Read Lelemi Israelƒuɔ Bɔlɛ 26 Bible Online

Israelƒuɔ Bɔlɛ 26 - Lelemi bible

Israelƒuɔ Bɔlɛ 26

¹“Biti aduni abuni kpɛtɛ kpɛtɛ ani náƒɔ kuye geen na bámii-nya ku kɔbuli buluu ku kugyiedi kɔni náƒɔ kuye na ukyuli ɔni ngyi budi geen údi Kerub bebweyi ɔ́kya-nya kemmo na biti bɛbla Adi Kevo kammɔ.

²Adi ammɔ ƒui bune ku bɔbɛbɛ bɔbla bɔkɔku bunwi bɔni mabla aani bune lɛgba aavlene-inyɔ ku bɔbɛbɛ lɛgba ɛku.

³Ya na baka aduni alɔ basala kakɛ kenwi na baka alɔ basala kakɛ kanyɔdi.

⁴Na beti aduni buluu buni gyɛlɛɛ baka-nwu kunu kunu na eƒi atɛ-nwu kemmo na baka bada aduni enengudi ammɔ atu ɔvi unwi. Na babla lɛni kani ku lɛduni linengudi linyɔdi lɛnɔ atu na ɔvi unyɔdi.

⁵Na aduni wɛlɛ wɛlɛ ani báka kunu kunu mmɔ ku eƒi abla liti na aduni enengudi ammɔ atu ɔvi ɔni ku ɔni. Na kesii kani na eƒi ammɔ ada mmɔ eti lɛlɔ atina lɛlɔ.

⁶Na eti sika ugyiedi abla abalala liti ani muuƒie adi taasala. Na eti eƒie aduni enengudi ammɔ atu ammɔ asala na ɔbla Adi Kevo kenwi.

⁷“Ti bese linwini bla aduni leevu-unwi na eti ebi kevo kammɔ eli.

⁸Na aduni ammɔ ƒui bune bɔbla unwi ɔni ndi lɛgba aavlene-ɛlɔ na bɔbɛbɛ bɔdi lɛgba ɛku.

⁹Ka aduni alɔ sala ɔvi unwi na aka aku asala ɔvi unyɔdi, na aƒɛ lɛduni lɛkundi asia ɔkpanadi lɛlɔ na kevo kammɔ kayakun kenye.

¹⁰Ti lɛduni bamba na aka eƒi kunu kunu liti ada kayakun aduni ammɔ kɔtu ɔvi unwi na abla lɛni kani ku ɔvi unyɔdi.

¹¹Na eti abuala egyiedi abla kayakun kɔbalakɔ liti akya eƒi ammɔ kemmo na bataabala Adi Kevo kammɔ ƒui taasala.

¹²Na eti kɔdi kakɛ kakladi kani nebu mmɔ aƒala Adi Kevo kammɔ kama.

¹³Kevo aduni ammɔ adubo bune ɔgba bɔkɔku kakɛ butulo kevo kammɔ, na ɔmmɔ ɔdubo bɔyɔlɔ na kana lɛƒɛnyi lɛmmɔ kalɛ na utile kevo kammɔ.

¹⁴Na awia baƒonu lɛku lɛni na békpeyi na bákya-ni kuvo na lígyie kaduɛ abla kevo kammɔ katɔ libila, asa na eti ketu bebuo benengudi lɛku ebi ɔmmɔ katɔ.

¹⁵“Ti akasia kugyiikɛ sa eku eku gyi kevo kaduli ɔban.

¹⁶Na liku biala bɔkuku bɔdi lɛgba leevu-ɛlɔ, na nwuna bɔbɛbɛ bɔdi lɛgba inyɔ ku kakɛ.

¹⁷Na lɛgba inyɔ bɔkya liku biala kalɔ. Lɛni sɔɔn na adubo eku ammɔ ƒui bɔbla.

¹⁸Na kevo kaduli kammɔ kada kakɛ ni, sa eku ammɔ aavlanyɔ.

¹⁹Na eti sika ɔƒualadi abla lɛgba lɛmmɔ agbanvuo aavlene. Na ɔgba biala ɔƒɔ unwi, na liku biala lɛda inyɔ.

²⁰Na kevo kaduli kammɔ katɔ kakɛ lɛnɔ ni, sa eku ammɔ aavlanyɔ.

²¹Na abla sika ɔƒualadi agbanvuo aavlene akya-ni kalɔ, na liku biala lɛda inyɔ.

²²Na asa eku aku akya ɔƒɛ kanukɔ na kevo kaduli kammɔ kawɔlɔkɔ.

²³Na asa eku anyɔ akya lɛkɔkɔ inyɔ lɛni nkya kaduli kawɔlɔkɔ ƒui.

²⁴Na lɛkɔkɔ inyɔ lɛmɛni ni, sala ligyii lɛmmɔ inyɔ ɔ́si kalɔ útédu katɔ, na lɛgba inyɔ bɔmmɔ buduo ɔgbanvuo unwi kemmo. Na lɛkɔkɔ lɛkladi lɛnɔ lɛni kani.

²⁵Anwuɔsu eku ammɔ adubo bɔbla maane ku nina kalɔ sika ɔƒualadi agbanvuo leevu-ɛku ɔni na liku biala lɛda inyɔ.

²⁶“Na ɔmmɔ kama ni, na eti akasia ligyii ábla lɛtagyii ɛlɔ asia kevo kammɔ ɔƒɛnyi unwi.

²⁷Na asia lɛtagyii ɛlɔ bamba na ɔƒɛnyi unyɔdi lɛnɔ na asia ɛlɔ na ɔƒɛ kanukɔ na kevo kammɔ kawɔlɔkɔ ƒui.

²⁸Na ɔtagyii ɔni na ntɛntɛ ɔlɛka une ɔsi ligyii lɛni nnye ntɛ mmɔ ɔvi unwi úsie ɔkladi.

²⁹Na eti sika ugyiedi akwa ligyii lɛni nnye mmɔ lɛlɔ ƒui na eti sika ugyiedi kɔkwɛnimi ada lɛtagyii lɛmmɔ na akwa ani lɛnɔ ku sika ugyiedi.

³⁰“Lɛ kevo kammɔ kalɛ kani na bédie bátina-a na kɔbi lɛlɔ pɛpɛɛpɛ.

³¹“Na eti unwo buluu ku ugyiedi ɔni náƒɔ kuye edi kɔdi kɔbunidi. Na aya na ala udine ɔbuni udi Kerub ɔkya-nwu kemmo.

³²Na eti sika ugyiedi kɔkwɛnimi akya-nwu aƒala akasia ligyii ine lɛni na bákwa ku sika ugyiedi na linye sika ɔƒualadi lɛka lɛlɔ mmɔ lɛlɔ.

³³Kɔdi kɔmmɔ kutaaƒa sika ugyiedi kɔkwɛnimi kɔmmɔ lɛlɔ lɛni na eti Bunyimi Adaka ɔni kemmo na atabi anyɔ akya mmɔ ese kɔdi kɔmmɔ kama. Na kɔdi kɔmmɔ ndubule kakpakɔ kammɔ kedeedikɔ bɔsiku kesii kani nse kedee ketulo ƒui kudɔ.

³⁴Na eti likpidi bɔkyiɛ liboku libila lɛmmɔ asia Bunyimi Adaka ɔmmɔ lɛlɔ na kesii kani nse kedee ketulo ƒui mmɔ.

³⁵Na edie ala kasiakɔ kammɔ alɛ aduni ammɔ kama na kevo kammɔ kada kakɛ na eti asogya kasiakɔ kammɔ alɛ-nwu anumi na kada kakɛ mmɔ.

³⁶“Na kevo kammɔ kayakun ni, ti unwo buluu ku ugyiedi ɔni náƒɔ kuye na udine údi bla kayakun kɔdi.

³⁷Na awia kɔkwɛnimi kɔbaladi kɔni ndubo kayakun kɔdi kammɔ butaada, ku akasia ligyii ɛlɔ lɛni bákwa ku sika ugyiedi na eti abuala egyiedi abla agbanvuo ete-ni.