Read Lelemi Israelƒuɔ Bɔlɛ 28 Bible Online

Israelƒuɔ Bɔlɛ 28 - Lelemi bible

Israelƒuɔ Bɔlɛ 28

¹Amu na Unwoti ɔ́su Mose ɔnini, “Ƒ'ɔnwani Aaron ku nwuna bebi bani ndi Nadab ku Abihu ku Eleasar ku Itamar ni, lɔ-ma lɛku Israelƒuɔ bammɔ akɔ na bebo-ɔ kudɔ. Ɔsika ama ndi bekyuli bani na lɛ́ƒuna lɛ́lɛku Israelƒuɔ akɔ ka babla mina bakpane.

²Na aka awu gyɔlɔɔ ɔni mɔɔdia bɔnu na ɔ́manku ɔkpane ete ƒ'ɔnwani Aaron.

³Su lɛwu bakane babuni bani na líte-ma lɛnunda ka bakana awu ɔmmɔ udu bɔka kani na baka awu ɔmmɔ bete Aaron kalɛ na bedie-nwu bese sɛsɛɛ bete ka ɔbla ɔkpane kabla ute-mi.

⁴Na kalɛ na ɔ́lɛka báka lɛwu lɛmmɔ bavinku ndi ka baka kayi lɛbalala lɛdiku ku bakpane awu kpɛtɛ kpɛtɛ kedee ku awu ɔtɔdi akɔnkɔ bune ku awu gyɔlɔɔ ku lili dukuu ku kavobi lɛduni. Na si baaka lɛwu lɛmɛni bete ƒ'ɔnwani Aaron ku nwuna bebi bananabi ka babla-mi kabla aani bakpane kalɛ ni,

⁵na biti adi kpɛtɛ kpɛtɛ ku linwo lidu lɛni mɔɔdia bɔnu na lígyie na lise buluu na lɛ́ƒɔ kuye geen bɛka lɛwu lɛmmɔ na beti sika ugyiedi bakya-ni bɔdia.

⁶“Na ɔkpane awu kedee ni, ɔlɛka ɔbla kɔdi kpɛtɛ kpɛtɛ na bedi-nwu kaduɛ ku unwo buluu ku ugyiedi ɔni náƒɔ kuye geen. Na beti sika ugyiedi bakya-nwu bɔdia.

⁷Na beti kadii bada-nwu amangba atu anyɔ ammɔ na ɔdia beteebo taada lɛlɔ.

⁸Na bedi kavobi lɛduni aani kadii kammɔ kalɛ ku linwo kpɛtɛ buluu ku ligyiedi lɛni náƒɔ kuye. Na bakya-nwu bɔdia ku sika ugyiedi bada awu ɔmmɔ lɛlɔ na ɔbla unwi.

⁹“Ti atabi anyɔ ani náƒɔ kuye na baalɔ-nya oniks na enweni Israel bebi anyi asia-nya lɛlɔ.

¹⁰Na anyi aku asia lɛtabi linwi lɛlɔ, na anyi aku akladi lɛnɔ asia lɛtabi linyɔdi lɛlɔ na bana bɔwɔ linengu kenye.

¹¹Na enweni Israelƒuɔ bebi anyi leevu-anyɔ asia atabi anyɔ ammɔ lɛlɔ. Bla-nya aani kalɛ na atabi banwine baanwí atabi kemmo ku ala bunweni. Na eti sika ugyiedi kɔbuli aka-nya,

¹²ada awu kedee ɔmmɔ amangba lɛlɔ aani likposela ute Israelƒuɔ bebi. Na bana anyi adubo bɔma Aaron lɛlɔ uwi ndi uwi na Unwoti uteenyimo-ma.

¹³Na sika ugyiedi ɔni nábala atabi ammɔ ni,

¹⁴ƒala sika ugyiedi kɔbuli inyɔ bamba kɔni bámii lɛlɔ.

¹⁵“Sia bedine babuni lɛlɔ na abla litemi siin bɔtɛ kayi lɛbalala lɛdiku aani bakpane awu kedee ɔmmɔ kalɛ. Na eti kɔdi kpɛtɛ kpɛtɛ ku linwo buluu ku ligyiedi lɛni náƒɔ kuye geen edi-ku na akya-ku bɔdia ku sika ugyiedi.

¹⁶Na aƒɛ kɔdi kɔmmɔ kemmo inyɔ. Na nwuna bɔbɛbɛ ku bune ƒui bɔbla bɔkɔku bunwi aani lɛnimi ntɛ bukulo yaalenwi ɔƒɛnyi biala.

¹⁷Na eti atabi ani náƒɔ kuye aka amana lɛdiku lɛmmɔ lɛlɔ na lɛgaala ine kemmo. Na ɔgaala udeedi kemmo ni, kya atabi ani baalɔ sardis ku topas ku beril.

¹⁸Na ɔgaala unyɔdi kemmo ni, kya atabi ani baalɔ banii torkis ku sapir ku smardo.

¹⁹Na ɔgaala ɔtɛdi kemmo ni, kya atabi ani baalɔ yiakint ku agate ku ametist.

²⁰Na ɔgaala unedi kemmo ni, kya atabi ani baalɔ krisolit ku oniks ku yaspa. Na edie eƒi na sika ugyiedi asɛɛ ebi kemmo, na eti atabi ammɔ akya-nya kemmo unwi unwi, asa na aka amana lɛdiku lɛmmɔ lɛlɔ.

²¹Ɔlɛka atabi ammɔ abla leevu-inyɔ na enye ete Israel bebi leevu-inyɔ bammɔ anyi kenye. Na atabi ammɔ adubɔbla aani ekposela atabi, na adubɔnwi bana anyi asia unwi unwi.

²²“Na adubuti sika ugyiedi na elii-nwu aani kɔbuli ete lɛdiku lɛmmɔ.

²³Na eti sika ugyiedi na abla kɔkwɛnimii inyɔ na eti akya lɛdiku lɛmmɔ atu.

²⁴Na eti sika ugyiedi kɔbuli kɔmmɔ ebo ada kɔkwɛnimii kɔmmɔ kemmo na lɛdiku lɛmmɔ lɛlɔ.

²⁵Na kuna eli anyɔ akladi ni, ti-nya bo da awu kedee ɔmmɔ amangba kesii kani na sika ugyiedi ɔ́bala atabi ammɔ.

²⁶Na asɔ abla sika ugyiedi kɔkwɛnimii inyɔ bamba ada lɛdiku lɛmmɔ atu na kemmo kakɛ kesii kani nda awu kedee ɔmmɔ lɛlɔ.

²⁷Na asɔ abla sika ugyiedi kɔkwɛnimii inyɔ bamba ada awu kpɛtɛ kpɛtɛ ɔmmɔ kada kakɛ na kesii kani na kavobi lɛduni lɛmmɔ lɛdanku.

²⁸Unwo buluu kadii na badubo lɛdiku lɛmmɔ kɔkwɛnimii bɔbala butádanku awu kedee ɔmmɔ kɔkwɛnimii lɛlɔ. Na kadii kammɔ kadubɔsia awu ɔmmɔ kavobi lɛduni lɛni bédi bákya-ni bɔdia mmɔ lɛlɔ.

²⁹“Na uwi biala na Aaron weduo kesii kani nse kedee mmɔ ni, ɔlɛka ɔkya awu ɔni na Israel kaba anyi ama-nwu kayi mmɔ. Na ɔmɛni ndubɔya na ami Unwoti anumi asia mina bekyuli lɛlɔ uwi ndi uwi.

³⁰Na eti Urim ku tumim amana litemi siin bɔtɛ kayi lɛdiku lɛmmɔ lɛlɔ. Na utaama Aaron kayi lɛlɔ uwi ndi uwi ɔni na uuduo mina kakpakɔ kesii kani nse kedee mmɔ uti ɔtina Israelƒuɔ litemi bɔtɛ.

³¹“Na awu gyɔlɔɔ ɔni lɛlɔ na bakpane awu kpɛtɛ kpɛtɛ kedee ɔmmɔ ɔɔsia ni, ɔlɛka ɔdi kɔdi buluu.

³²Na edie liƒi kesii kani na lili lɛɛví na kɔdi kɔmmɔ ntɛntɛ na edie liƒi lɛmmɔ bekpo atu kalɛ na uleyile bɔbwɛ.

³³Na awu gyɔlɔɔ ɔmmɔ atu na lɛgba kada ni, beti unwo buluu ku ugyiedi ɔni náƒɔ kuye bedi egyiibi adi udu basia bamana na beti sika ugyiedi lɛdɔn wɛlɛ wɛlɛ baƒala-nwu ntɛ.

³⁴Na egyiibi ammɔ ku sika ugyiedi lɛdɔn lɛmmɔ litaavumanaku lɛlɔ ɔmana awu gyɔlɔɔ ɔmmɔ atu.

³⁵Na si Aaron ɔ́kya lɛwu lɛmmɔ na úduo kesii kani nse kedee mmɔ ni, lɛdɔn lɛmmɔ lɛdubo buteebo. Na ɔmɛni ɔdubɔya na nwuna ngba buleduo ɔgbankpi kemmo.

³⁶“Na eti sika ugyiedi na abla kalɛkɛ blii kadi na anwi-nwu kemmo enweni asia anii, ‘Ɔmɛni use sɛsɛɛ ute Unwoti.’

³⁷Na eti kadii buluu ada-nwu lɛlɔ adanku dukuu kabwa kammɔ lɛlɔ na anumi kakɛ.

³⁸Kalɛkɛ kammɔ kadubɔma Aaron lɛtɛntɛ kalɛ na ɔƒɔ Israelƒuɔ likpidi biala na bábla na kakpakɔ mmɔ ɔsia lɛlɔ si bébo baabla akpala bete-mi.

³⁹“Di awu ɔtɔdi akɔnkɔ bune ku adi kpɛtɛ kpɛtɛ buni, na edi dukuu kabwa lɛni kani. Na ala ɔkane buni na ɔlɛka udi lɛduni lɛmmɔ.

⁴⁰“Na Aaron bebi lɛnɔ ni, ɔlɛka abla lɛwu lɛtɔdi akɔnkɔ bune ku kavobi aduni ku atɛntɛ aduni ani mɔɔdia bɔnu na eekeye ete-ma.

⁴¹Na adubuti lɛwu lɛmmɔ akya ƒ'ɔnwani Aaron ku nwuna bebi na ewi-ma lili nnɔmii ese-ma likpo na edie-ma ese sɛsɛɛ na babla-mi kabla aani mina bakpane.

⁴²“Na eti unwo ɔbunidi na edi lɛwu gyɔlɔɔ kalɔ lɛwuku lɛni nási bana kavobi útédu bana ebuli ete-ma na bana ɔlɔna kesii kadi katatina.

⁴³Na uwi biala na beeduo Adi Kevo kammɔ kemmo iye bébo bababla ɔkpane kabla na mina lɛkpabi kudɔ ni, na baláni lɛtuni beleboku lɛlɔ na ɔdi wekpi. “Na ɔda bubo bɔmɛni bɔdubuse bute anwu ku nwuna kaba bebi úsela uwi ƒui.”