Read Lelemi Israelƒuɔ Bɔlɛ 27 Bible Online

Israelƒuɔ Bɔlɛ 27 - Lelemi bible

Israelƒuɔ Bɔlɛ 27

¹“Ti akasia kugyiikɛ bla bɔkyula lɛkpabi, na ɔkuku lɛgba ine ku kakɛ na bɔbɛbɛ ku bune ƒui bɔdi lɛgba maatɛ ku kakɛ ɔvi ɔni ku ɔni.

²Na anwi bebuo ese adanku lɛbi lɛmmɔ lɛkɔkɔ ine bɔmmɔ ƒui sala bla unwi na eti abuala egyiedi ammɔ anwamana akwa lɛbi lɛmmɔ ku ese ammɔ lɛlɔ ƒui.

³Na eti abuala egyiedi avɔ oloƒui bɔkyula lɛlɔ ala aani ntɔ kewikɔ ebui ku ogya budie kalɛkɛ ku soƒi ku oloƒui uyɔ bubo lɛkyami ku kɔbwɛlɛmii kɔni mɔɔda agyabi ku ɔni baatu lɛna ƒui.

⁴Ti abuala egyiedi bla lɛla lɛni kemmo na ntɔ bɔdubo butaalɛ na abuala egyiedi kɔkwɛnimi kɔda-nwu atu ene ɔmmɔ.

⁵Biti ntɔ bɔƒɔ lɛbuala lɛmmɔ bɛkya lɛbi lɛmmɔ kalɔ na ɔkuku ubedu-ni ntɛ bule.

⁶Ti akasia bla ligyii gyɔlɔɔ na eti abuala egyiedi akwa ligyii lɛmmɔ lɛlɔ.

⁷Na eti ligyii lɛmmɔ akya kɔkwɛnimi kɔmmɔ kemmo na lɛkya lɛƒɛnyi lɛmmɔ si bágyu béti.

⁸Bo kugyiikɛ kɔmmɔ danku lɛlɔ mana bla adaka ɔmmɔ na katɔ ku kalɔ keteewi. Na abla-nwu asiaku kalɛ na lídie lɛ́tina-a na kɔbi lɛlɔ mɛni kani.

⁹“Kya kaduli mana kevo kammɔ na kene lɛgba eti atɛ na baƒala aduni kpɛtɛ kpɛtɛ abuni geen bamana-ka.

¹⁰Na aduni ammɔ adubo bɔƒa ligyii aavlanyɔ lɛlɔ na abuala egyiedi ɔka ɔkya-ni kalɔ na kɔkwɛnimi kɔni ndubo aduni ammɔ bɔbala kɔbla sika ɔƒualadi na sika ɔƒualadi aduni wɛlɛ wɛlɛ adubo bɔka bɔmana ligyii lɛmmɔ lɛlɔ.

¹¹Katɔ kakɛ lɛnɔ lɛgba eti atɛ. Na aduni ammɔ adubo bɔƒa ligyii aavlanyɔ lɛlɔ na abuala egyiedi ɔka ɔkya-ni kalɔ na kɔkwɛnimi kɔni ndubo aduni ammɔ bɔbala kɔbla sika ɔƒualadi na sika ɔƒualadi aduni wɛlɛ wɛlɛ adubo bɔka bɔmana ligyii lɛmmɔ lɛlɔ.

¹²“Na kevo kammɔ ɔƒɛ kanukɔ kawɔlɔkɔ kakɛ ni, mmɔ kadubo bɔbla lɛgba liti ku aavlanyɔ-ɛlɔ, na ligyii leevu ku nina kalɔ ɔka leevu ndubo mmɔ bɔkya.

¹³Na kɔwɔlɔkɔ kani nésie ɔƒɛ katukɔ kakɛ ni, kaduli kammɔ bubomo bɔbla lɛgba liti ku aavlanyɔ-ɛlɔ.

¹⁴Na mmɔ ni, aduni ani bune ndi lɛgba aavlanyɔ-inyɔ ku kakɛ ndubo bɔƒa ligyii ɛtɛ lɛni ndubo bunye nina kalɔ ɔka ɛtɛ lɛlɔ na kayakun ɔvi unwi.

¹⁵Na aduni bamba lɛgba aavlanyɔ-inyɔ ku kakɛ bune bɔdubo bɔƒa ɔvi unyɔdi na ligyii ɛtɛ lɛni ndubo bunye nina ɔka ɛtɛ lɛlɔ.

¹⁶“Na kaduli kammɔ kayakun ni, ya na udine uti aduni buluu ku egyiedi ani náƒɔ kuye na udi-nya kaduɛ bune lɛgba avlaatɛ na eti aƒala ligyii ine bɔni na adubo buti bunyene ɔka ine lɛlɔ na mmɔ.

¹⁷Na ligyii lɛni ƒui ndubo bunye bɔmana kaduli kammɔ ni, ɔdi ka beti sika ɔƒualadi aduni wɛlɛ wɛlɛ baka bamana-ni ku sika ɔƒualadi kɔkwɛnimi kɔni mɔɔbala ala na ligyii ine lɛmmɔ ɔdi biala unye ɔka lɛlɔ.

¹⁸Kaduli kammɔ ƒui bune bɔdi lɛgba eti atɛ ku bɔbɛbɛ lɛgba liti ku aavlanyɔ-ɛlɔ. Na eti adi kpɛtɛ kpɛtɛ abuni ani na bámii básala kaduɛ na ana bune bɔdi lɛgba maatɛ ku kakɛ baƒala ligyii lɛni nnye nina abuala egyiedi ɔka lɛlɔ mmɔ.

¹⁹Na kevo kammɔ lɛlɔ ala bamba biala ku ewele ani nda kevo kammɔ ku kaduli kammɔ lɛlɔ ala ƒui abla abuala egyiedi sɔɔn.

²⁰“Su Israelƒuɔ na beboku nnɔ bɔni na bédie básiku nnɔ egyii kemmo na buse kede kede ute asogya ɔmmɔ kalɛ na utaada uwi ndi uwi.

²¹Na beti asogya ɔmmɔ balɛ Adi Kevo kemmo kesii kani na mɔɔsiáku-mii mmɔ ku aduni ani nƒa mmɔ anumi asa na adubuduo adaka ɔmmɔ kudɔ. Na Aaron ku nwuna bebi banu ka lɛsogya lɛmmɔ ƒui lɛɛda na Unwoti anumi mmɔ ɔ́si useyi uwi útálɛ kadi bugye. Ɔmɛni ɔdi bunyimi bɔni na Israelƒuɔ ɔdi ka bese likpo na bataadi-mu lɛlɔ uwi ndi uwi.”