Read Lelemi Ester 5 Bible Online

Ester 5 - Lelemi bible

Ester 5

¹Na limeyi lɛtɛdi lɛlɔ ni, Ester ɔ́da nwuna beleku ɔga adala na úsie unye kaduli kemmo na ɔtɔ ɔni kemmo na ɔga uulie nwuna lɛgaboku lɛlɔ taanu keyi teemene anumi.

²Uwi ɔni na ɔga ɔ́nu Uleku Ɔga Ester úmene ni, ɔ́da-nwu kayi kɔnakunwi, na únene nwuna sika ugyiedi ɔgagyii ɔ́tina-nwu. Anwuɔsu Ester úsie útétuku ɔgagyii ɔmmɔ lili.

³Amu na úye-nwu ɔnini, “Mina Uleku Ɔga Ester, bi nébo? Su-mi lɛla lɛni na aawia, ina mina lɛga kadikɔ kakɛ kenwi na aawia muedi ndubute-ɔ.”

⁴Mmɔ na Ester údie kenye ɔnini, “O mina ɔga ɔbune, si ɔdia ute-ɔ ni, mɔɔyɔ́ ka awɔ ku Haman bibo kadikɔ kani na lɛ́ɛklibi líse-mii ɔmwi limeyi lɛlɔ.”

⁵Amu na ɔga ɔmmɔ ɔ́su ɔnii, “Ya na Haman ɔklibi lɛlɔ pla, kalɛ na bɔbla lɛla lɛni na Ester ɔɔwia!” Na anwu ku Haman bébo kadikɔ kani na Ester ɔ́klibi úse-ma.

⁶Na ɔni na béboku ntɛ bɔdi na badaku bɔni ni, ɔga ɔ́sɔ úye-nwu ɔnini, “Bi ndi lɛla lɛni na ébo ebevele-mi. Su-mi lɛla lɛni na aawia, ina mina lɛga kadikɔ kakɛ kenwi na aawia muedi ndubute-ɔ.”

⁷Mmɔ na Ester údie kenye ɔnini, “O mina ɔga ɔbune geen, si aayɔ́-mi, na mina ala ada-a kayi geen sɔsɔ ni,

⁸mɔɔyɔ́ ka mbalɔ awɔ ku Haman na bibo kadikɔ bamba kani na ndubɔklibi lise-mii kɔnaadi. Na si ɔdubɔyɔ-ɔ kaƒɔ ƒaa na mmɔ ni, ndubɔsu-ɔ lɛla lɛni na mɔɔwia.”

⁹Ka Haman ɔ́ta ntɛ bɔmmɔ kanikɔ mmɔ ni, lɛlɔyɔ lɛkya-nwu lɛlɔ kemmo kaduɛ, ɔsika ntɛ bɔmmɔ bɔsia-nwu anumi. Nsu uwi ɔni na ɔ́nu Mordekai na ɔban kayakun ka ulie na ulábla lɛla lɛdi ulatina ka uute-nwu ɔbu ɔdi ɔsu ni, kɔnyi kɔ́kɔ-nwu geen.

¹⁰Nsu útasu lɛla lɛdi. Amu ka Haman útéduo kaduli ni, ɔ́lɔ nwuna bakpana ku ulekudi Sares ɔ́sala,

¹¹na úse kalɔ ɔɔkun lɛmɛnɛ na nwuna lɛkɛ pii lɛni na ubo lɛlɔ ku bebi bananabi lɛlɔ. Na ɔ́su-ma kesii kani na ɔga úti-nwu útése, na nwuna kenyekɔ kenye ku kalɛ na bakladi baakya-nwu lili kalɔ, na baalɛ akɔnkɔ kalɔ taabu-nwu.

¹²Na ɔ́sɔ ɔ́su ɔ́sia ɔnini, “Ɔɔɔdi ɔmmɔ lɛti mmomu na bekyuli ƒui akɔ ni, ami kani na Beleku Ɔga Ester ɔ́lɛ lɛnimi úbunku ɔga ka bubo bubadiku-nwu. Na kɔnaadi kani na ɔdi.

¹³Nsu ɔmɛni ƒui ulayɔ-mi tɔ kaƒɔ na uwi ɔni na Yudani Mordekai ɔmmɔ mmu muulie ɔga kayakun kammɔ kenye ɔsu.”

¹⁴Haman ulekudi ku bakpana bákya-nwu kasusu banini, “Tu atabi akpa ku ɔta bonwu kangyaa ɔdi na ɔkuku lɛgba aavlanyɔ-inyɔ. Na kɔnaadi ɔtanta ni, na asu ɔga na bakya Mordekai ɔbuli limɔ baƒala mmɔ na ukpi. Nwuna kama asa na bisie kadikɔ kammɔ, na bitádi na bɛni na bɛkɛ ebiti.” Haman ɔ́ƒɔ litemi lɛmmɔ aani kasusu kabuni na béte-nwu. Anwuɔsu usi na ɔkɛ, na ɔ́ya na bátu akpa ku ɔta bonwu ɔmmɔ.