Read Lelemi Esra 9 Bible Online

Esra 9 - Lelemi bible

Esra 9

¹Uwi ɔni na báwɔlɔ ala ammɔ ƒui bɔbla ni, Yudaƒuɔ benengu badi bábasu ami Esra banini, “Israelƒuɔ ku Lewiƒuɔ ku bakpane bani nli mɛni lɛnɔ bebunku bekyuli bani nátamami lɛlɔ bétedie bekyuli bani lɛma nkya bula amadɔ aani Kanaanƒuɔ ku Hitiƒuɔ ku Perisiƒuɔ ku Yebusiƒuɔ ku Amonƒuɔ ku Moabƒuɔ ku Egyipteƒuɔ ku Amoriƒuɔ ala bɔbla ani muusé lɛlɔ mmɔ kudɔ.

²Na Yudaƒuɔ ku bani naaadi Yudaƒuɔ béeti lɛlɔ. Ɔmmɔ ɔsu Katɔti bekyuli kedee bénwini bekyuli bani néti lɛlɔ básala ku kadi bamba bekyuli. Na benengu bammɔ ku bakutine bammɔ geen ntɔnku udu buɛ ɔmmɔ bɔbla na bálɛ litemi geen lɛmmɔ kama.”

³Amu ka línu ɔmɛni ni, lɛ́ni mina awu lɛ́bwɛ na lɛ́gyɔ mina lili linwini ku ukwi! Na lɛ́yu lílie kalɔ ku bɔyia geen ku kɔnyana.

⁴Na bekyuli bani ƒui mbo bɔyia bete Israel Katɔti litemi báni béde-mi, na bekyuli bani kekpo kéƒie na báka bunwini bubo litemi lɛlɔ tadi ku ɔbladu buɛ ɔmɛni ɔsu. Kɔnyana ku bɔyia bɔmɛni kemmo na lɛ́ƒɔ mmɔ bulie útédu useyi akpala bɔbla uwi.

⁵Uwi ɔni na useyi akpala bɔbla uwi údu ni, lɛ́ta na kesii kani na lɛ́yu líwi mmɔ. Nsu na mmu nkya lɛwu lɛni nábuɛ mmɔ. Na lɛ́lɛ akɔnkɔ na lɛ́talaku mina enu katɔ na lɛ́kpali Unwoti Katɔti.

⁶Na lɛ́su-nwu nnini, “O mina Katɔti, kɔƒa kuukpó-mi ka lɛtalaku mina anumi katɔ muedi na ƒula anumi. Ɔsika bula ekpidi áakuku etulo-bu na ákuku laa na éedu katɔ.

⁷Na ɔ́si bula bati kuuku uwi úbedu ɔƒɛni ni, abu bani ndi ƒula bekyuli bɔ́bla likpidi bonwu geen. Na ɔ́si bula ekpidi ɔsu ni, bula baga ku bula bakpane béduo baga babambadi enu kemmo. Na bádu badi na béƒie badi ala báƒɔ, na béƒie badi lɛnɔ bátɔlɔku, na búduo kɔƒa kubendi kemmo aani kalɛ bɔmu buse ɔmwi.

⁸“Na ɔƒɛni uwi klukui kama mɛni ni, O Unwoti ɔni ndi bula Katɔti, ánu-bu kɔnyana na áya na bula ɛlɛɛ badi búbu, na bɔ́kɛ kakyakɔ kabuni aani ƒula kɔtɔma kedee. Awɔ náya na bula anumi ásɔ ékeye na bɔ́kɛ bɔnwuna bɔ́siku bekyuli bamba lɛlɔ bɔdi kalɔ.

⁹Ina ka bɔdi bekyuli bamba kabla bablane ni, awɔ Katɔti átanyonu-bu átakya bekyuli bamba lɛlɔ bɔdi lɛbibo lɛmmɔ kemmo. Mmomu ánu-bu ku lɛƒɔndia na Persiaƒuɔ baga anumi na éte-bu ngba bɔwɔdi kalɛ na bɔsɔku Katɔti kakpakɔ bɔtu na bɔtalaku atɔnku ammɔ. Na awɔ nátu bɔgyumana awodu ɔ́mana-bu na Yuda ku Yerusalem.

¹⁰“Nsu ɔƒɛni ni, O Katɔti, bi na bɔdubɔsu na ala ani ƒui nálɛ mɛni lɛlɔ? Bula ƒui bútabu ƒula ɔda bubo

¹¹bɔni na éti ásiaku ƒula kabla bablane bani ndi ƒula kenye bediene lɛlɔ anini, ‘Kalɔ kani kemmo na bísela buduo na biti-ka binwini bina kadi mɛni ni, bekyuli bani nákya-ka kemmo bébile-ka ku bana likyulikpi ala bɔbla na ala ani muusé lɛlɔ áƒɔ-ka ƒui tɛɛ ɔ́si ɔvi unwi úsie ɔkladi.

¹²Ɔmmɔ ɔsu biteti bina bebi belekubi bitete-ma na beti iye bɛya na bina bakloƒu beti bana belekubi. Na bitawia ulu ɔdi na amii ku ama bɛbla unwi na ulu ɔdi lɛlɔ. Na bɛdubɔkɛ ɔlɔkplu na bɛdi ala abuni ani nkya kalɔ kammɔ kemmo na bise bina bebi ku bawɔ kama úsela uwi ƒui.’

¹³“Ala ani nálɛku-bu ƒui ni, ɔkɛnku bula likyulikpi ku alaekpidi bonwu ani na bɔ́bla ɔsu na úbo-nwu kemmo lɛni. Nsu awɔ bula Katɔti átani-bu kɔtu kɔni námanku bula ekpidi na áya na bula akɔ badi búbu bulie ngba.

¹⁴Na bi ɔsu na ɔlɛka bɔsɔ budie ƒula ɔda bubo atu lɛnɔ na abu ku bekyuli bekpidi bamɛni buteeti lɛlɔ? Si bɔ́bla lɛni ni, adubuti kɔnyi akya-bu geen na ayila-bu udu ƒui ɔni na ina ukyuli unwi pɛ ulelie ngba.

¹⁵O Unwoti, Israel Katɔti, ese siin! Na ɔmmɔ ɔsu na bula ɛlɛɛ bamɛni búbu bɔkya ngba ɔmwi. Aanu-bu nnye ƒula anumi ku bula bɔsɔ ina ka nka bula akɔ ɔdi ulakana-a anumi bɔda bɔlɛ.”