Read Lelemi Ester 1 Bible Online

Ester 1 - Lelemi bible

Ester 1

¹Na Persia Ɔga Ahasweros lɛga bɔdi uwi ni, ɔ́di kɔlɛkɛ eti anyɔ ku aavlanyɔ-maatɛ lɛlɔ ɔ́si India útédu Etiopia.

²Na ɔma unengudi ɔni baalɔ Susa mmɔ na úse nwuna lɛga kadikɔ liboku.

³Na nwuna lɛga bɔdi lɛkwa lɛtɛdi kemmo ni, Ɔga Ahasweros ɔ́lɔ nwuna benengu pii badi ku lɛku batine úboku limeyi bɔdi adila kadikɔ bonwu kadi. Na ɔ́lɔ aban bagadine ku bana benengu bani nási kɔlɛkɛ kɔmmɔ kemmo lɛnɔ úboku. Na ɔ́lɔ Persia ku Midian bekpone benengu lɛnɔ ɔnii bebo.

⁴Údie nwuna lɛlakɛ keyi na bekyuli bamɛni ƒui lɛlɔ bɔnu kemmo emeyi eti atɛ ku avlaatɛ, na ɔ́tina bekyuli bammɔ ƒui ka ubo lɛkɛ geen, na nwuna lɛgadi linye lɛgba lɛlɔ geen, na ubo ɔbu.

⁵Uwi útetu na ɔmmɔ kama asa na Ɔga Ahasweros ɔ́sɔ ɔ́lɔ bekyuli ƒui úboku kadikɔ kammɔ udu na Susa ɔma kemmo. Na ɔmmɔ lɛnɔ ɔ́bla aani emeyi maatɛ ɔni na baadi na baaní na ɔga ɔmmɔ adingyii kemo egyii kalɔ, na ɔɔɔkɛ ukyuli ɔni udu na adi.

⁶Na bákya kadikɔ kammɔ akya ku aduni abuni aƒualadi ku egyiedi. Na béti linwo lɛni náƒɔ kuye litulo ƒui bávili sika ɔƒualadi asikpɛɛ ani ndanku kesii kani bene na asɛɛ ebi ani náƒɔ kuye geen ada aduni ammɔ lɛlɔ. Na bése sika ugyiedi ku ɔƒualadi eboku bése kesii kani na bákya asɛɛ ebi ku ketu kemmo atabi aƒualadi ani muukeye kalɔ ku akya bun bun.

⁷Na lɛɛƒɛɛ lɛni na benengu bammɔ bada baaní ntɛ ƒui ɔdi biala ku kalɛ na bábla-nwu. Na bɔni kani na ɔga ɔmmɔ unye ɔɔní ala taalɛku teeboku kalɛ kalɛ.

⁸Na ɔ́su-ma ɔnini, “Amii bitaani-mu kalɛ na bɛdubɔkana.” Na ɔ́su nwuna kabla bablane lɛnɔ ɔnini, “Biteeyile-ma lɛɛƒɛɛ ku atu.”

⁹Ɔƒɛni uwi ɔni na unye ɔɔbla ɔmɛni teete banana bɔmmɔ ni, ulekudi beleku ɔga ɔni baalɔ Wasti lɛnɔ úse kadikɔ kammɔ udu kani úte beleku na ɔga kesii mmɔ.

¹⁰Na limeyi maatɛdi lɛlɔ ni, ntɛ pii bɔmmɔ bɔ́ɔta bɔ́sia Ɔga Ahasweros anumi, na lɛlɔ lɛnɔ lɛɛyɔ́-nwu geen, anwuɔsu ɔ́tala nwuna kabla bablane maatɛ badi bani ndi Mehuman ku Bitsa ku Harbona ku Bigta ku Abagta ku Setar ku Karkas ɔnii

¹¹batálɔ ulekudi Beleku Ɔga Wasti beboku-nwu. Na ɔga ɔmmɔ ɔ́yɔ ka nka ulekudi uti nwuna beleku kagabwa ubi na ɔlɛ ubo, na nwuna bekyuli bani na ɔ́lɔ mmɔ banu kalɛ na ɔɔdia bɔnu.

¹²Kabla bablane bammɔ bátásu ɔga uleku Wasti kenye kammɔ, nsu úni na útasiaku-ma na ubo kesii kani na ɔga ɔɔlɔ-nwu. Anwuɔsu Ɔga Ahasweros ɔ́kɛku ulekudi kɔnyi kpakplaa.

¹³Ɔƒɛni si údu ala amɛni bene udu lɛlɔ lɛni ni, ɔdi ɔga ɔmmɔ udu ka ɔlɔ nwuna benengu ku lɛku batine benengudi ƒui, na uye-ma kaduɛ unu lɛla lɛni na ɔda bubo bɔmmɔ bɔɔtina ku kalɛ na ɔbla.

¹⁴Na bani nde-nwu geen mmɔ ndi benengu maatɛ bani baalɔ Kasena ku Seta ku Admata ku Tarsis ku Meres ku Masena ku Memukan. Bekyuli bamɛni mɔɔdi kasusu na Persia ku Media kalɔ kammɔ ku kana lɛga kadikɔ ala lɛlɔ.

¹⁵Anwuɔsu ɔga ɔmmɔ ɔ́lɔ-ma na ɔ́su-ma ɔnini, “Lɛni na lɛ́lɔ mina ulekudi Beleku Ɔga Wasti nnii ubo na úni. Bi na ɔda bubo bɔmmɔ bɔɔtina ka lɛbla-nwu?”

¹⁶Mmɔ na Memukan ɔ́su ɔga ku benengu bakladi bammɔ ɔnini, “Ɔɔɔdi awɔ lɛti na ƒ'ulekudi Beleku Ɔga Wasti ɔmɛni ɔ́kya kɔƒa. Mmomu údumi ƒula lɛga kadikɔ benengu bani ƒui na álɔ ásiku kɔlɔ ekpo ekpo ƒui éboku mɛni lɛnɔ ku kɔlɛkɛ kɔmmɔ ƒui bekyuli.

¹⁷Na beleku bammɔ ƒui badubunu ɔmɛni na bakɛ kenyekɔ. Ɔkɛnku ɔmmɔ ɔsu ni, uleku biala ɔdubuse kalɔ utaanu ɔgyani anumi. Na si ɔɔtɛmiku-nwu ɔdubɔsu-nwu ɔnini, ‘Ɔga Ahasweros muedi ɔ́lɔ ulekudi Beleku Ɔga Wasti na úni útesie!’

¹⁸Na si bɛɛbu bɛnii ɔkɔ litemi mɔɔsu ni, bula benengu bani nása mɛni beleku badubunu lɛla lɛni na beleku ɔga ɔmɛni ɔ́bla, na bɛdubɔnu ka ama lɛnɔ badubuseku-bu udu ɔmɛni kalɔ asa na kadi kadubugye muedi.

¹⁹“Anwuɔsu si ami ku-mii kasusu kadubɔbla unwi ni, na ɔga ɔya na bunyimi ɔda bubo kpakplaa bɔdi, na basɔ balavumana-mu lɛnɔ kudii. Na bakɔ-mu lɛsa bete kadi ƒui banii Beleku Ɔga Wasti ɔsɔ uuubo kuƒi na ɔsɔ ɔda ɔlɛ bula ɔga anumi kudii lɛnɔ ɔ́si ɔmwi limeyi lɛmɛni lɛlɔ. Na ɔga ɔƒɔ-nwu kenyekɔ kammɔ ute uleku bamba ɔni na ɔdia utulo-nwu ƒui.

²⁰Na si búte-ma bɔti bɔmɛni na kɔlɛkɛ kɔmmɔ ƒui kemmo bɔ́vi ni, beleku bammɔ badubo lɛlɔ kalɔ buteeboku teete bana bagya ɔ́si banamu lɛlɔ útédu benengudi lɛlɔ ina dɛ na kɔnu kemmo kadia uleku ɔmmɔ.”

²¹Ɔga Ahasweros ku nwuna benengu bammɔ báƒɔ lɛla lɛmɛni enu anyɔ.

²²Ɔmɛni ɔsu ɔ́ya na bénweni ɔku ɔmmɔ na adi ani ƒui na akya kɔlɛkɛ kɔmmɔ lɛlɔ ƒui, na béti bémene-ma bákɔ lɛsa bávi ka kaduli biala kemmo ni, ɔnana ndi beleku bammɔ ku bebi ƒui lɛlɔ ɔdine.