Read Lelemi Esra 5 Bible Online

Esra 5 - Lelemi bible

Esra 5

¹Uwi ɔmmɔ kemmo ni, Kenye Udiene Hagai ku Sakaria ɔni ndi Ido ubidi bése kalɔ baatɛmi teete Yudaƒuɔ bani nli Yerusalem.

²Amu na Sealtiel ubidi Serubabel ku Yosadak ubidi Yesua bénu bana etemila ani baasu mmɔ, na básɔ bése kalɔ báatu Unwoti kakpakɔ na Yerusalem. Na kenye bediene inyɔ bammɔ béte-ma kebunku.

³Uwi ɔmmɔ kemmo kani ni, kalɔ lɛlɔ ɔdine Tatenai ɔni mɔɔnu ketu ɔvi bekyuli lɛlɔ ku Setar-Bosnai ku nwuna kabla bablane bébo Yerusalem na béye-ma banini, “Ɔma néte-mii kuƒi ka bɛtu kakpakɔ kamɛni ku nwuna awodu?”

⁴Na béye-ma lɛnɔ bekyuli bani ƒui nkya muute-ma kebunku na kakpakɔ kammɔ bɔtu anyi.

⁵Nsu Unwoti anumi asia Yudaƒuɔ benengu bammɔ lɛlɔ, na bátaya na bada bɔtu baya utédu ka béte Ɔga Dario bɔti. Na báƒɔ nwuna kenye budie na kakunkɛ lɛlɔ.

⁶Na kenye kamɛni na kalɔ lɛlɔ ɔdine Tatenai ɔni mɔɔnu ketu ɔvi bekyuli lɛlɔ ku Setar-Bosnai ku nwuna kabla bablane béti bémene ɔga ɔmmɔ na kakunkɛ lɛlɔ.

⁷“Ɔga Dario, keyi kayɔku-ɔ na ƒula lɛga lɛni na aadi kemmo.

⁸“Bula ɔbune, bɔɔyɔ́ ka bute-ɔ bɔti ka bútésie bɔ́vi Yuda kalɛkɛ, na bɔ́nu ka básɔku Unwoti Ɔyikune kakpakɔ baatú. Na bákɔliku atabi ebendi ku kugyiikɛ básia awodu lɛlɔ. Na si ánu adubɔti ka baabla kabla kammɔ kaduɛ na keesíe anumi.

⁹“Amu na búye batɔnkune bammɔ bɔnii basu-bu ukyuli ɔni néte-ma ɔyikun ka basɔku kakpakɔ kammɔ ku ana awodu batu.

¹⁰Na bɔ́sɔ búye-ma bana anyi kalɛ na bɔkɛ benengu bammɔ anyi na buti anyi ammɔ bumene-ɔ.

¹¹“Amu na bédie kenye banini, ‘Bɔdi Katɔti ɔni nédie katɔ ku kalɔ kabla bablane. Na Unwoti kakpakɔ kani na Israelƒuɔ ɔga ɔdi ɔni mbo ɔyikun ɔ́tu dii ni, bɔ́sɔku ka bɔɔtú.

¹²Nsu ka bula bati kuuku bákya Katɔti ɔni nédie katɔ ku kalɔ kɔnyi ɔsu ni, ɔ́ya na Ɔga Nebukadnesar ɔni ndi Babilonƒuɔ ɔga na ɔdi Kaldeani úbegyingya kakpakɔ kamɛni na ɔ́yila-ka udu. Na úti bula bekyuli útákya Babilonƒuɔ kalɔ.

¹³“ ‘Nsu na lɛkwa lideedi lɛni na Ɔga Kores ɔɔdi lɛga na Babilon ni, Ɔga Kores ɔmɛni úte kakunkɛ na úbo ɔda ka bɔsɔku Katɔti kakpakɔ bɔtu.

¹⁴Na ɔga ɔmɛni muedi ni, ɔ́mami sika ugyiedi ku ɔƒualadi ɔni béti bámana Babilonƒuɔ kakpakɔ ɔtɔ ka beti batu Katɔti kaduli. Na sika ugyiedi ku ɔƒualadi ɔmmɔ na Nebukadnesar úti ɔ́siku Yerusalem kakpakɔ na úti útése Babilonƒuɔ kakpakɔ. Na Ɔga Kores úti sika ala ammɔ úte ɔnana ɔni baalɔ bani Sesbasar. Ɔsika anwu na údie aban ɔgadine ka utaanu Yuda kalɔ kammɔ lɛlɔ.

¹⁵Na Ɔga Kores ɔmmɔ ɔ́su-nwu ka ɔsɔku sika ala ammɔ utése Yerusalem kakpakɔ na ɔsɔku-ka ɔtu. Na kesii kani na bátu-ka kudeedi mmɔ.

¹⁶Anwuɔsu Sesbasar ɔmmɔ úbo na úbeseku ɔtɔ ɔmmɔ kalɔ ku bɔtu. Na ɔ́si uwi ɔmmɔ úbedu ɔƒɛni ni, ɔtɔ ɔmmɔ kabla kammɔ kenye kpakplaa, nsu bútawɔlɔ tɔ bɔtu.’

¹⁷“Ɔƒɛni ni, Ɔga Ɔbune, ya na bekyuli beduo kɔkunkɛ kɔni nse ɔga kaduli na Babilon na bawia si Ɔga Kores úbo ɔda dii ka basɔku Yerusalem kakpakɔ kammɔ batu. Na ete-bu bɔti na aya bɔti ƒula kasusu lɛnɔ na litemi lɛmɛni lɛlɔ.”