Read Lelemi Israelƒuɔ Bɔlɛ 22 Bible Online

Israelƒuɔ Bɔlɛ 22 - Lelemi bible

Israelƒuɔ Bɔlɛ 22

¹“Si ukyuli ɔdi úyu ɔmantɛ akɔ iye koƒonu na ɔ́du-ku iye úti-ku úye ni, ɔlɛka ɔƒɔ ɔmantɛ bakɔ ɛlɔ kayu na akɔ ɔgyani ɔni na úyu lili, na ɔlɛka ɔƒɔ baƒonu ine kayu na koƒonu kɔni na úyu lili.

²“Si uyune ɔ́bwɛ úduo ukyuli ɔdi kesii uuyú na báƒiɛmi-nwu lɛla lɛdi na úkpi ni, ukyuli ɔni náƒiɛmi-nwu lɛla lɛdi mmɔ útewi ubugya kalɔ keeke.

³Nsu si kadi kéegye nwaa asa na ɔ́du-nwu ni, na ɔ́ƒiɔ ka úwi ubugya kalɔ keeke. “Uyune ɔlɛka ɔƒɔ lɛla lɛni na úyu kayu. Nsu si uuubo egulabi ani na uti ɔƒɔ kayu kammɔ ni, ɔlɛka beti anwu ɔlati beye na beti baƒɔ kayu kammɔ.

⁴“Ɔƒɛni si bánu ebuo ɔni na úyu mmɔ ku ngba na nwuna kudɔ na ɔdi ɔmantɛ akɔ iye ebuo ala utine iye koƒonu ni, ɔlɛka ɔƒɔ kayu kammɔ akpa anyɔ.

⁵“Si ukyuli ɔdi ɔ́kpanku nwuna bebuo úsienku kadikɔ na bebuo bammɔ bávia bétéduo ukyuli bamba kemo na bébile-nwu ala ni, ɔlɛka eti ƒula edula abuni aƒɔ kayu kammɔ na ani na bébile kenye.

⁶“Si ɔdi ɔ́kya nwuna kemo ogya na ogya ɔmmɔ ɔ́via útákyula ukyuli bamba edula ani nnye-nwu kemo iye ɔ́kyula-nwu kemo kammɔ ƒui ni, ɔlɛka ukyuli ɔni nákya ogya ɔmmɔ uti kemo kammɔ udu bamba ɔƒɔ ɔni ala na úbile kayu.

⁷“Si ukyuli ɔdi únu kalɔ ka ɔƒɔ ɔkpanadi egulabi ɔda-nwu iye utaanu nwuna akɛla lɛlɔ teete-nwu na egulabi iye akɛla ammɔ abayi na ɔ́nu ukyuli ɔni néyu ala ammɔ ni, ɔlɛka uyune ɔmmɔ ɔƒɔ ala ani náyi mmɔ kayu akpa anyɔ.

⁸Nsu si bátanu ukyuli ɔni néyu ala ammɔ ni, ukyuli ɔni kudɔ na ala ammɔ ese asa na áyii mmɔ ɔlɛka usie litemi batɛne anumi, na útédie lɛlɔ kenye na banu si ɔɔɔdi anwu néti egulabi ammɔ sɔsɔ.

⁹Na si unyeƒi ɔdi ubo nkyuli inyɔ ntɛ na akɛla adi lɛlɔ aani ɔmantɛ bakɔ iye baƒonu iye adala lɛlɔ iye lɛla biala náyi lɛlɔ ni, ɔlɛka beti-ma besienku litemi batɛne anumi na ukyuli ɔni na litemi batɛne bammɔ bádu kɔtɔ ɔlɛka ɔƒɔ ala ani lɛlɔ baakya unyeƒi mmɔ kayu kunyɔ ute ukyuli ɔni geen mbo ala ammɔ.

¹⁰“Si ukyuli ɔdi únu kalɔ ka ɔƒɔ ɔkpanadi ebuo ala utine iye ɔmantɛ akɔ iye koƒonu iye ebuo biala utaatumini, na ebuo ɔmmɔ úbekpi iye nwuna lɛlɔ kesii kadi kaƒɔ ɔlɛ iye bebeyu ebuo ɔmmɔ na ukyuli biala utanu ni,

¹¹ukyuli ɔmmɔ ɔlɛka usie utákpali ala use kenye na Katɔti anumi ka ɔɔɔdi anwu néyu ebuo ɔni bete-nwu bɔda mmɔ. Na si ɔɔɔdi buyu na beyu ebuo ɔmmɔ ni, utalɛka ɔƒɔ ukyuli ɔni néte-nwu ebuo bɔtumini mmɔ kayu kadi. Ebuo ɔlati uti-nwu lɛni kani.

¹²Nsu si buyu na béyu ebuo ɔmmɔ ni, ɔlɛka ɔƒɔ ebuo ɔlati kayu.

¹³Na si ebuo ukpidi ɔdi lɛnɔ nádu-nwu ni, ɔlɛka uti ebuo ukpine kakɛ kani nébu ubatina. Na si úbo lɛni ni, utalɛka ebuo ɔdane ɔmmɔ ɔƒɔ kayu kadi ute ebuo ɔlati.

¹⁴“Na si ukyuli ɔdi ɔ́ƒɔ ɔkpanadi ebuo ɔɔtumini, na nwuna kesii kadi káƒɔ ɔlɛ iye úkpi ɔni ɔlati uuubo asa na ebuo ɔmmɔ úkpi ni, ɔlɛka ebuo ɔdane ɔmmɔ ɔƒɔ ebuo ɔmmɔ kayu ute ebuo ɔlati.

¹⁵Nsu si ebuo ɔlati ɔkya asa na ebuo ɔmmɔ úkpi ni, útalɛka ebuo ɔdane ɔmmɔ ɔƒɔ kayu kadi ute ebuo ɔlati. Na si bádi ebuo ɔdi kuye ka utábla kabla kadi ute-nwu asa na ebuo ɔmmɔ úkpi ni, kuye kɔni bádi mmɔ kani na ɔlɛka ɔƒɔ.

¹⁶“Si ɔnana ɔ́tɔlɔ adagyaa ɔdi na anwu ku-nwu bátɛ ni, ɔlɛka ɔƒɔ-nwu elila. Na ɔmmɔ kama uti uleku ɔmmɔ.

¹⁷Nsu si uleku ɔmmɔ ɔti útenu kalɔ ka ɔnana ɔmmɔ uti-nwu ni, ɔlɛka ɔƒɔ kayu kani námanku uleku buti ute ɔti ɔmmɔ.

¹⁸“Na uleku biala matɛya kalɛ beebó like ni, bɔdu ɔlɛka badu-nwu.

¹⁹“Ukyuli biala na anwu ku ebuo ɔdi bátɛ ni, ɔlɛka badu ukyuli ɔmmɔ.

²⁰“Ukyuli biala matábla akpala mete unwoti ɔdi ɔni na ɔɔɔdi Katɔti ni, ɔlɛka badu-nwu.

²¹“Na ukyuli ɔdi utabla ɔƒɔ ɔdi kalala, ɔsika binyimo ka amii lɛnɔ bɛ́bla baƒɔ dii na Egyipte.

²²“Na bitabla ukpinele iye ukpinebi ɔdi kalala. Na si ɔdi ɔ́bla unyeƒi ni, amii Unwoti ndubo-ma kenye budie si béwulo bákpali-mi ka baawia mina kebunku.

²³Na si ɔdi ɔ́kya unyeƒi na béwulo bákpali-mi ni, ndubunu bana bɔkpali.

²⁴Na ndubuti kɔnyi lɛkya-mii, na lɛdu-mii ku kewii, na bina beleku benwini bekpinele, na bina bebi lɛnɔ babla bekpinebi.

²⁵“Na si bívo egulabi adi bíte mina bekyuli ni, bitabla lɛlɔ aani bekyuli bani muuvó egulabi teete bekyuli bamba kalɛ. Bitaƒɔ kuvonsia bitasia-nwu lɛlɔ.

²⁶Na si ɔdi ɔ́ƒɔ ɔkpanadi kɔdi ɔkpa ni, na ɔsɔku-ku ute-nwu asa na ɔƒɛ ɔnu.

²⁷Ɔsika aku kani na ubo na uuti taabɛ kɔyɔ. Na si éteti étete-nwu ni, bi na uti ubi lɛlɔ usien? Na si áyu atuɔkplu na úwulo ɔ́kpali-mi ni, ndubunu-nwu bɔkpali. Ɔsika ndi Katɔti ɔni mbo kaƒɔ bɔkywi.

²⁸“Na bitetemi enyekpi na bina Katɔti lɛlɔ. Na ɔdi utewida bina batɔnkune.

²⁹“Na biteni-mi bina edula ku ntɛ akpala buboku. “Na biti bina bebi bananabi bedeedi bani bɛ́wɔ bite-mi.

³⁰“Na bina ɔmantɛ bakɔ ku baƒonu bebi bedeedi bani bawɔ ni, biti-ma bite-mi. Nsu bɛya na basɔ bakya bana beni kudɔ emeyi maatɛ. Na limeyi maanedi lɛlɔ asa biti-ma biboku-mi.

³¹“Bise likpo ka bɛdi mina bekyuli kedee, anwuɔsu bitakun lɛla lɛni na eƒiebuo náduli-nwu ɔ́du. Mmomu biti ebuo ɔmmɔ bite bakpewe na bakun.”