔvi ƒui bɔɔkya-mii kenye.

¹⁸“Ɔku ɔni na bíti bímene-bu mmɔ ni, báka na bédie-nwu kalɔ na mina anumi.

¹⁹Líbo ɔda na báwia bati kuuku kɔkunkɛ kemmo na bɔ́nu bɔ́ti ka ɔma unengudi ɔmɛni ɔ́si kuuku ƒui ni, bébo atuɔkplu na báata teenye bagadine lɛlɔ.

²⁰Na Yerusalem ɔdi kalɔ kani na baga bani na bebo ɔkplu báadi-ka lɛlɔ dii. Na bátaaƒɔ kuyii teete-ma.

²¹“Anwuɔsu bibo bekyuli bammɔ ɔda na bada kabla kammɔ baya, kalɛ na basɔ balátu ɔma ɔmmɔ utédu ka básɔ béte kuƒi.

²²Na bɛnu kaduɛ kalɛ na beledie litemi lɛmɛni atu na likpidi lɛdi lilebo-mi lɛlɔ.”

²³Ka báka Ɔga Artasasta ɔku ɔmmɔ béte Rehum ku ɔku unwenine Simsai ku bakladi pɛ, kani na bésie Yudaƒuɔ bani nkya Yerusalem na bénye-ma lɛlɔ ka bada kabla kammɔ baya.

²⁴Ɔmmɔ ɔsu Katɔti kaduli bɔtu na Yerusalem údi únye útédu lɛkwa linyɔdi lɛni lɛlɔ na Ɔga Dario ulie liboku lɛlɔ.