Read Lelemi Nehemia 3 Bible Online

Nehemia 3 - Lelemi bible

Nehemia 3

¹Na ɔkpane unengudi ɔni baalɔ Eliasib ku nwuna bakpane bésie na bátátu kayakun kani baalɔ Baƒonu Kayakun, na bálɛmi-nwu kenye na béti bákya Unwoti enu kemmo. Na bátu katu taasia gyɔlɔɔ eti anyɔ na béti bákya Unwoti enu kemmo. Na bátu bétédu Hananel katu taasia gyɔlɔɔ lɛlɔ.

²Na Yeriko banana bátu ɔƒɛnyi unwi. Na Imri ubidi Sakur lɛnɔ ɔ́tu ɔƒɛnyi ɔni ude-ma.

³Na Senaa ɔtɔ bebi bátu kayakun kani baalɔ banii Kakpaku Kayakun. Na bákya lɛpunu ku lɛla biala pɛpɛɛpɛ.

⁴Na ɔƒɛnyi ɔni nsɔ nsia ni, Hakkos ubidi Uria ubidi Meremot nátu. Na ɔni nsɔ nsia ni, Mesesabel ubidi Berekia ubidi Mesulam nátu. Na ɔni nsɔ nsia ni, Baana ubidi Sadok nátu.

⁵Na ɔni nsɔ nsia ni, Tekoa bakloƒu nátu. Nsu bana ɔma banana batɔnkune béni kabla kani bana lɛlɔ banune béte-ma ka babla.

⁶Na kayakun kani baalɔ Yehana ni, Pasea ubidi Yoiada ku Besodeia ubidi nátu lɛla biala pɛpɛɛpɛ.

⁷Na ɔni nsɔ nsia ni, Melatia ɔni ɔ́si Gibeon ku Yadon ɔni ɔ́si Merono ku banana bani nási Gibeon ku Mispa nátu. Na bátu bétédu aban lɛtɔ lɛni nlɛ Eƒrata ɔƒɛ kanukɔ kakɛ.

⁸Na ɔni nsɔ nsia ni, Harhaia ubidi Usiel ɔni ɔdi sika ugyiedi ɔkywɛne nátu. Na ɔni nsɔ nsia ni, Hanania ɔni mɔɔbla ala ani muunwenyi ƒɛƒɛɛ nátu. Na ɔ́tu laa útédu lɛwoduku bonwu lɛmmɔ lɛlɔ.

⁹Na ɔni nsɔ nsia ni, Hur ubidi Reƒaia ɔni mɔɔnu Yerusalem kalɛkɛ kakɛ lɛlɔ nátu.

¹⁰Na ɔni nsɔ nsia ni, Harumaƒ ubidi Yedaia nátu lɛwoduku lɛni nde nwuna kaduli. Na ɔni nsɔ nsia ni, Hasabnia ubidi Hutus nátu.

¹¹Na ɔni nsɔ nsia ni, Harim ubidi Malkia ku Pahat-Moab ubidi Hasub nátu, na básɔ bátu katu taasia gyɔlɔɔ bodobodo ayu.

¹²Na ɔni nsɔ nsia ni, Halohes ubidi Salum ɔni mɔɔnu Yerusalem kakɛ kakladi lɛlɔ nátu. Na nwuna bebi belekubi lɛnɔ bebunku-nwu kabla kammɔ.

¹³Bekyuli bani élie Hanun ku Sanoa náklibi kɔwɛ kayakun kammɔ. Na básɔku-ka bátu, na bákya ɔpunu ku kɔbwɛlɛmii kɔni beeti taakalɛ. Na básɔ básɔku awodu bɔbla aani lɛgba budie eti leevu, na bátu laa bétédu alakpi kewiakunkɔ kayakun.

¹⁴Na alakpi kewiakunkɔ kayakun ni, Rekab ubidi Malkia ɔni mɔɔnu Bet-Hakerem kalɛkɛ lɛlɔ násɔku kayakun kammɔ ɔ́tu. Na ɔ́kya-ka kɔbwɛlɛmii kɔni beeti taakalɛ.

¹⁵Na kayakun kani kese kesii kani na ntu bɔɔlɛ taasiku ni, Kol-Hose ubidi Sulum ɔni mɔɔnu Mispa kalɛkɛ lɛlɔ násɔku-ka ɔ́tu. Na ɔ́kya ɔpunu ku kɔbwɛlɛmii ku lɛla biala pɛpɛɛpɛ. Na ɔ́sɔku lɛwoduku lɛni ntɛ ese Siloa Ligyu lɛni nde ɔga kevomadɔ kemo útédu Dawid ɔma kayakun ɔ́tu.

¹⁶Na ɔni nsɔ nsia ni, Asbuk ubidi Nehemia ɔni mɔɔnu Bet-Sur kalɛkɛ lɛlɔ náklibi lɛwoduku lɛni nkya ɔ́si Dawid bekyuli kɔƒiɔtɔ útédu ligyu lɛni bekyuli béti enu béku ku kɔduli kɔni baalɔ-ku Lɛlɔ Bɔdi Kɔduli.

¹⁷Na ɔƒɛni ɔni nsɔ nsia ni, Lewini ɔni baalɔ banii Bani ubidi Rehum nátu kakɛ kenwi. Na ɔni nsɔ nsia ni, Hasabia ɔni mɔɔnu Keila kalɛkɛ lɛlɔ nátu. Na ɔ́tu-nwu na kalɛkɛ kammɔ lɛnyi kemmo.

¹⁸Na ɔni nsɔ nsia ni, Henadad ubidi Bawai ɔni mɔɔnu Keila kalɛkɛ kakɛ kadi lɛlɔ nátu.

¹⁹Na ɔni nsɔ nsia ni, Yesua ubidi Eser ɔni mɔɔdi Mispa lɛlɔ nátu ɔ́si bekpone ata kesekɔ ɔtɔ anumi útédu kesii kani na lɛwoduku lɛmmɔ lideyi.

²⁰Na ɔni nsɔ nsia ni, Sabai ubidi Baruk nátu laa útédu Ɔkpane unengudi Eliasib kayakun kenye.

²¹Na ɔni nsɔ nsia ni, Hakos ubidi Uria ɔni ɔdi Meremot uwɔ nátu útédu Eliasib kaduli kawɔlɔkɔ.

²²Na ɔni nsɔ nsia ni, bakpane bamɛni lɛnɔ básɔ bátu awodu pii bébunku. Bakpane bani lɛnɔ nási amadɔ mmɔ ku Yerusalem bátu kakɛ kadi.

²³Na ɔni nsɔ nsia ni, Benyamin ku Hasub nátu awodu ani nkya-ma kɔduli anumi. Na ɔni nsɔ nsia ni, Anania ubidi Maaseia ɔni ɔdi Asaria uwɔ nátu awodu ani nkya nwuna kaduli anumi.

²⁴Na ɔni nsɔ nsia ni, Hanadad ubidi Binui nátu ɔ́siku Asaria kaduli kayakun kenye útédu lɛwoduku lɛmmɔ likpo.

²⁵Na Usai ubidi Palal nábla kabla na ɔga kaduli na kesii kani katutaasia gyɔlɔɔ ɔtɔ ɔlɛ. Na ɔni nsɔ nsia ni, Paros ubidi Pedaia lɛnɔ ɔ́tu.

²⁶Na kakpakɔ kabla bablane bani nli Oƒel Kɔbi lili lɛnɔ báklibi ekpo ekpo bétédu ɔƒɛnyi ɔni nkya ntu kayakun si éti ésela katutaasia ɔtɔ gyɔlɔɔ ɔni nlɛ úsie ɔƒɛ katukɔ.

²⁷Na ɔni nsɔ nsia ni, bakloƒu bani bási Tekoa lɛnɔ bátu ɔdi. Na bése kalɔ básiku katutaasia ɔtɔ bonwu ɔmmɔ lɛlɔ bétédu Oƒel lɛwoduku lɛlɔ.

²⁸Na bapɔnkɔ kayakun katɔ kakɛ ni, ɔkpane biala ɔ́klibi nwuna kaduli anumi.

²⁹Na ɔni nsɔ nsia ni, Imer ubidi Sadok ɔ́klibi ɔƒɛnyi ɔni nkya ese nwuna kaduli kakɛ. Na ɔni nsɔ nsia ni, Sekania ubidi Semaia ɔni mɔɔgyumana kayakun kani kese ɔƒɛ katukɔ lɛnɔ ɔ́klibi ala adi.

³⁰Na ɔni nsɔ nsia ni, Selemia ubidi Hanania ku Hanun ɔni ɔdi Salaƒ ubidi ɔkundi lɛnɔ bábla kadi. Na ɔni nsɔ nsia ni, Berekia ubidi Mesulam náklibi ɔƒɛnyi ɔni nése nwuna kaduli kakɛ.

³¹Na ɔni nsɔ nsia ni, Malkia ɔni ndi sika ugyiedi ɔkywɛne kemmo unwi ɔ́klibi ɔ́si kaduli kani kabla bablane ku kuye badine beli, na ɔ́sɔ ɔ́klibi ɔ́si kayakun kani baawia ala kemmo ɔƒɛnyi útédu ɔtɔ ɔtɔdi ɔni nkya lɛwoduku likpo.

³²Na ɔ́si ɔtɔ ɔtɔdi lɛwoduku likpo útédu baƒonu kayakun ni, sika ugyiedi bakywɛne ku kuye badine náklibi mmɔ.