Read Lelemi Israelƒuɔ Bɔlɛ 1 Bible Online

Israelƒuɔ Bɔlɛ 1 - Lelemi bible

Israelƒuɔ Bɔlɛ 1

¹Anyi amɛni ndi Yakob bebi bani na ama ku-nwu bésie Egyipte kalɔ lɛlɔ ku bana bebi.

²Ruben ku Simeon ku Lewi ku Yuda

³ku Isakar ku Sebulon ku Benyamin

⁴ku Dan ku Naƒtali ku Gad ku Aser.

⁵Na kaba bekyuli bani nási Yakob kemmo bumomo bɔdi nkyuli liti ku aavlanyɔ. Nsu Yakob ubidi Yoseƒ anwu ɔkya Egyipte kukuuku.

⁶Na uwi ɔdi kama ni, Yoseƒ ku nwuna banwani ku kaba kammɔ bekyuli bakladi bébekpi.

⁷Nsu Israel kadi bekyuli bammɔ báwɔ pii geen béyile Egyipte kalɔ lɛlɔ, na bébo ɔlɔkplu lɛnɔ geen.

⁸Na uwi útetu asa na bése ɔga ɔwɔdi na Egyipte mmɔ. Na ɔga ɔmɛni ɔɔɔgyi Yoseƒ.

⁹Amu na ɔga ɔmɛni ɔ́su nwuna bekyuli ɔnini, “Bɛnu, Israelƒuɔ bamɛni béemomo bétulo-bu.

¹⁰Bɛya na bɔwia ulu ɔdi na basɔ belemomo belebu. Si ɔɔɔdi lɛni na banii kekpo kadi kébo ɔƒɛni ni, badubo bula bekisine bubunku na bekpo badi-bu lɛlɔ na bekeli balɛ kalɔ kamɛni kemmo.”

¹¹Amu na Egyipteƒuɔ báwia lɛlɔ badine béte-ma aani bekyuli beƒiedi lɛlɔ banune kalɛ. Bekyuli bamɛni bénye-ma lɛlɔ na baabla kabla kpakplaa, na bátu Pitom ku Rameses lɛma linengudi kesii kani na beesé ala teete bana Ɔga Ƒarao.

¹²Nsu kalɛ kani na baanya Israelƒuɔ bamɛni taamana ni, lɛni kani na beemomo teebu na Egyipte kalɔ lɛlɔ. Anwuɔsu Egyipteƒuɔ bébo baayia Israelƒuɔ bamɛni,

¹³na beenye-ma lɛlɔ na baabla kabla kpakplaa teetulo lɛlɔ.

¹⁴Baanwu lɛti na beekúlo atimbɔ ku katuma lidu bamba lɛnɔ na kemo ɔni na bana ngba keliela káyu-ma ɔdu geen.

¹⁵Amu na Egyipteƒuɔ ɔga ɔmɛni ɔ́su Siƒra ku Pua bani mɔɔƒɔ́ kɔwɔ teete Hebriƒuɔ beleku bammɔ ɔnini,

¹⁶“Si uwi ɔni na bɛɛƒɔ́ Israelni uleku ɔdi kɔwɔ na ubi ɔmmɔ ɔdi ɔnanabi ni, na bɛdu-nwu. Nsu si ulekubi na ɔdi ni, bitadu-nwu.”

¹⁷Nsu ka beleku bamɛni baayia Katɔti ɔsu bátabla bátasiaku kalɛ na Ƒarao ɔ́su-ma mmɔ lɛlɔ, mmomu báya na beli ngba.

¹⁸Amu ka ɔga ɔmɛni ɔ́nu lɛla lɛmɛni ɔ́ti ni, ɔ́tala bekyuli ɔ́kya kɔwɔ baƒɔne beleku bamɛni ɔnii betéye-ma banini, “Bi ɔsu na bɛ́bla lɛla lɛmɛni udu na bítadu bananabi bammɔ na bɛ́ya na beli ngba?”

¹⁹Amu na beleku bamɛni bédie kenye banini, “Israelƒuɔ beleku beeese aani Egyipteƒuɔ beleku. Bebo ɔlɔkplu ɔkplu. Ɔmmɔ ɔsu asa na buteenu ni, na báawɔ!”

²⁰Anwuɔsu Katɔti ɔ́nu kɔwɔ baƒɔne beleku bamɛni ku lɛƒɔndia na Hebriƒuɔ bammɔ beemomo teebu geen na bebo ɔlɔkplu lɛnɔ.

²¹Na ka baayia Katɔti ɔsu ni, ɔ́ya na kɔwɔ baƒɔne bammɔ alati lɛnɔ báwɔ.

²²Amu na Ɔga Ƒarao úbo nwuna bekyuli ɔda ɔnini, “Si bɛ́nu ka Hebrini uleku ɔdi ɔ́wɔ ubi ɔnanabi ɔdi ɔda ni, na bibo-nwu bɛkya Nil Ketu kemmo. Nsu si ulekubi na ɔdi ni, na bɛya na ɔsɔ ɔkya ngba.”