Read Lelemi Nehemia 6 Bible Online

Nehemia 6 - Lelemi bible

Nehemia 6

¹Na uwi ɔni na Sanbalat ku Tobia ku Arabini ɔni baalɔ Gesem ku bula bekisine bakladi bénu ka lɛ́sɔku awodu ammɔ lɛ́tu ɔni na ńtada kuƒi kɔdi ńtakya ina ka uwi ɔmmɔ ńtakya tɔ kɔyakun kɔmmɔ lɛpunu ni,

²Sanbalat ku Gesem béti kenye kamɛni bémene-mi. Na aka ndi ka ni, “Bo na abu ku-ɔ bɔsa na Ono akpaklɔ ani nwi ƒiaa mmɔ kemmo unwi.” Nsu lɛ́nu lɛ́ti ka lɛkwɛ likpidi na baakya.

³Anwuɔsu ami Nehemia lɛ́tala batalane badi lɛ́kya bekyuli bammɔ ka batásu-ma banini, “Linye kabla kadi lɛlɔ kpakplaa, anwuɔsu naaakana bubo. Bi ɔsu na ɔlɛka lɛda kabla kamɛni bɔbla lɛya na lɛtɔlɔ libo-mii kudɔ?”

⁴Na Sanbalat bene béti kenye kamɛni bémene-mi kune sɔɔn. Na uwi biala ni, kenye kenwi kani na ami lídie.

⁵Na kɔlɔndi ni, Sanbalat ɔ́tala nwuna ukyuli ɔni mɔɔgyumana-nwu na ɔda kakunkɛ kani bátakalɛ-ka kenye

⁶na etemila ani ńkya-ka kemmo anya ndi amɛni, “Búnu bɔ́siku kadi bekyuli pii ku Gasmu kudɔ ka aasu ani sɔsɔ ɔdi ka awɔ ku Yudaƒuɔ bɛɛyɔ́ ka bɛda Israel batɔnkune bidie liboku lɛlɔ na ásɔku Yerusalem awodu aatu. Na kalɛ buunú baayɔ́ beti-ɔ babla bana ɔga.

⁷Ɔni na édie kenye bediene ka bátaakɔ litemi lɛmmɔ lɛsa na Yerusalem ka awɔ ndi Yudaƒuɔ ɔga. Ɔƒɛni litemi lɛmɛni lɛkana lidu Yudaƒuɔ ɔga kudɔ, anwuɔsu bo na buti kasusu bɔsala.”

⁸Amu na líti kenye kamɛni límene-nwu nnini, “Ala ani ƒui na ásu mɛni eeese lɛni. Na mɔɔsu-ɔ ka awɔ ɔlati nábla lili kemmo kasusu asa na énweni ɔku ɔmɛni émene-mi.”

⁹Na liƒu na baayɔ́ ka bakya-bu ku kasusu ka enu aƒɛ kabla bablane bammɔ, na kabla kammɔ kelebo kawɔlɔkɔ. Nsu ɔƒɛni lɛ́kpali Katɔti muuvele-nwu ka ɔkya-mi ɔlɔkplu.

¹⁰Amu na limeyi lɛdi lísie Semaia ɔni ndi Delaia ubidi na ɔdi Mehetabel uwɔ kaduli, na bákalɛ-nwu bákya nwuna ɔtɔ. Na ɔ́su-mi ɔnini, “Ya na busie Katɔti kakpakɔ bɔsala, na bɔkalɛ lɛlɔ bɔda nwuna ɔtɔ kemmo. Ɔsika báwia-a badu. Na usien ɔmɛni kani badubo na babadu-ɔ.”

¹¹Amu na lídie kenye nnini, “Lɛɛɛdi ɔnana ɔni udu mɔɔyia, na ukeli utabɛ. Munuu aakali ka si líkeli ńtábɛ Katɔti kakpakɔ na ndubɔƒɔ mina ngba? Lɛɛɛdubo bukeli kudii.”

¹²Ka lílie líti litemi lɛmɛni kasusu ni, lɛ́nu lɛ́ti ka ɔɔɔdi Katɔti nétemi éte Semai, mmomu Sanbalat ku Tobia náwia egulabi adi éte-nwu.

¹³Lɛla lɛdi geen na báwia béte ukyuli ɔmɛni ka úbayila-mi kalɛ na lɛbla likpidi. Si bunu na línu litemi lɛmɛni ni, nka badubo-mi lɛnyi bubile na baláƒɔ-mi baladi.

¹⁴Amu na lɛ́kpali katɔ lɛ́su nnini, “O mina Katɔti, nyimo Tobia ku Sanbalat ɔ́si lɛla lɛni bábla mɛni ɔsu. Na enyimo Kenye Udiene Noadia ku Katɔti kenye bediene bakladi bani naayɔ́ ka baƒɔ-mi badi lɛnɔ.”

¹⁵Na bátu awodu ammɔ báwɔlɔ na kɔbuli limeyi aavlanyɔ-ɛlɔ lɛlɔ. Na emeyi liti ku inyɔ na béti bátu-nya.

¹⁶Ka bula bekisine ƒui bénu etemila amɛni ni, liƒu lɛ́da ama ku kadi bamba bekyuli bani ƒui nde-bu. Na ama bani nánu báti ka bula Katɔti kɔnu kɔkya kabla kani bɔ́bla mmɔ kemmo ni, enu áƒɛ-ma.

¹⁷Emeyi ammɔ kemmo lɛnɔ ni, bakutine pii bani nási Yuda kalɔ lɛlɔ béteenweni lɛku pii teemine Tobia. Na Tobia lɛnɔ úteenweni teemine-ma.

¹⁸Ɔsika Yudaƒuɔ pii bése kenye béte-nwu. Na nwuna aasi ndi Arah ubidi Sekania. Na Tobia ɔmɛni ubidi ɔnanabi Yohanan úti Berekia ubidi Mesulam ubidi ulekubi.

¹⁹Na lɛnɔ ni, bekyuli bése anumi baasu-mi kabla kabuni kani na Tobia ɔ́ɔbla, na báasu mina lɛlɔ etemila ku ala ani lɛ́su lɛnɔ taatina-nwu. Na Tobia anwu ni, únweni lɛku ka nka ubakya-mi liƒu.