Read Lelemi Nehemia 10 Bible Online

Nehemia 10 - Lelemi bible

Nehemia 10

¹Na bekyuli bani nákya bunyimi bɔmmɔ kɔnu kalɔ ndi bamɛni. Kalɔ lɛlɔ ɔnune Nehemia ku Hakalia ubidi Sedekia

²ku Seraia ku Asaria ku Yeremia

³ku Pashur ku Amaria ku Malakia

⁴ku Hatus ku Sebania ku Maluk

⁵ku Harim ku Meremot ku Obadia

⁶ku Daniel ku Gineton ku Baruk

⁷ku Mesulam ku Abia ku Miyamin

⁸ku Maasia ku Bilga ku Semaia. Bamɛni ndi bakpane bani nákya kɔnu kalɔ.

⁹Na Lewiƒuɔ ndi bamɛni. Asania ubidi Yesua ku Binui ɔni ɔdi Henadad ubidi unwi ku Kadmiel

¹⁰ku bana banwani bani ndi Sebania ku Hodia ku Kelita ku Pelaia ku Hanan

¹¹ku Mika ku Rehob ku Hasabia

¹²ku Sukur ku Serebia ku Sebania

¹³ku Hodia ku Bani ku Beninu.

¹⁴Bekyuli bammɔ batɔnkune ndi bamɛni. Paros ku Pahat-Moab ku Elam ku Satu ku Bani

¹⁵ku Buni ku Asgad ku Bebai

¹⁶ku Adonia ku Bigwai ku Adin

¹⁷ku Ater ku Hesekia ku Asur

¹⁸ku Hodia ku Hasum ku Besai

¹⁹ku Hariƒ ku Anatot ku Nebai

²⁰ku Magpias ku Mesulam ku Hesir

²¹ku Mesesabel ku Sadok ku Yadua

²²ku Pelatia ku Hanan ku Anaia

²³ku Hosea ku Hanania ku Hasub

²⁴ku Halohes ku Pilha ku Sobek

²⁵ku Rehum ku Hasabna ku Maaseia

²⁶ku Ahia ku Hanan ku Anan

²⁷ku Maluk ku Harim ku Baana.

²⁸Na bekyuli bani ndi bakpane ku Lewiƒuɔ ku kakpakɔ bagyumanane ku kakpakɔ lɛnu batune ku kakpakɔ kabla bablane ku bekyuli bamba bani mɔɔdi Katɔti ɔda bubo lɛlɔ na bámami lɛlɔ bédie baƒɔ bani nkya bula kalɔ lɛlɔ ku abu ku bula beleku ku bula bebi bani náada anu ni,

²⁹buse kenye bɔɔsála ku bula batɔnkune ka ewida asiaku-bu si bɔ́ta búnye ɔda bubo bɔmɛni lɛlɔ. Na bɔɔsu ka bɔdubɔdi Katɔti ɔda bubo bɔni na úti ɔ́siaku nwuna kabla ɔblane Mose lɛlɔ. Na lɛla biala na Unwoti ɔni ndi bula Katɔti úbo-bu ɔda ni, bɔdubɔdi-nwu lɛlɔ kalɛ na Katɔti ɔɔwia.

³⁰Na buláya na bula bebi beetí iye belieku baƒɔ bani nkya-bu akɔ.

³¹Na si bula ala beyene beti bana ala iye edula ebi bebeye bete-bu lɛnwuna limeyi iye limeyi kedee lɛdi lɛlɔ ni, buléye bulásiku-ma kudɔ. Na lɛkwa maatɛdi biala lɛlɔ ni, bulatuma kalɔ kammɔ lɛlɔ kalɛ na kakɛ bɔnwuna. Na kayu biala na báda-bu na uwi ɔmmɔ kemmo ni, bɔdubuti bɔkyiɛ.

³²Lɛkwa biala ni, ukyuli biala ɔdubuyi sika ɔƒualadi atabi na buti bubunku kakpakɔ lɛlɔ bɔnu.

³³Na bɔdubo buteete ala ani badubuti bakpa, na anya ndi bodobodo kedee ku edula ebi ani badubuti bataakpa limeyi ndi limeyi ku bebuo bani badubuti babla bɔkyula akpala limeyi ndi limeyi ku akpala ani badubutaawia lɛnwuna limeyi biala ku kɔbuli kɔwɔdi limeyi bɔdi ku emeyi adi mene bɔdi lɛnɔ. Na bɔdubuteete ala ani beetí baabla akpala kedee ku akpala ani meedie Israelƒuɔ ekpidi ku lɛla biala na kakpakɔ kammɔ kadubɔwia.

³⁴Na abu ku bakpane ku Lewiƒuɔ bɔdubutaatu egulabi teenwini lɛkwa biala teeti taawia kaba kani ɔlɛka bawia ekyweni ani badubuti bɔbla bɔkyula akpala teeti teete bula Unwoti Katɔti aani kalɛ na ɔda bubo bɔmmɔ bɔɔsu.

³⁵Na lɛkwa biala ni, bɔdubuteeti bula edula ebi edeedi ku bula adingyii ebi edeedi teesienku kakpakɔ mmɔ.

³⁶Na bula bebi bananabi bani na bula akɔ ɔdi biala ɔdubɔwɔ ni, bɔdubuti-nwu busienku ɔkpane ɔni nkya mmɔ na uti-nwu ɔkya Katɔti enu kemmo. Na lɛnɔ ni, bula ɔmantɛ bakɔ ku baƒonu ku bese ku bebuo bakladi bebi bedeedi bani badubɔwɔ ni, bɔdubuti-ma bɔkya Unwoti enu kemmo.

³⁷Na bɔdubuti bula ɔlaaƒɔ ɔni bɔ́kɛ bɔ́siku bula edula ebi ku adingyii ebi ku nnɔmii ku ntɛ bɔwɔdi busienku kakpakɔ ɔkpane ɔni nkya mmɔ lɛkwa biala na beti babla akpala. Na bɔdubuti bula ala lɛkpa leevudi busienku Lewini ɔni mɔɔví bula akpaklɔ taaƒɔ lɛkpa leevudi lɛmmɔ na likpo biala lɛni na bɔɔbla kabla.

³⁸Na bakpane bani nási Aaron kaba kemmo ku Lewiƒuɔ ɔlɛka basiaku lɛlɔ asa na bataaƒɔ bekyuli bammɔ lɛkpa leevudi. Na kakpakɔ kammɔ ala ni, Lewiƒuɔ badubuti ala buyi bɔmmɔ ana lɛkpa leevudi beteesienku Katɔti kakpakɔ kavumi kemmo.

³⁹Israelƒuɔ ku Lewiƒuɔ ndubo buteeti edula ebi ku ntɛ ku nnɔmii bɔni na bekyuli bammɔ béyi teesienku kakpakɔ kammɔ ala kesekɔ na kesii kani na kakpakɔ kammɔ akyami eesé. Mmɔ ndi kesii kani na kakpakɔ kammɔ bakpane ku bagyumanane ku lɛnu batune bani mɔɔbla kabla uwi ɔmmɔ belie. Na buléni bula Katɔti Kaduli bulése.