Read Lelemi Israelƒuɔ Bɔlɛ 11 Bible Online

Israelƒuɔ Bɔlɛ 11 - Lelemi bible

Israelƒuɔ Bɔlɛ 11

¹Amu na Unwoti ɔ́su Mose ɔnini, “Ndubo Ƒarao ku Egyipteƒuɔ kɔtu kɔkladi bɔni. Na ɔmmɔ kama ni, ɔdubɔya na Israelƒuɔ batɔlɔ, na ɔdubo-mii bɔbɔku muedi.

²Anwuɔsu kɔ lɛsa na asu Israelƒuɔ ƒui ka bevele sika ɔƒualadi ku ugyiedi basiku bana liku bekyuli kudɔ.”

³Ɔsika Unwoti ɔ́ya na Egyipteƒuɔ beeti ɔbu teete Israelƒuɔ geen. Na sɔsɔ ni, Ƒarao benengu ku Egyipteƒuɔ ƒui baanu Mose ka ɔdi ukyuli ɔni náƒɔ kuye geen.

⁴Amu na Mose útásu Ƒarao ɔnini, “Lɛni na Unwoti ɔɔsu ɔnii, ‘Ɔmwi usien lɛdibantɛ ni, ndubɔvi Egyipte kalɔ ƒui lɛlɔ.

⁵Na ndubɔya na ukyuli biala ubi udeedi ɔni na ɔ́wɔ ukpi, ɔ́si Ƒarao ubidi udeedi ɔni nlie-nwu lɛgaboku lɛlɔ, úti útédu ulekubi kabla ɔblane ɔni nƒa lɛtabi kukɔ lɛlɔ, ku bebi bedeedi bani na bina bebuo báwɔ lɛnɔ ƒui lɛlɔ.

⁶Na kɔvanu kɔni udu nátalɛ tɔ dii na Egyipte na kɔsɔ kɔɔɔdubo bɔlɛ kudii lɛnɔ kɔdubɔlɛ limeyi lɛmmɔ.

⁷Nsu Israelƒuɔ keliekɔ aka ni, akpewe ina unwi muedi ulébo kudu na ukyuli iye ebuo ɔdi ɔsu.’ Na mmɔ na adubo bɔnu bɔti ka ami ɔni ndi Unwoti mɔɔkya kavumana Egyipteƒuɔ ku Israelƒuɔ ntɛ.

⁸Ƒula benengu ƒui badubɔlɛ akɔnkɔ na mina anumi na beteevele-mi banii, ‘Awɔ ku bani ƒui nsiaku-ɔ kama biteesie.’ Na ɔmmɔ kama ni, ndubɔtɔlɔ.” Amu na Mose ɔ́tɔlɔ Ƒarao anumi ku kɔnyi.

⁹Nsu Unwoti ɔ́su Mose úse ɔnini, “Ƒarao ɔdubo buni na ulénu ƒula litemi na ɔmmɔ ndubo bɔya na mina akɔla budie taatina akɔ katɔ ebu na Egyipte.”

¹⁰Na Mose ku Aaron bábla akɔla budie taatina lidu lidu amɛni na Ƒarao anumi, nsu Unwoti ɔ́ya na Ƒarao kayi kayu ɔkplu na útete kuƒi na Israelƒuɔ batɔlɔ.