Read Lelemi Nehemia 13 Bible Online

Nehemia 13 - Lelemi bible

Nehemia 13

¹Uwi ɔmmɔ kemmo na báka Mose ɔda bubo ɔku momoomo, na ukyuli biala únu. Mmɔ na bánu ka bénweni bákya ka Amonni biala iye Moabni biala útalɛka baƒɔ-nwu bakya Katɔti bekyuli akɔ.

²Ɔsika bekyuli bammɔ béteti adila ku ntu bɔdi bátasiaku Israelƒuɔ. Mmomu buti béteti Bileam ka úbewida-ma. Nsu Bula Katɔti únwini ewida ammɔ ɔ́bla kusɛ kusɛ.

³Na ka bekyuli bammɔ bénu ɔda bubo bɔmɛni ni, báda baƒɔ bani ƒui nkya-ma akɔ bédie bényine sɛsɛɛ.

⁴Na asa na ɔmɛni ábalɛ ni, ɔkpane Eliasib béti bése ka utaanu Unwoti Katɔti ala kesekɔ ɔtɔ lɛlɔ. Na ɔ́si kukuuku ƒui ni, ɔkpane ɔmɛni ɔkpana ndi Tobia.

⁵Anwuɔsu úte Tobia ɔtɔ ubendi ɔni na nka béteeti edula ebi akpala ku oloƒui ku kakpakɔ kabla ala ku etela lɛkpa leevudi lɛni na bekyuli bammɔ beeyi ku ntɛ ku nnɔ bɔni beete Lewiƒuɔ ku kakpakɔ lɛnu batune ku bagyumanane teese.

⁶Nsu uwi ɔni na ala amɛni ƒui aalɛ́ ni, na ami Nehemia liiibo Yerusalem. Na lɛkwa avlaatɛ-linyɔdi lɛlɔ ɔni na Ɔga Artasasta ɔɔdi lɛga na Babilon ni, línwini lísie ɔga ɔmmɔ kudɔ. Na uwi ɔdi kemmo ni, nwuna kudɔ na lívele kuƒi,

⁷na lɛ́tɔlɔ lísie Yerusalem. Mɛni na línu ɔbladu ukpidi ɔni na Eliasib ɔ́kya útaabla na údie ɔtɔ unwi úte Tobia na Unwoti Kaduli na uli-nwu kemmo.

⁸Na ka ńtánu ni, livo líƒi-mi geen, na lɛ́la Tobia ala ƒui líbo líwi keyi.

⁹Na mmɔ kani lɛ́ya na bábla ɔtɔ ɔmmɔ sɛɛn bɔbla ɔdi. Na lɛ́sɔku Katɔti Kaduli ala ƒui ku edula ebi akpala ku oloƒui ńtése Katɔti ɔtɔ ɔmmɔ kemmo.

¹⁰Na lɛ́sɔ línu ka kadikɔ kani ɔlɛka beti bete Lewiƒuɔ béteti bétete-ma. Na Lewiƒuɔ ku kakpakɔ lɛnu batune bani kabla uwi nédu ni, básɔ bénwini bésie bana akpaklɔ.

¹¹Anwuɔsu lɛ́lɔ benengu bammɔ na lɛ́dɔnku-ma na líye-ma nnini, “Bi ɔsu ba béni Unwoti Kaduli bése lɛni?” Amu na lɛ́lɔ Lewiƒuɔ ku lɛnu batune bani nénwini bésie bana akpaklɔ na lɛ́su-ma nnii ɔdi biala ɔsɔ unwini usie uténye nwuna kabla kenye na kakpakɔ mmɔ.

¹²Amu na Israelƒuɔ bése kalɔ beeti bana etela lɛkpa leevudi ku ntɛ bɔwɔdi ku nnɔ teesienku kakpakɔ ala kesekɔ.

¹³Na lɛ́ya na bekyuli bamɛni baanu kakpakɔ ala kesekɔ kammɔ lɛlɔ. Na lɛ́ƒɔ lɛ́di ka bekyuli bamɛni badubo bɔbla bana kabla ulu lɛlɔ na beteete kabla bablane bammɔ ala kalɛ na ɔ́manku. Na bekyuli bammɔ ndi Ɔkpane Selemia ku Ɔku Unwenine Sadok ku Pedaia ɔni nási Lewiƒuɔ kaba kemmo. Na Hanan ɔni ndi Sakur ubidi na ɔdi Matania uwɔ ni, anwu ndi bana ubunkune.

¹⁴Amu na ami Nehemia muuvele Katɔti nnii, “Mina Katɔti, nyimo-mi na kabla kabuni kani lɛ́bla na ƒula kaduli, na taya na kabla keeke.”

¹⁵Uwi ɔmmɔ kemmo ni, lɛ́nu bekyuli ka baabla ntɛ na lɛnwunameyi lɛlɔ na Yuda. Na badi lɛnɔ bákya beeti bana edula ku ntɛ ku adingyii ebi ku ala bamba na bényimi básia bana bebuo ala betine kama. Na líbo-ma ɔda kpakplaa ka ɔdi úteti nwuna lɛla lɛdi utéye lɛnwunameyi lɛmmɔ lɛlɔ.

¹⁶Na banana badi bási Tiro ɔma unengudi na belie Yerusalem na béti kɔkpaku ku ala eyedi lidu lidu pii béboku Yerusalem ka beti bebeye bete bula bekyuli na lɛnwunameyi lɛlɔ.

¹⁷Amu na lɛ́dɔnku Yudaƒuɔ benengu bammɔ. Na lɛ́su-ma nnii, “Bi likyulikpi ala benye baabla mɛni? Na bɛɛyá na lɛnwunameyi lɛmɛni lɛɛlɛ́ ɔbu?

¹⁸Lɛni kani na bina bati kuuku bábla ɔsu na Katɔti ɔ́ni-ma kɔtu. Na ɔ́ya na Yerusalem ɔma unengudi ɔmɛni ɔ́yii udu. Na bɛsɔ binye kpakplaa ka Katɔti kɔnyi kɔsɔ kɔyu kubo abu Israelƒuɔ lɛlɔ ɔkɛnku ɔbu ɔni na biléte lɛnwunameyi ɔsu.”

¹⁹Ɔmɛni ɔsu líbo-ma ɔda ka bataakalɛ Yerusalem kɔyakun ƒui limeyi biala useyi ɔni na lɛnwunameyi liise kalɔ. Na batalɛmi-ku wetédu ka badi lɛnwunameyi lɛmmɔ bawɔlɔ. Na lídie mina bekyuli badi ka bataagyumana kɔyakun kɔmmɔ kalɛ na ukyuli ɔdi uleti lɛla lɛdi uleduoku ɔma ɔmmɔ kemmo lɛnwunameyi lɛlɔ.

²⁰Na kunwi iye kunyɔ ni, kuye badine beeti bana ala teeboku Yerusalem na baatɛ ɔma ɔmmɔ kɔyakun kama usien umodi ƒui.

²¹Nsu líye-ma kpakplaa nnii, “Bi ɔsi na bíbo bíbatɛ awodu amɛni kudɔ usien ɔmɛni? Si lɛ́sɔ lɛ́nu-mii lɛni ndubuƒie-mii!” Na ɔ́si limeyi lɛmmɔ kama ni, kuye badine bammɔ básɔ bétebo mmɔ kudii na lɛnwunameyi lɛlɔ.

²²Mmɔ na líbo Lewiƒuɔ bammɔ ɔda ka ɔdi biala utábla lɛlɔ sɛɛn na beteesie batágyumana kɔyakun kɔmmɔ kalɛ beeti ɔbu beete lɛnwunameyi. Amu na lívele Katɔti nnii, “Mɛni lɛnɔ ni, nyimo-mi na anu-mi kɔnyana ɔ́si ƒula bɔyɔ bonwu bɔni ebo ɔsu.”

²³Na uwi ɔmmɔ kemmo lɛnɔ ni, lɛ́nu Yudaƒuɔ banana badi ka béti Asdod ku Amon ku Moab beleku.

²⁴Na bebi bani na báwɔ kakɛ beenú Asdod lɛdi ku lɛma lɛkladi adi. Nsu belenu Yudaƒuɔ lɛdi.

²⁵Mmɔ na lɛ́dɔnku-ma na líwida-ma, na líbo bananabi bammɔ badi na lɛ́ni-ma linwini. Na lɛ́ya na bése kenye na Unwoti lɛnyi kemmo banii, “Bɔsɔ buleti bula bebi belekubi bulete kadi bamba banana na beti-ma. Na bula bananabi lɛnɔ ni, beleti kadi bamba belekubi. Na abu lɛnɔ buleti ɔdi lɛnɔ.

²⁶“Na kadi bamba beleku buti bɔmɛni udu ɔsu na Ɔga Salomo ɔ́bla likpidi. Na ɔdi ɔga ɔni na nwuna lɛgadi lítulo kadi bamba bagadine ƒui. Na ɔdi ɔga ɔni na Katɔti ɔ́yɔ-nwu litemi, na ɔ́ya na ɔ́di Israel ƒui lɛlɔ. Nsu ɔ́bla likpidi lɛmɛni udu.

²⁷Na muuye-mii nnii ɔlɛka bɔsiaku lɛla lɛmɛni udu kama na bɔda bɔvia Katɔti litemi na buteeti kadi bamba beleku?”

²⁸Na ɔkpane Unengudi Eliasib ubidi Yoiada bebi bammɔ kemmo unwi úti Horonni Sanbalat ubidi ulekubi. Ɔmɛni ɔsu lɛ́bɔku-nwu lɛ́lɛku Yerusalem.

²⁹O mina Katɔti, nyimi-ma. Ɔsika bébile bana bakpane kabla ku bunyimi bɔni na bakpane ku Lewiƒuɔ bényimiku-ɔ.

³⁰Anwuɔsu lɛ́ya na Lewiƒuɔ ku bakpane ku bekyuli bammɔ ƒui bámami lɛlɔ bédie kadi bamba ɔdi ablala ƒui kudɔ. Na lɛ́bla ɔda bubo líte ɔdi biala kalɛ na ɔdi biala ɔnu nwuna kabla kani ɔlɛka ɔbla ɔti.

³¹Na lɛ́ya béyi kugyiikɛ kɔni beeti taakyula akpala na béti béboku nwuna uwi lɛlɔ. Na básɔ béyi bana edula ebi edeedi ani na báƒɛ ku adingyii ebi edeedi ani béde na béti béboku bábabla akpala na uwi lɛlɔ. Amu na lívele Katɔti ka unyimo-mi na nwuna kɔnyana bɔnu kemmo.