Read Lelemi Israelƒuɔ Bɔlɛ 16 Bible Online

Israelƒuɔ Bɔlɛ 16 - Lelemi bible

Israelƒuɔ Bɔlɛ 16

¹Amu na Israelƒuɔ bammɔ ƒui báta bási Elim na bétédu Sin ketele kemmo, na ketele kani nkya Elim ku Sinai ntɛ. Na ka bálɛ Egyipte kalɔ lɛlɔ ni, na ɔdi kɔbuli kunyɔdi limeyi leevu-lɛlɔndi lɛlɔ.

²Na ketele kemmo mmɔ ni, bekyuli bammɔ ƒui bakya baadɔnku Mose ku Aaron banini,

³“Si nka bɔdu mmomu na Unwoti ɔ́du-bu na Egyipte nka ɔdia-bu utulo ɔni na búbo bɔkya mɛni. Ɔsika na mmɔ ni, nka bɔɔnwá adila ani bɔɔyɔ́ na bɔɔdi kaduɛ. Nsu bíti-bu bíboku ketele kamɛni kemmo ka bise-bu kɔka bɛdu.”

⁴Amu na Unwoti ɔ́su Mose ɔnini, “Ndubɔya na adila ataana taasi katɔ teete-mii aani ɔnantu. Na limeyi ndi limeyi ni, ya na bekyuli bammɔ balɛ na batála kalɛ kani medu-ma bɔdi limeyi kenye. Na ɔmɛni ndubuti bɔkɔku-ma bɔnu si badubo mina ɔda bubo lɛlɔ bɔdi.

⁵Na limeyi lɛkundi lɛlɔ ni, ɔdi biala ɔla kalɛ ndubudu-nwu emeyi anyɔ.”

⁶Anwuɔsu Mose ku Aaron básu Israelƒuɔ bammɔ ƒui banini, “Ɔmwi useyi ɔmɛni ni, bɛdubɔti ka Unwoti náda-mii údie Egyipte kalɔ lɛlɔ.

⁷Na si údu ɔtanta ni, bɛdubɔnu Unwoti bukeye bonwu, ɔsika únu bina enyekpi ani ƒui bɛkya bɛɛsu teewi-nwu. Na bi ɔsu na abu na ɔlɛka biti kɔnyi bɛkya?”

⁸Amu na Mose ɔ́sɔ ɔ́su-ma ɔnini, “Bɛdubɔti ka anwu ndi Unwoti si uwi ɔni na úte-mii lɛna na bɛ́kun useyi, na úte-mii bodobodo ɔni ƒui na bɛɛwia na bɛ́di ɔtanta, ɔsika únu kalɛ na bíti kɔnyi kemmo bɛɛsu etemila teewi-nwu. Bi na abu bɔdi? Ɔɔɔdi abu na bɛɛdɔnku, mmomu Unwoti.”

⁹Amu na Mose ɔ́su Aaron ɔnini, “Kɔ lɛsa te Israelƒuɔ ƒui anini, ‘Bibo bibenye Unwoti anumi, ɔsika únu kalɛ na bɛkya bɛɛdɔnku-nwu.’ ”

¹⁰Uwi ɔni na Aaron ɔkya ɔɔtɛmi teete bekyuli bammɔ ni, bénwini anumi bátina ketele kammɔ. Mmɔ na Unwoti bukeye bonwu bɔ́bwɛ bɔ́lɛ kɔnakunwi na liƒlukutu kemmo.

¹¹Amu na Unwoti ɔ́su Mose ɔnini,

¹²“Su Israelƒuɔ bammɔ anini, línu bana etemila ani bakya baasu teewi-mi. Ɔmmɔ ɔsu si úsela useyi uwi ni, badubɔkun lɛna. Na ɔtanta lɛnɔ badubɔkɛ bodobodo ɔni baawia badi. Mmɔ na badubɔnu bɔti ka ami Unwoti ndi bana Katɔti.”

¹³Useyi ɔmmɔ ni, baasɛ wɛlɛ wɛlɛ badi báyu bébewi bana kakyakɔ mmɔ yuu. Na ɔtanta ni, amii áyu ámana bana kakyakɔ mmɔ.

¹⁴Na uwi ɔni na amii ammɔ ákwii ni, kɔlɛmii kɔdi nse aani etubankɛ kɔtakɛ áyu ewi ámana ketele mmɔ ƒui.

¹⁵Ka Israelƒuɔ bánu lɛla lɛmmɔ ni, balati lɛla lɛni lɛdi. Amu na bakya beeye lɛlɔ banii, “Bi na ɔdi mɛni?” Amu na Mose ɔ́su-ma ɔnini, “Ɔmɛni ndi adila ani na Unwoti úte-mii ka bɛdi.

¹⁶Na úbo-mii ɔda ka ɔdi biala ɔla kalɛ kani medu-nwu bɔdi. Anwuɔsu kaduli biala ukyuli biala ɔla kalɛ medu-nwu bɔdi aani kalaku kenwi keyile.”

¹⁷Amu na Israelƒuɔ bábla kalɛ kani na Mose ɔ́su-ma. Na badi bála-nwu pii na badi lɛnɔ bála blii suɛ.

¹⁸Na ka bákɔku-nya na akyami kemmo ni, ukyuli ɔni násala adila pii ni, uuubo-nya utuloku kalɛ na ɔ́manku-nwu. Na ukyuli ɔni lɛnɔ na adi blii suɛ kani na ɔ́sala ni, ɔɔkɛ́ kalɛ na ɔ́manku-nwu.

¹⁹Amu na Mose úbo-ma ɔda ɔnii, “Ukyuli biala utada nwuna adila ammɔ adi utese na kadi kegye-nya lɛlɔ.”

²⁰Nsu badi bátadi Mose ɔda bubo bɔmmɔ lɛlɔ. Na báda bana adila ammɔ adi bése na kadi kégye-nya lɛlɔ. Na bani náda bana adila bese na kadi kégye ni, beklubi béyii-nya kemmo na eenwenyi geen. Anwuɔsu Mose úti kɔnyi geen ɔ́kya-ma.

²¹Na ɔtanta biala ɔdi biala ɔɔla kalɛ kani wakana bɔdi. Na si ɔƒɛ ɔ́bi ni, ɔni muubú ƒui ɔɔnani na ɔɔyii taakya.

²²Na limeyi lɛkundi ni, bála adila ammɔ akpa anyɔ kalɛ na wedu-ma bɔdi emeyi anyɔ, ɔni mabla aani kɔlaku kɔmmɔ inyɔ inyɔ ɔdi biala. Amu na lɛtɔ benengu bammɔ ƒui bésie Mose kudɔ bátásu-nwu lɛla lɛni mɔɔlɛ́.

²³Amu na ɔ́su-ma ɔnini, “Lɛni na Unwoti úbo ɔda ɔnini, ‘Kɔnaadi ɔdi Lɛnwunameyi kedee ute ami Unwoti. Anwuɔsu biƒi lɛla biala na bɛɛyɔ́ ka biƒi, na biƒulo lɛla biala na bɛɛyɔ́ ka biƒulo. Na bɛklibi lɛla biala nébu bise bite kadi kegye.’ ”

²⁴Anwuɔsu báklibi lɛla biala nébu bése aani kalɛ kani na Mose ɔ́su-ma mmɔ, na beklubi béteduo iye enwenyi.

²⁵Amu na Mose ɔ́su-ma ɔnini, “Bɛdi adila ammɔ ɔmwi, ɔsika Lɛnwunameyi lɛdi ute Unwoti, na bɛɛɛdubo lɛla biala bɔnu bɔla ɔmwi.

²⁶Emeyi aku na bɛdubɔla-nya, nsu limeyi maatɛdi lɛdi Lɛnwunameyi na lɛla biala lilayu.”

²⁷Nsu ɔmɛni ƒui kama ni, bekyuli badi bálɛ limeyi maatɛdi lɛmɛni lɛlɔ bésie batánu si badubɔkɛ lɛla lɛdi, nsu bátanu lɛla lɛdi.

²⁸Amu na Unwoti úye Mose ɔnini, “Uwi ɛlɛ sɔɔn na amii Hebriƒuɔ bɛdubuni mina ɔda bubo lɛlɔ bɔdi bitédu?

²⁹Binyimo ka ami Unwoti nédie Lɛnwunameyi lɛmɛni líte-mii. Ɔmɛni ɔsu limeyi lɛkundi biala lɛlɔ ndubute-mii adila ani ndubudu-mii emeyi anyɔ. Na ukyuli biala utalɛ nwuna kaduli utesie kesi kesii limeyi maatɛdi lɛmmɔ lɛlɔ.”

³⁰Ɔmɛni ɔsu bekyuli bammɔ bánwuna limeyi maatɛdi lɛmmɔ lɛlɔ.

³¹Na Israelƒuɔ násia adila ani baadi mmɔ lɛnyi banii manna, na nwuna kalɔ ndi ɔnii, “Bi na ɔdi mɛni?” Ɔsika úse aani kugyii ebi ƒututuu blii suɛ adi. Na nwuna emini ese aani agyila ani bakya uwɔ nwuna kemmo.

³²Amu na Mose ɔsu ɔnini, “Unwoti úbo-bu ɔda ɔnini, ‘Bɛklibi manna ɔmmɔ kalaku keyile bise bite bina bawɔ bawɔ kalɛ na ama lɛnɔ babanu adila ani na líte-mii na bɛ́di na ketele kemmo uwi ɔni na lɛ́ƒɔ-mii lɛ́siku Egyipte kalɔ lɛlɔ.’ ”

³³Amu na Mose ɔ́su Aaron ɔnini, “Wia ɔsii ɔdi na eti manna ɔmmɔ ɔdi aani omar bɔkɔku akya-nwu kemmo. Na eti ese Unwoti anumi. Ɔmɛni ɔdubuse bute bula bawɔ bawɔ.”

³⁴Aaron ɔ́bla kalɛ na Unwoti úbo Mose ɔda mmɔ pɛpɛɛpɛ na úti manna ɔmmɔ ɔdi úse Bunyimi Adaka ɔmmɔ anumi kalɛ na bada bese kama bete bawɔ bammɔ.

³⁵Na Israelƒuɔ bádi manna ɔmɛni akwa aavlene sɔɔn úti útédu ka bédu Kanaan kalɔ ɔmii lɛlɔ.

³⁶Omar bɔkɔku bɔmɛni mabla aani kalaku kenwi.