Read Lelemi Ester 3 Bible Online

Ester 3 - Lelemi bible

Ester 3

¹Na ɔmmɔ kama ni, Ɔga Ahasweros ɔ́kɔliku Haman ɔni ndi Hamedata ubidi ɔnanabi kenyekɔ, na únwini nwuna benengu bani muubunku-nwu ƒui unengu na nwuna lɛga kadikɔ. Na Haman ɔmɛni ɔ́si Ɔga Agag kaba kemmo.

²Na ɔga úbo ɔda ka bakladi bani na bakya-nwu kalɔ ƒui bataakya Haman lili kalɔ na balɛ akɔnkɔ lɛnɔ kalɔ si ɔ́si ɔɔví aani bana unengu kalɛ. Nsu Mordekai kani néni na ulábla lɛni si ɔ́nu-nwu.

³Amu na benengu bakladi béye-nwu banini, “Bi ɔsu na awɔ aládi ɔga ɔda bubo lɛlɔ?” Mmɔ na údie kenye ɔnini, “Yudani na ndi, na naaakana malɛ akɔnkɔ kalɔ mete Haman.”

⁴Limeyi ndi limeyi ni, baatɛmiku-nwu ka nka unwini kasusu, nsu útenu kalɔ. Anwuɔsu bésie bátásu Haman lɛla lɛni na Mordekai ɔɔbla na banu si dɛ na badubo-nwu bɔbla.

⁵Haman úti kɔnyi kpakplaa ka únu kenye kamɛni ka Mordekai úni ɔnii ulalɛ akɔnkɔ kalɔ ulete-nwu ɔbu.

⁶Ka únu lɛnɔ ka Yudani na Mordekai ɔdi ɔsu ni, ɔ́lɛ ugyii ka badu Yudaƒuɔ ƒui na ɔɔɔdi Mordekai kani, ɔsika ɔmmɔ ulálɛ kɔsia kɔdi na kɔlɔ kɔni ƒui lɛlɔ na Ɔga Ahasweros ɔɔdi mmɔ lɛlɔ.

⁷Na uwi ɔmɛni kemmo ni, Ahasweros úuduo nwuna lɛkwa aavlanyɔdi kemmo ka ɔɔdi lɛga. Na bana kɔbuli kudeedi kɔni baalɔ Nisan kemmo ni, Benengu badi bábatu egulabi banu na Haman anumi na bati uwi ɔni na ɔ́manku ka badu Yudaƒuɔ bammɔ. Na egulabi ammɔ átina ka kɔbuli leevu-kunyɔdi kɔni baalɔ Ada na ɔlɛka babla lɛla lɛmmɔ.

⁸Amu na Haman útásu Ɔga Ahasweros ɔnini, “Kadi bekyuli badi básala bakya ƒula kɔlɔ kɔni lɛlɔ na aadi bekyuli ƒui akɔ. Na bebo ɔdi ɔdi na baabla na ɔ́vumanaku bekyuli bakladi ƒui ɔdi, na baládi ƒula ɔda bubo lɛnɔ lɛlɔ. Na lɛla lɛmɛni lɛɛɛdububoku kɔsia biala na ƒula lɛga kadikɔ. Anwuɔsu ɔlɛka bɔyila-ma udu kalɛ na lɛga kadikɔ kammɔ kenye kaduɛ.

⁹Mɔɔnu ka ɔdia ka ebo ɔda na bɔdu-ma. Na muusé kenye lite-ɔ ka si úbo úte lɛni ni, ndubɔkɛ sika ɔƒualadi pii lɛkya ƒula lɛga kadikɔ kavumi kemmo.”

¹⁰Mmɔ ni, Ahasweros úti nwuna ɔyikun kakwɛnimi kani mɔɔtina ka ɔ́sia lɛla lɛdi kɔnu ka babla-ni úte Haman ɔni ndi Hamedata ubidi ɔni nási Ɔga Agag kaba kemmo, ɔni muukisi Yudaƒuɔ mmɔ.

¹¹Amu na Ɔga Ahasweros ɔ́su Haman ɔnini, “Bekyuli bammɔ ku bana sika ƒui ɔkya-a enu kemmo, anwuɔsu bla-ma lɛla lɛni na ánu ka lɛ́manku.”

¹²Na bana kɔbuli kudeedi kɔni ndi Nisan limeyi leevu-lɛtɛdi lɛlɔ ni, Haman ɔ́lɔ ɔga lɛku benwenine ƒui, na úbo-ma ɔda ɔnii benweni lɛku na kɔlɛkɛ kɔmmɔ ƒui adi butemi ku bunweni kemmo. Anwuɔsu bénweni-ni na ɔga lɛnyi kemmo na bétu-ni kɔnu bɔsia likpose kakwɛnimi na béti bémene kɔlɛkɛ kɔmmɔ lɛlɔ badine ku aban bagadine benengu ƒui na Ahasweros lɛga kadikɔ ƒui.

¹³Batu na bátala ku kɔnu kɔnu na bele lɛku lɛmmɔ bávi. Na ala ani nkya lɛku lɛmmɔ kemmo aatina ka ɔlɛka badu Yudaƒuɔ ƒui, banana ku beleku ku bana bebi ƒui banamu ku benengu, na bayila-ma udu na limeyi linwi pɛ lɛlɔ lɛni ndi kɔbuli leevu-kunyɔdi limeyi leevu-lɛtɛdi lɛlɔ, na beti-ma ala ƒui.

¹⁴Na lɛku lɛmmɔ kemmo etemila ni, ɔlɛka baka-nya na kadi anumi na kalɛkɛ biala kemmo kalɛ na ɔdi biala ɔklibi lɛlɔ use ute limeyi lɛmmɔ.

¹⁵Ɔga Ahasweros ɔ́ya na bákɔ litemi lɛmɛni lɛsa na kesii biala, na ɔ́lɛ lɛni na Susa ɔma unengudi kemmo lɛnɔ. Na ɔmmɔ kama ni, Ɔga Ahasweros ku Haman bétélie kalɔ na báni ntɛ. Nsu litemi lɛmɛni lɛ́bla Susa ɔma bekyuli dɛye dɛye, na lɛsɛ lɛ́ƒɔ-nwu kemmo ƒui.