Read Lelemi Nehemia 4 Bible Online

Nehemia 4 - Lelemi bible

Nehemia 4

¹Uwi ɔni na Sanbalat únu ka abu Yudaƒuɔ bɔ́sɔku awodu ammɔ bɔɔtu ni, úti kɔnyi geen na ɔ́ma-bu.

²Na ka unye nwuna bakpana ku Samariaƒuɔ bavinkpana anumi ni, úye lɛlɔ ɔnini, “Bi na Yudaƒuɔ bani lɛlɔ mɔɔdu kɔnyana mɛni baayɔ́ babla? Baayɔ́ ka basɔku Yerusalem awodu batu yoo?” Na ɔ́sɔ úye ɔnini, “Baabu ka si babla akpala adi bakana beti limeyi linwi pɛ babla kabla kammɔ yoo? Na bakali ka badubɔkɛ atabi ani baatu ɔtɔ basiku atabi ani alɛ esu esu na bákyula-nya kemmo?”

³Amu na Amonni ɔni ndi Tobia na unye Sanbalat kama lɛnɔ ɔ́su ɔnini, “Awodu ani benye baatu mɛni ni, si kedu kákɔ kenye-nwu lɛlɔ muedi ni, ɔdubo bɔƒɛ. Ɔsika atabi lɛti lɛti na béti bátu-nya.”

⁴Mmɔ na Nehemia ɔ́kpali katɔ na ɔ́su ɔnini, “O bula Katɔti, nu-bu bɔkpali. Ɔsika bɔkya bukpoku kemmo. Ya na edumi ani na beedumi-bu mɛni enwini ese-ma lɛlɔ. Na eti-ma ete bana bekisine. Na babla-ma kalala na kalɔ bamba lɛlɔ.

⁵Teti bana ekpidi takyiɛ-ma. Ɔsika béwi bekyuli bani mɔɔtú ɔtɔ ɔmmɔ anumi kalɔ.”

⁶Anwuɔsu bɔkana lɛwoduku lɛmmɔ bɔ́tu bútédu kakɛ. Ɔsika bekyuli bammɔ bédie kayi bábla kabla kaduɛ.

⁷Nsu uwi ɔni na Sanbalat ku Tobia ku Arabiƒuɔ ku Amonƒuɔ ku Asdodƒuɔ bénu ka bátu Yerusalem awodu ammɔ bákɔliku katɔ kaduɛ na bakya beeyile eƒi ani nkya awodu ammɔ kemmo ntɛ ni, bákɛ kɔnyi geen.

⁸Ɔmmɔ ɔsu bekyuli bamɛni béti kasusu kekpidi básala ka batákya-ku bekyuli bammɔ unyeƒi na bekpoku-ma na Yerusalem.

⁹Nsu bɔ́kpali bula ɔti ɔni nkya katɔ na búti bagyumanane búsienku mmɔ na baanu mmɔ usien ku ɔƒɛ kalɛ bɔsɔ bulayia lɛnɔ.

¹⁰Ɔmmɔ kama ni, bekyuli bani nkya Yuda básu banini, “Kabla bablane bammɔ ɔlɔkplu ɔdaku bɔsa. Na leti ku atabi ani nwi kalɔ emomo, na eléte-bu kuƒi ka bɔsɔku awodu ammɔ bɔtu bɔwɔlɔ.”

¹¹Na bula bekisine lɛnɔ básu banini, “Asa na utaabla-ma nwaa iye bataanu-bu bati ni, na bɔkya-ma akɔ mmɔ butádu-ma, na kabla kammɔ kawɔ mmɔ kani!”

¹²Amu na Yudaƒuɔ bani nli nde-ma békeli bábasu-bu kɔlɛ kɔlɛ na útulo leevu muedi ka si kesi kesii bɔdubunye ni, badubo-bu bukpoku.

¹³Amu lídie bekyuli badi na béténye kesii kani na lɛwoduku lɛmmɔ lɛ́kuku kalɛ na bekyuli baanu-ma. Na lɛ́ya bésie benye kɔduli kenye. Na báda bana kuwii ku kɔtaminta ku atula.

¹⁴Amu na ami Nehemia lɛ́ta na ńtánu banamu bakɔdi ku benengu ku bekyuli bammɔ ƒui na lɛ́su-ma nnini, “Bitayia-ma. Bɛkali ka Katɔti ɔni nwuna lɛlɔ lɛɛda liƒu mmomu na ɔlɛka bɔyia. Na binye kpakplaa, na bikpo bite bina banwani ku bina beleku ku bina kɔduli.”

¹⁵Uwi ɔni na bula bekisine bénu ka bana kasusu kani bada kálɛ keyi ni, Unwoti lɛnɔ ɔ́ya na enu áƒɛ-ma. Na bula ƒui bɔ́sɔ búnwini búse awodu ammɔ kudɔ, na ɔdi biala úse ɔɔbla nwuna kabla.

¹⁶Na ɔ́si limeyi lɛmmɔ úsela ni, mina bekyuli kakɛ benye kabla lɛlɔ. Na kakɛ lɛnɔ báda bana ekpola ku bana kɔtaminta ku atula, na bekyuli bammɔ ƒui bénye Yudaƒuɔ

¹⁷bani nkya mɔɔtu awodu ammɔ kama. Na bekyuli bani mɔɔda ala ani baatu awodu ammɔ bada kɔnu kunwi baatú na bana ekpola lɛnɔ akya-ma kɔnu kɔkladi kemmo.

¹⁸Na ɔtune biala ɔ́kya nwuna ekpola ala na unye nwuna kabla lɛlɔ. Na kɔkpɛɛ bavwine ama basɔ bákya-mi kudɔ.

¹⁹Amu na lɛ́su banamu bakɔdi ku benengu ku bekyuli bammɔ ƒui nnini, “Kabla kammɔ kese anumi na kégyingya na abu lɛnɔ bugyingya ku lɛlɔ.

²⁰Anwuɔsu kesi kesii na bɛdubunu kakpɛɛ kammɔ kɔkun ni, na bikeli bibo. Na bula Katɔti ɔdubukpo bula kekpo ute-bu.”

²¹Anwuɔsu búsienku kabla kammɔ anumi na bekyuli kakɛ báda atula ɔsi lɛdigye útédu ka kɔyabi kɔɔlɛ usien.

²²Uwi ɔmmɔ kemmo ami lɛnɔ lɛ́su bekyuli bammɔ nnini, “Ɔdi biala ku nwuna kabla ɔblane úulie Yerusalem use dii, kalɛ na benwini bagyumanane bete-bu asa babla kabla si kadi kegye.”

²³Na ami iye mina banwani iye mina kabla bablane iye mina bagyumanane bani nkya-mi kudɔ, ɔdi biala útedie nwuna awu útewi na ɔdi biala lɛnɔ ɔ́da nwuna ekpola ina úsela ketu muedi.