Read Lelemi Israelƒuɔ Bɔlɛ 13 Bible Online

Israelƒuɔ Bɔlɛ 13 - Lelemi bible

Israelƒuɔ Bɔlɛ 13

¹Amu na Unwoti ɔ́su Mose ɔnini,

²“Die ubi ɔnanabi udeedi biala se-mi. Ɔsika Israelni kɔwɔ kudeedi ku bana bebuo ƒui kɔwɔ kudeedi kɔdi mina ɔdi. Na abla-ma sɛsɛɛ ete-mi.”

³Amu na Mose ɔ́su Israelƒuɔ bammɔ ɔnini, “Bise limeyi lɛmɛni likpo. Ɔsika lɛdi limeyi lɛni na bɛ́lɛ Egyipte kalɔ lɛlɔ na kesii kani na bɛ́kya bítaabla-ma kabla. Na ɔkɛnku Unwoti ɔyikun kabla kani na údie nwuna ɔyikun ɔ́bla ɔsu na ɔ́kpanku-mii ɔ́lɛku mmɔ. Anwuɔsu ukyuli biala utadi bodobodo ɔni na bɔnyii bɔkya-nwu kemmo limeyi lɛmmɔ lɛlɔ.

⁴Ɔmwi, na Abib kɔbuli kɔmɛni kemmo ni, bɛdubɔlɛ Egyipte kalɔ lɛlɔ.

⁵Na si Unwoti úti-mii úduoku Kanaanƒuɔ ku Hetiƒuɔ ku Amoriƒuɔ ku Hewiƒuɔ ku Yebusiƒuɔ kalɔ kamɛni kemmo ni, na bɛsia anu na bitaadi limeyi lɛmɛni na kɔbuli kɔmɛni kemmo. Kalɔ kamɛni na úse kenye úse úte bina bati kuuku ka kana egyiibi ntu bɔɔyu emini aani uwɔ na kana lɛlɔ bebuo baayu anyi ntu pii na aka na ɔdubuti ute-mii na kenwini bina kadikɔ.

⁶Na bitadi bodobodo ɔni na bɔnyii bɔkya-nwu kemmo emeyi maatɛ. Na limeyi maatɛdi lɛmmɔ lɛlɔ ni, na bɛdi limeyi lɛmmɔ biti bɛkɔliku Unwoti lɛnyi katɔ.

⁷Bɛdi bodobodo ɔni néteƒu emeyi maatɛ ammɔ kemmo. Na bɛnu ka lɛla biala kemmo na bɔnyii bɔkya ni, bídie-ni na bina akɔ ku bina amadɔ ƒui.

⁸“Na limeyi bɔdi bɔmmɔ lɛlɔ ni, su ƒ'ubidi anini, ‘Ɔkɛnku lɛla lɛni na mina Unwoti ɔ́bla úte-mi ɔni na lɛ́lɛ Egyipte kalɔ lɛlɔ ɔsu na mɔɔbla ɔmɛni.’

⁹Si bɛɛsia limeyi lɛmɛni anu taadi-ni ni, ɔdubunwini aani likposela ɔsia-mii kɔnu iye atɛntɛ ka ɔdi ka Unwoti ɔda bubo bɔsia-mii enyekuli lɛlɔ uwi ndi uwi. Ɔsika Unwoti ɔkɛnku nwuna kɔnu ɔyikun lɛlɔ na udie-mii ɔ́lɛku Egyipte kalɔ lɛlɔ.

¹⁰Na bɛnu ka bɛɛdi limeyi lɛmɛni na nina uwi lɛlɔ lɛkwa biala kemmo.

¹¹“Si Unwoti úti-mii úduoku Kanaanƒuɔ kalɔ kani na úse kenye úte amii ku bina bati kuuku ka weti wete-mii kemmo ni,

¹²na bɛnu ka bíti bina bebi bedeedi bani ndi bananabi ku bebuo bagyani bebi bedeedi bíte-nwu, ɔsika bana ƒui badi Unwoti badi.

¹³Na ebuo ala utine ubi udeedi ɔgyani ni, ti koƒonu ubi ɔgyani ɔkɔdi ƒɔ-nwu lili kayu na edie-nwu ngba. Si ɔɔɔdi lɛni ni, ɔdi na aƒɛ-nwu limɔ. Na bebi bananabi bedeedi lɛnɔ ni, ɔlɛka eti koƒonu kɔkɔdi kɔgyani aƒɔ-nwu lili kayu na edie-nwu ngba.

¹⁴“Na si ƒ'ubidi ɔnanabi úye-ɔ limeyi lɛdi ɔnini, ‘Lɛla lɛmɛni kalɔ ndi bi’ ni, na asu-nwu anii, ‘Ɔkɛnku Katɔti kɔnu ɔyikun ablala ɔsu na údie-bu ɔ́lɛku bekyuli bamba kabla bɔbla kalɔ na Egyipte kalɔ lɛlɔ.’

¹⁵Na bɛsu-ma bɛnii, ‘Uwi ɔni na Ɔga Ƒarao ɔ́yu kayi ɔkplu na ɔnii ulatuna na Israelƒuɔ batɔlɔ ni, Unwoti ɔ́du ɔnanabi udeedi ku ebuo ubi ɔgyani udeedi biala na báwɔ na Egyipte kalɔ lɛlɔ. Ɔmɛni ɔsu na buuti bula bebuo bebi bagyani bedeedi taakpa teete Unwoti. Na buuti baƒonu bagyani bakɔdi taaƒɔ́ bula bebi bananabi bedeedi lili kayu teedie-ma ngba.’

¹⁶Na ɔmɛni ɔdubɔbla likposela ɔsia-mii kɔnu ku atɛntɛ ka Unwoti ɔkɛnku nwuna kɔnu ɔyikun lɛlɔ údie-bu ɔ́lɛku Egyipte kalɔ lɛlɔ.”

¹⁷Uwi ɔni na Ƒarao úte kuƒi ka Israelƒuɔ batɔlɔ ni, Katɔti úteti-ma útasiaku Ƒilistiƒuɔ kalɔ kemmo, ina ka mmɔ ulu use klukwii. Mmomu bɔsu na Katɔti ɔ́su ɔnini, “Si bekyuli bamɛni bátásiaku kekpo kadi ni, badubo kasusu bɔvumana ka benwini besie Egyipte kalɔ lɛlɔ.”

¹⁸Anwuɔsu Katɔti ɔ́tɔnku-ma na bénwini bátásia ketele ulu ɔni ntɛ úsie Ɛpugyie mmɔ lɛlɔ. Na Israelƒuɔ báda lɛlɔ aani bekpone kalɛ asa na bálɛ Egyipte kalɔ lɛlɔ.

¹⁹Na uwi ɔni na Israelƒuɔ bésela ni, Mose úti Yoseƒ ekubi ɔ́da. Yoseƒ ɔ́ɔya na Israelƒuɔ bése-nwu kenye lɛni, ɔsika ɔ́ɔsu-ma kukuuku ɔnini, “Katɔti ɔdubo-mii kebunku kadi bute uwi ɔdi kemmo. Anwuɔsu si úbo úte lɛni ni, na biti mina ekubi bɛtɔlɔku si bɛɛtɔlɔ.”

²⁰Na ka Israelƒuɔ bátɔlɔ Sukot ni, bátálɛlɛ na Etam ketele kudɔ.

²¹Si bakɛ ɔƒiiwi ni, Unwoti ɔɔtɔ-ma anumi aani liƒlukutu lɛkpa bonwu lɛdi. Lɛni kani na ɔɔtɔ-ma anumi usien lɛnɔ aani lɛgyavonku bonwu na uute-ma bukeye kalɛ na bakana na besie usien ku ɔƒɛ.

²²Na usien ku ɔƒɛ biala ni, liƒlukutu iye lɛgyavonku bonwu lɛmmɔ lɛɛtɔ-ma anumi.