Read Lelemi Nehemia 1 Bible Online

Nehemia 1 - Lelemi bible

Nehemia 1

¹Hakalia ubidi Nehemia etemila na adi mɛni. Na lɛkwa aavlanyɔdi kɔbuli leevu-kunyɔdi kemmo ni, na lɛ́kya kagyumanakɔ kpakplaa kadi na ɔma unengudi ɔni baalɔ banii Susan kemmo.

²Mina ɔnwani ɔni baalɔ Hanani ku bekyuli bamba badi bási Yuda bébo-mi kudɔ. Mmɔ na líye-ma Yerusalem ku Yudaƒuɔ bakladi bani béteƒie na kekpo kammɔ kemmo lɛlɔ.

³Amu na bédie kenye ka bani nébu na bátakana-ma buƒie mmɔ bakya lɛbibo ku kɔƒa bonwu kɔdi kemmo geen. Ɔsika Yerusalem awodu ani na áka ámana ɔma ɔmmɔ ƒui áƒɛ éwi kalɔ. Na bákyula ana kɔyakun lɛnɔ.

⁴Amu ka línu etemila amɛni ni, lílie kalɔ emeyi adi na líwulo kɔnyana na línyimi kenye na lívele Unwoti ɔni nkya katɔ na lɛ́kpali-nwu.

⁵Na lɛ́su nnini, “O Unwoti Katɔti ɔni nkya katɔ, ébomo na ebo ɔyikun na ámanku ka bɔyia-a. Na adi Ati ɔni na eeti bɔyɔ taadi ƒula bunyimi lɛlɔ teete bekyuli bani na aayɔ́ ka baadi ƒula ɔda bubo lɛlɔ ɔsu.

⁶Anwuɔsu buvele nda-a, se atu na ebimi anumi, na enu ami ƒula kabla ɔblane bɔkpali bɔni na mɔɔkpali-ɔ usien ku ɔƒɛ na ƒula kadi bekyuli Israelƒuɔ lili. Unwoti buvele muudie alaekpidi ani na ami ku mina kaduli bekyuli ku Israelƒuɔ ƒui bɔ́bla kalɔ ka eti-nya kyiɛ-bu.

⁷Ɔsika bɔ́bla likyulikpi bɔ́kya-a. Na bútadi Mose ɔda bubo bɔni na éte-bu mmɔ lɛlɔ.

⁸“Na enyimo ɔda ɔni na ébo ƒula kabla ɔblane Mose ásu anii, ‘Si bítabla ala bítasiaku ulu lɛlɔ ni, ndubo-mii bɔbɔku butákya kadi bamba bekyuli akɔ.

⁹Nsu si bínwini bíbo-mi kudɔ na bɛɛdi mina ɔda bubo lɛlɔ ni, ina kekpo kéƒie bina bekyuli kátákya ɔgyu kakaaka muedi ni, ndubɔsɔku-ma mbasala. Na basɔ benwini bebo kesii kani na lɛ́ƒuna líse ka bataakpa-mi mɛni.’

¹⁰“Anwuɔsu muuvele-ɔ ka ƒula bekyuli ku kabla bablane na badi na awɔ néti ƒula ɔyikun bonwu ékpo áƒɔ-ma.

¹¹Ɔmɛni ɔsu, O Unwoti, se atu na enu ƒula kabla ɔblane ku ƒula kabla bablane bani mɔɔbu ƒula lɛnyi bɔkpali. Na ɔmwi kadi kamɛni ni, na ɔga ɔmmɔ ɔnu-mi kɔnyana na etemila ani ndubo bɔda bɔva-nwu anumi lɛlɔ.” Uwi ɔmmɔ kemmo ni, ami Nehemia nátaaƒɔ ntɛ teete ɔga ɔmmɔ.