Read Lelemi Israelƒuɔ Bɔlɛ 10 Bible Online

Israelƒuɔ Bɔlɛ 10 - Lelemi bible

Israelƒuɔ Bɔlɛ 10

¹Amu na Unwoti ɔ́su Mose ɔnini, “Teesie na atánu Ƒarao, ɔsika lɛ́ya na anwu ku nwuna benengu báyu kayi ɔkplu kalɛ na ɔdia-mi na lidie akɔla ala budie taatina lidu lidu lɛmɛni lɛtina na bana akɔ.

²Mmɔ na ɔdubɔdia na biti bana litemi bɛtɛmi bina bebi ku bawɔ. Na bɛsu-ma kalɛ ami Unwoti lɛ́bla Egyipteƒuɔ ɔkɛnku akɔla budie taatina lidu lidu lɛmɛni lɛlɔ, na bɛti ka ami ndi Unwoti.”

³Anwuɔsu Mose ku Aaron báta na bésie Ƒarao kaduli na básu-nwu banini, “Hebriƒuɔ Katɔti ɔnii, ‘Kɔlɛ sɔɔn na adubuni ka eboku lɛlɔ kalɔ ete-mi? Ya na mina kadi bekyuli batɔlɔ na batákpa-mi.

⁴Si éni-ma ulu budie ni, ndubɔya na baalɔlɔ bani muubile ala baƒɔ ƒula kalɔ kammɔ ƒui lɛlɔ kɔnaadi.

⁵Badubɔƒɔ kalɔ kammɔ kesi kesii na ukyuli ɔdi ɔsɔ ulakana lɛla lɛdi bɔnu. Ndubɔya na baalɔlɔ bammɔ bayalɛ edula blii ani nébu evete na etubankɛ atakpɛ ammɔ bɔna kama na egyii ani ƒui mɔɔkwɛ́ bina mmo lɛnɔ bebile-nya.

⁶Badubɔƒɔ awɔ Ƒarao ku ƒula benengu ku ƒula bekyuli kɔduli kemmo ƒui tɛtɛɛtɛ. Na ɔmɛni ɔdubɔbla lɛla lɛni na ƒula bati ku bati kuuku bátanu kudii úti ɔ́si uwi ɔni bélie kalɔ kammɔ lɛlɔ úti úbedu ɔmwi kadi.’ ” Amu ka Mose ɔ́su Ƒarao ala amɛni ɔ́wɔlɔ ni, ɔ́gyu ɔ́tɔlɔ.

⁷Na Ƒarao benengu bammɔ básu-nwu banini, “Bi ɔsu na ɔlɛka bɔya na ɔnana ɔmɛni uteekpoku-bu lɛni? Bɛya bute Israelƒuɔ bamɛni kuƒi na batɔlɔ, na beteesie batákpa bana Unwoti Katɔti. Aanu taati ka Egyipte kalɔ ƒui kadaku udu bɔyii na ama ɔsu?”

⁸Ɔmɛni ɔsu básɔ bálɔ Mose ku Aaron béboku Ƒarao kaduli na básu-ma banini, “Biteesie na bitákpa bina Unwoti Katɔti.” Amu na béye Mose ku Aaron banini, “Nsu bina ɛlɛ nésela?”

⁹Amu na Mose údie kenye ɔnini, “Bɔdubutiku bula banamu ku benengu ku bebi bananabi ku belekubi ku bebuo lidu lidu ƒui, ɔsika limeyi geen na bɔdubo bɔdi bute Unwoti.”

¹⁰Amu na Ƒarao ɔ́kpali Unwoti lɛnyi na ɔ́su ɔnii, “Bɛnu lɛlɔ kemmo kaduɛ si bɛnii amii ku bina beleku ku bebi nésela mmɔ, ɔsika bɛɛwia ɔgbankpi teete lɛlɔ, ɔsika bɛda kasusu kekpidi na mɔɔnu.

¹¹Oowo! Bɛya na bina banana kani besie batákpa Unwoti, ɔsika lɛni na amii alati bíye bɛ́siku kalɔ kesekɔ.” Ɔmmɔ kama bábɔku Mose ku Aaron bálɛku Ƒarao anumi mmɔ.

¹²Amu na Unwoti ɔ́su Mose ɔnini, “Nene ƒula kɔnu tina Egyipte kalɔ kammɔ lɛlɔ, na baalɔlɔ bani muubile ala badubɔyu baƒɔ kalɔ kammɔ lɛlɔ ƒui na bebile lɛla biala nébu na etubankɛ ɔƒɛƒɛɛ kpakplaa ɔmmɔ kama na mmo bɔmmɔ ƒui kemmo.”

¹³Anwuɔsu Mose únene kɔnu na úti nwuna ugyii ɔdadi ɔmmɔ ɔ́tina Egyipte kalɔ kammɔ lɛlɔ, na Unwoti ɔ́ya na ɔƒɛƒɛɛ ɔdi úkpo ɔ́si ɔƒɛ katukɔ ɔ́vi kalɔ kammɔ lɛlɔ limeyi lɛmmɔ ku usien umodi. Na kadi buteegye ni, baalɔlɔ bani muubile ala mmɔ báyu bébewi geen.

¹⁴Bébile ala kalɔ kammɔ kemmo ƒui na bakɛ esu esu na béyii Egyipte kalɔ lɛlɔ ƒui kede kede. Na Egyipteƒuɔ bátanu-ma lɛni kudii. Na badi lɛnɔ basɔ baaadubo bɔlɛ lɛni lɛnɔ kudii.

¹⁵Baalɔlɔ bammɔ báƒɔ Egyipte kalɔ lɛlɔ kesii biala na bewi totonto. Na bádi lɛla biala na etubankɛ atakpɛ ammɔ étebile. Na bádi egyiibi ku evete biala. Ɔni na ina livete linwi lítebu lɛɛɛsia kugyii iye edula kugyii kɔdi lɛlɔ na Egyipte kalɔ lɛlɔ.

¹⁶Amu na Ƒarao ɔ́ya na bábabla bálɔ Mose ku Aaron béte-nwu. Na ɔ́su-ma ɔnini, “Lɛ́bla likpidi lɛ́ƒiɔ bina Unwoti Katɔti ku amii lɛnɔ.

¹⁷Na muuvele-mii nnii biti likpidi lɛmmɔ bɛkyiɛ-mi. Na bivele bina Unwoti Katɔti kɔkladi kɔmɛni bite-mi. Na ɔda ɔgbankpi ubendi ɔmɛni udie-mi lɛlɔ.”

¹⁸Amu na Mose únu kalɔ na ɔ́tɔlɔ na útévele Unwoti úte Ƒarao.

¹⁹Amu na Unwoti ɔ́vumana ɔƒɛƒɛɛ ɔmmɔ bukpo na ɔbambadi úkpo kpakplaa ɔ́si ɔƒɛ kanukɔ. Na ɔƒɛƒɛɛ ɔmɛni úbo baalɔlɔ bamɛni ƒui útákya Ɛpugyie kemmo. Na baalɔlɔ bammɔ ɔdi biala ɔ́sɔ útebu na Egyipte kalɔ lɛlɔ.

²⁰Nsu Unwoti ɔ́ya na Ƒarao kayi kásɔ káyu ɔkplu na útete kuƒi na ɔya na Israelƒuɔ batɔlɔ.

²¹Amu na Unwoti ɔ́su Mose ɔnini, “Talaku kɔnu na eti atina katɔ na ndubɔya na lɛdisa susuusu bonwu lɛdi libo Egyipte kalɔ ƒui lɛlɔ.”

²²Anwuɔsu Mose ɔ́talaku kɔnu katɔ ɔ́tina kayaa na lɛdisa bonwu lɛ́ƒɔ Egyipte kalɔ ƒui emeyi atɛ sɔɔn.

²³Emeyi atɛ sɔɔn ukyuli ɔdi ulákana na ɔnu ɔkpanadi iye ɔkana na ɔlɛ kesii kani na ɔkya muedi. Nsu Israelƒuɔ keliekɔ aka keekeye uwi biala.

²⁴Amu na Ƒarao ɔ́lɔ Mose na ɔsu-nwu ɔnini, “Biteesie bitákpa Unwoti na bitiku bina beleku ku bebi muedi ƒaa, nsu bɛda bina bebuo lidu ƒui binyene kama.”

²⁵Amu na Mose údie kenye ɔnini, “Amu adubɔwia akpala ete-bu ku ani na bɔdubɔkyula bute Unwoti Katɔti lɛnɔ ete-bu.

²⁶Oowo ɔlɛka buti bula bebuo lɛnɔ bɔda. Na ɔdi ɔgbanvuo ulébu kama. Bebuo bammɔ badi na bɔdubuti bɔbla akpala. Na si búteduo tɔ mmɔ ni, buláti bani madia akpala ammɔ bɔbla bute bula Unwoti Katɔti.”

²⁷Nsu ɔmɛni kama Unwoti ɔ́ya na Ƒarao kayi kásɔ káyu ɔkplu na útete kuƒi na Israelƒuɔ batɔlɔ.

²⁸Anwuɔsu Ƒarao ɔ́bɔku Mose ɔnini, “Gyu tɔlɔ-mi anumi! Na nsɔ naaayɔ ka lɛsɔ lɛnu-ɔ kudii. Si lɛ́sɔ lɛ́nu-ɔ, adubukpi.”

²⁹Amu na Mose ɔ́su Ƒarao ɔnini, “Línu, ɔdubuse kalɛ kani na ásu, nsɔ lɛɛɛdubo-ɔ bɔnu kudii.”