Read Lelemi Israelƒuɔ Bɔlɛ 30 Bible Online

Israelƒuɔ Bɔlɛ 30 - Lelemi bible

Israelƒuɔ Bɔlɛ 30

¹Amu na Unwoti ɔ́su Mose ɔnini, “Ti akasia kugyii na eti abla oloƒui bɔkyula lɛbi ete-mi.

²Na aya na nwuna bune ku bɔbɛbɛ bɔbla unwi ɔgba bɔkɔku unwi ku kakɛ. Na nwuna bɔkuku lɛnɔ bɔdi lɛgba bɔkɔku ɛtɛ. Na abla ɔmantɛ akɔ ɔgyani ese udu alɛ lɛkpabi lɛmmɔ ekpo ene ammɔ.

³Na eti sika ugyiedi akwaa ligyii lɛmmɔ ƒui lɛlɔ ku nwuna katɔ. Na eti sika ugyiedi ada-nwu atu amana aani ɔmii.

⁴Na eti sika ugyiedi abla kɔkwɛnimii inyɔ ada-nwu atu anyɔ na kada kakɛ blii ku kakɛ kanyɔdi lɛnɔ. Na ɔdubɔdia na beti ligyii lɛdi bavinku-nwu kemmo, na lɛkpabi lɛmmɔ lɛdia butaagyu.

⁵Na ligyii lɛni ndubɔvi kɔkwɛnimii kɔmmɔ kemmo lɛnɔ ni, kwaa ku sika ugyiedi.

⁶Ti lɛkpabi lɛmmɔ lɛ kakpakɔ bule kɔdi kɔni néle kevo kammɔ kemmo mmɔ anumi kakɛ mɛni. Na Bunyimi Adaka ɔmmɔ ɔlɛ kakpakɔ bule kɔdi lɛmmɔ kama ku nwuna likpidi kɔtu bɔni budie libila kesii kani na ndubo-mii butaasiaku mmɔ.

⁷“Na ɔtanta ku useyi biala na Aaron watu asogya ɔmmɔ ni, bitaakyula oloƒui ɔni muunwenyi ƒɛƒɛɛ na lɛkpabi lɛmmɔ lɛlɔ teete-mi.

⁹Na bɛnu ka bɛ́kyula oloƒui ɔni muunwenyi ƒɛƒɛɛ kani. Na biteti oloƒui ɔmmɔ ɔdi bitabla edula ebi iye ebuo iye ntɛ akpala.

¹⁰Na kunwi na lɛkwa kemmo ni, Aaron ɔdu ebuo ɔbla likpidi kɔtu bɔni budie akpala ɔdi na kesii kani na ese ammɔ alɛ. Na ebuo ɔni na badubo bɔdu mmɔ ubugya na badubuti babla buvele ɔdi ɔmɛni bete kaba bekyuli bani mebo ƒui. Na ɔmmɔ ɔdi akpala ani nse kedee ƒui ute ami Unwoti.”

¹¹Amu na Unwoti ɔsu Mose ɔnini,

¹²“Ka bananabi bani náalɛ lili na Israel kalɔ lɛlɔ na aya ɔdi biala ɔƒɔ kayu kadi ute-mi. Kalɛ na ɔgbankpi ɔdi ulásiaku bana ɔdi na bekyuli bɔka bɔmmɔ kemmo.

¹³Ɔnana biala ɔni náƒɔ akwa leevu-yaalenwi úsela ɔlɛka ɔƒɔ egulabi ammɔ likeke na nwuna ekpidi lili. Ina ɔlakɛne iye ɔwabane na ɔdi ni, ɔlɛka ɔƒɔ lɛla lɛni na bálɛ ugyii béte bekyuli ƒui.

¹⁶Ƒɔ ekpidi lili buvele egulabi ammɔ na eti ataabla kakpakɔ kammɔ lɛlɔ ala. Na ɔmɛni ɔdubɔya na Israelƒuɔ beteenyimo ka ami Unwoti ndubɔƒɔ bana ekpidi lili kayu si bébo-mi kudɔ.”

¹⁷Amu na Unwoti ɔ́su Mose ɔnini, “Wia abuala egyiedi na abla lɛkyami lɛdi ku nwuna ɔka. Na eti lɛkyami lɛmmɔ alɛ lɛkpabi ku kevo kammɔ ntɛ. Mmɔ na bakpane bammɔ badubɔƒɔ bana enu ku lɛgba asa babla akpala na mina lɛkpabi lɛlɔ iye beduo kevo kammɔ kemmo. Na si ɔdi úni ɔmmɔ ni, ɔdubo bukpi. Na ɔmɛni ndi bunyimi ute Aaron ku nwuna bebi úsela uwi ƒui.”

²²Amu na Unwoti ɔ́su Mose ɔnini,

²³“Wia nnɔmii bɔni nse kede kede lɛkyami linwi ku ala ani muunwenyi ƒɛƒɛɛ te ukyuli ɔni ngyi bɔsala kabla kaduɛ, na uti mira ɔɔƒɛɛ unwi ku sinamon ɔɔƒɛɛ kakɛ ku kalamus ɔɔƒɛɛ kakɛ ku kasia ɔɔƒɛɛ unwi ɔsala-mu. Nnɔmii bɔmɛni bɔdubɔbla likposela nnɔmii sɛsɛɛ.

²⁶Na adubo-mu buti esusu Adi Kevo kammɔ ku Bunyimi Adaka ɔmmɔ.

²⁷Na nnɔmii bɔmmɔ kani na adubuti esusu ala kasiakɔ ku ala ani nlɛ-nwu lɛlɔ, ku asogya kasiakɔ ku ala ani ndaku-nwu, ku oloƒui bɔkyula lɛbi ku akyami ani ndaku-nwu,

²⁸ku bebuo bɔkyula lɛkpabi ku nwuna lɛlɔ ala, ku ntu lɛkyami ku nwuna ɔka ɔmmɔ.

²⁹Na si ábla ala amɛni ƒui lɛni ni, ɔdubɔya na ala ammɔ ƒui abla kedee. Na si ukyuli ɔdi úti kɔnu útuku-nya muedi ni, anwu lɛnɔ ɔdubɔbla kedee.”

³⁰Amu na Unwoti ɔ́su-nwu ɔnini, “Uwi ɔni na eesé Aaron ku bebi mina bakpane ni, na ewi-ma nnɔmii bɔmmɔ bɔdi lili.

³¹Na asu Israelƒuɔ anini, ‘Nnɔmii bɔmɛni buse kedee ɔ́si ɔƒɛni úsela uwi ƒui.

³²Anwuɔsu bada-mu aani lɛla lɛni nse kedee. Na ɔdi uteti-nwu utaabla limeyi ndi limeyi kabla. Iye ɔdi utaƒɛ bɔdi utasala nwuna nnɔmii bɔni na ɔɔwɛɛ kemmo kudii.

³³Na si ɔdi ɔ́bla-mu lɛlɔ kabla na ɔɔɔdi ɔkpane ni, ndubo-nwu bɔda budie mina bekyuli akɔ.’ ”

³⁴Amu na Unwoti ɔ́su Mose ɔnini, “Wia ala ani muunwenyi ƒɛƒɛɛ na abla oloƒui. Ti mira ku klobo ku onika ku galbanum te ukyuli ɔni ngyi-nwu kabla kaduɛ, na ubunku mma uti ɔbla oloƒui sɛsɛɛ kedee ɔmmɔ.

³⁶Na awɔ ala ammɔ adi abla ɔlaaƒɔ na akuna ɔlaaƒɔ ɔmmɔ ewi Unwoti unyimi adaka ɔmmɔ anumi, kesii kani munye taatɛmiku-mii. Oloƒui ɔmɛni ɔbla lɛla lɛni nse kedee utulo ƒui ute-mii.

³⁷Na sɔsɔ use kedee ute ami Unwoti. Tasu anii aabla ɔdi ese ete lɛlɔ kudii.

³⁸Na si ɔdi ɔ́bla ɔdi ɔ́kyula ute lɛlɔ ni, ndubo-nwu bɔda budie mina bekyuli akɔ.”