Read Lelemi Esra 7 Bible Online

Esra 7 - Lelemi bible

Esra 7

¹Na ala amɛni kama ni, uwi ɔni na Ɔga Artasasta ɔɔdi lɛga na Persia ni, okloƒu ɔdi ɔkya na baalɔ banii Esra. Na nwuna ɔti ndi Seraia ɔni ɔti ndi Asaria ɔni ɔti ndi Hilkia

²ɔni ɔti ndi Salum ɔni ɔti ndi Sadok ɔni ɔti ndi Ahitub ɔni ɔti ndi

³Amaria ɔni ɔti ndi Asaria ɔni ɔti ndi Meraiot

⁴ɔni ɔti ndi Serahia ɔni ɔti ndi Usi ɔni ɔti ndi Buki

⁵ɔni ɔti ndi Abisua ɔni ɔti ndi Pinehas ɔni ɔti Eleasar ɔni ɔti ndi Aaron ɔni ndi Ɔkpane Unengudi.

⁶Na Esra ɔmɛni lɛnɔ ɔ́si Babilon úbo. Na ɔdi ala ɔtinane ɔni ngyi Mose ɔda bubo etemila ani Israelƒuɔ Katɔti úti úte-ma kaduɛ. Na lɛla biala na úye ɔga ɔmmɔ ni, uuti-ni teete-nwu, ɔsika nwuna Unwoti Katɔti ɔsiku-nwu geen.

⁷Na Israelƒuɔ badi bani ndi bakpane ku Lewiƒuɔ ku lɛnu batune ku kayakun bagyumanane ku Kakpakɔ kabla bablane badi básiaku-nwu bébo Yerusalem mmɔ na lɛkwa maatɛdi lɛni na Ɔga Artasasta úlie liboku lɛlɔ mmɔ kemmo.

⁸Na Esra úduo Yerusalem na kɔbuli kɔlɔndi na ɔga ɔmmɔ lɛga bɔdi lɛkwa maatɛdi kemmo.

⁹Úse nwuna ulu busie kalɔ ɔ́siku Babilon na limeyi lideedi na kɔbuli kudeedi kemmo, na útéduo Yerusalem limeyi lideedi na kɔbuli kɔlɔndi kemmo, ɔsika nwuna Katɔti ndanku-nwu geen ɔkɛ ku nwuna lɛƒɔndia.

¹⁰Ɔsika Esra úti lɛlɔ úte Unwoti ɔda bubo bɔtɛya ku kalɛ na badi-mu lɛlɔ, na ɔɔtina ala ammɔ na Israel.

¹¹Na ɔku ɔni na Ɔga Artasasta únweni úte Esra ɔni ndi ala ɔtinane ku ɔkpane ku okloƒu ɔni ngyi Unwoti ɔda bubo ku ala ani ƒui na únyimi úte Israelƒuɔ kemmo kaduɛ na búdie mɛni.

¹²Ɔmɛni ɔ́si baga ƒui Ɔga Artasasta kudɔ na líti muute Ɔkpane Esra ɔni ndi Katɔ ƒui Katɔti ɔda bubo ala ɔtinane. Mɔɔkya-a kenye.

¹³Ɔƒɛni muubó ɔda ka Israelni biala na ulie mina kalɔ lɛlɔ ku bakpane ku Lewiƒuɔ lɛnɔ ka si ɔdi ɔɔyɔ́ ka ɔsiaku Esra uteesie Yerusalem ni, kuƒi kɔtɛ.

¹⁴Ami ɔga ku mina benengu maatɛ mɔɔtala-a ka teesie Yerusalem ku Yuda na atávi mmɔ bene ƒui na anu kalɛ ƒula Katɔti ɔda bubo ɔku ɔni nkya-a enu kemmo lɛlɔ bɔdi buse na mmɔ.

¹⁵Lɛnɔ ni, si ésela na eti sika ɔƒualadi ku ugyiedi ɔni na ɔga ku nwuna benengu béte-ɔ, na eti esienku Israelƒuɔ Katɔti ɔni keliekɔ ndi Yerusalem mmɔ.

¹⁶Lɛnɔ ni, na eti sika ugyiedi ku ɔƒualadi ɔni ƒui na adubɔkɛ na Babilon kalɛkɛ ku kaƒɔ ƒaa etela ani ƒui na Israelƒuɔ ku bakpane bani nkya mmɔ badubute-ɔ ka eti etébunku bana Katɔti kakpakɔ kani nkya Yerusalem bɔtu.

¹⁷Na ada egulabi ani búti búte-ɔ mmɔ kaduɛ. Na eti eye ɔmantɛ bakɔ ku bakɔ bakɔdi ku baƒonu bakɔdi ku kakpa ku ntɛ na eti abla akpala na Katɔti kakpakɔ lɛkpabi lɛni nkya Yerusalem mmɔ lɛlɔ.

¹⁸Na sika ɔƒualadi ku ugyiedi ɔni mebu ni, akana na awɔ ku ƒula banwani biti bɛbla lɛla na biala bɛɛyɔ́ na lɛkɛnku ƒula Katɔti lɛƒɔyɔ lɛlɔ.

¹⁹Na eti akyami ani búti búte-ɔ ka beti bataabla Kakpakɔ kammɔ ala ete Katɔti.

²⁰Na lɛla bamba biala na aawia ka abla na Kakpakɔ kammɔ lɛlɔ ni, na edie asiku ɔga egulabi kavumi kammɔ kemmo.

²¹Ami Ɔga Artasasta muubó ketu ɔvi egulabi badane bammɔ ƒui ɔda ka lɛla biala na Ɔkpane Esra ɔni ndi Katɔti ɔda bubo ala ɔtinane ɔɔwia ɔsiku-mii kudɔ

²²ɔ́si sika ɔƒualadi antabi aƒo bonwu avlaatɛ unu ku kakpa akyami eti leevu ku ntɛ lɛsii eti leevu ku nnɔ lɛsii eti leevu ku mma bumomo kalɛ biala na ɔɔwia ni, bite-nwu.

²³Na bɛsia anu kaduɛ na bite lɛla biala na Unwoti ɔni nkya Katɔ ɔ́su úse ka beti babla nwuna kakpakɔ lɛlɔ kabla siin lɛni kani, kalɛ na ulákɛ kɔnyi ulakya-mi iye ukyuli ɔni melie-mi kenye.

²⁴Na mɔɔyá na bɛti ka ukyuli biala uuubo kenyekɔ kadi na ɔƒɔ kuyii ɔsiku bakpane iye Lewiƒuɔ iye kabla bablane iye ukyuli biala ɔni mɔɔbla kabla kadi na kakpakɔ kammɔ kemmo kudɔ.

²⁵Na awɔ, Esra, ti lɛnunda lɛni na ƒula Katɔti úte-ɔ na awia litemi batɛne bani ngyi ƒula Katɔti ɔda bubo bɔmmɔ lɛlɔ ala na bataatɛ ketu ɔvi badi bammɔ litemi. Na bani na baaagyi ɔda bubo bɔmmɔ lɛnɔ ni, na atina-ma ala.

²⁶Na ukyuli ɔni na uládi ƒula Katɔti ɔda bubo bɔmmɔ lɛlɔ iye ɔga ɔda bubo lɛlɔ ni, ɔlɛka badu-nwu iye babɔku-nwu balɛku kalɔ kammɔ lɛlɔ iye beti kɔnu basia nwuna akɛla ƒui lɛlɔ iye bakya-nwu ɔtɔ kɔnakunwi.

²⁷Amu na Esra úmwi Katɔti ɔnini, “Bemwi Unwoti bula bati kuuku Katɔti ɔni néti lɛla lɛmɛni ɔ́kya ɔga kayi kemmo kalɛ na ɔsia ulu ɔmɛni lɛlɔ na úti ɔbu úte Unwoti kakpakɔ na Yerusalem.

²⁸Na ɔ́bla-mi lɛƒɔndia na ɔga ɔmmɔ ku nwuna kasusu bakyane ku nwuna benengu bayikune bammɔ ƒui anumi. Na ɔkɛnku ɔmmɔ ɔsu na líse kayi na lítiku Israel batɔnkune na básiaku-mi na bɔ́kɔ búsie Yerusalem.”