Read Lelemi Israelƒuɔ Bɔlɛ 4 Bible Online

Israelƒuɔ Bɔlɛ 4 - Lelemi bible

Israelƒuɔ Bɔlɛ 4

¹Amu na Mose úye Unwoti ɔnini, “Na si Israelƒuɔ bátaƒɔ-mi bátadi iye bétenu mina litemi na básu banii, ‘Unwoti útedie lɛlɔ biala útatina-a’ ni, dɛ na mabla?”

²Mmɔ na Unwoti úye-nwu ɔnini, “Bi na ada mmɔ?” Amu na Mose údie kenye ɔnini, “Ugyii ɔdadi.”

³Amu na Unwoti ɔ́su-nwu ɔnini, “Bo ugyii ɔmmɔ va kalɔ.” Amu ka Mose úbo-nwu ɔ́va kalɔ ni, kɔnakunwi ugyii ɔmmɔ únwini kɔlakpi. Amu na Mose úkeli úsie kama.

⁴Mmɔ na Unwoti ɔ́su Mose ɔnini, “Die kɔnu na agyu kɔlakpi kɔmmɔ ɔka kakɛ.” Anwuɔsu Mose údie kɔnu na ɔ́gyu kɔlakpi kɔmmɔ ɔka kakɛ. Na ɔ́sɔ únwini ugyii ɔdadi ɔmmɔ.

⁵Amu na Unwoti ɔ́su Mose ɔnini, “Bla ɔmɛni tina-ma, na ɔdubɔya na baƒɔ badi ka ami bana bati kuuku Abraham Katɔti ku Isak Katɔti ku Yakob Katɔti nédie lɛlɔ lɛ́tina-a.”

⁶Amu na Unwoti ɔ́sɔ ɔ́su Mose ɔnini, “Ti ƒula kɔnu kya ƒula awu kemmo.” Amu ka Mose ɔ́bla lɛni ni, ka ɔ́da nwuna kɔnu údie kani na kɔnu kɔmmɔ kɔ́ƒɔ ɔlɛgyie na kɔ́bla ƒututuu aani etubankɛ.

⁷Amu na Unwoti ɔ́sɔ ɔ́su-nwu ɔnini, “Sɔku kɔnu kɔmmɔ kya ƒula awu kemmo.” Amu ka Mose ɔ́bla lɛni na ɔ́da nwuna kɔnu údie kani kɔnu kɔmmɔ kɔ́sɔ kɔ́yu ɔkplu na kúnwini aani kalɛ na nwuna ɔlɔna use.

⁸Amu na Unwoti ɔ́su-nwu ɔnini, “Si bátaƒɔ ƒula etemila bátadi na banu akɔla budie taatina edeedi amɛni bati ni, badubɔƒɔ akɔla anyɔdi amɛni badi.

⁹Nsu si édie akɔla akpa anyɔ amɛni na bátaƒɔ-nya bátadi iye bétenu ƒula litemi ni, na etédu ntu bɔdi asiku Nil Ketu kemmo na aƒɛ ntu bɔmmɔ ewi kalɔ kani kákwii lɛlɔ. Na ntu bɔni na édu ásiku ketu mmɔ bɔdubunwini ubugya buwi kalɔ mmɔ.”

¹⁰Amu na Mose ɔ́su Unwoti ɔnini, “O Unwoti, ɔ́si mina lɛnamu uwi úti úbedu ɔƒɛni ni, lɛɛɛgyi bɔtɛmi. Na úti úbedu uwi ɔni na aatɛmiku ami ƒula kabla ɔblane mɛni ni, mina bɔtɛmi bulábla nwaa. Na ndi ukyuli ɔni mɔɔwalɛ.”

¹¹Amu na Unwoti ɔ́su-nwu ɔnini, “Ɔma nédie ukyuli kenye? Na ɔma mɔɔbla ukyuli na ulákana butemi iye ulenu? Na ɔma mɔɔyá na ukyuli ɔɔnu iye ɔɔyá na anumi aabwɛ-nwu si ɔɔɔdi ami Unwoti?

¹²Anwuɔsu teesie na ndubo-ɔ bunku na akana bɔtɛmi na ndubɔtina-a lɛla lɛni na adubɔsu.”

¹³Nsu Mose ɔ́su ɔnini, “O Unwoti, buvele nda-a, wia ukyuli bamba na atala-nwu.”

¹⁴Amu na Unwoti úti kɔnyi kati kati ɔ́kya Mose na úye-nwu ɔnini, “Ƒ'ɔnwani Aaron, Lewini ɔmmɔ nɔɔ? Ngyi ka ɔgyi bɔtɛmi, na ɔsia ulu lɛlɔ lɛnɔ ɔdubo ubasiaku-ɔ, na kubiti kɔdubɔƒɔ-nwu kayi kemmo si ɔ́nu-ɔ.

¹⁵Tɛmiku-nwu na asu etemila amɛni akya-nwu kenye. Ami ndubo bina inyɔ ƒui bubunku na lɛtina-mii lɛla lɛni na bɛdubɔsu.

¹⁶Ɔdubɔtɛmiku bekyuli bammɔ ute-ɔ aani ƒula kenye udiene kalɛ na ɔbla aani si awɔ nénwini-nwu Katɔti ɔmmɔ.

¹⁷Nsu ti ugyii ɔmmɔ da kɔnu kalɛ na eteeti taabla akɔla budie taatina lidu lidu.”

¹⁸Ɔmmɔ kama Mose únwini úsie ulekudi ɔti ɔni ndi Yetro kudɔ na ɔ́su-nwu ɔnini, “Te-mi kuƒi na linwini lisie mina kadi bekyuli kudɔ na Egyipte na ntánu si ɔdi ɔmu ulie ngba.” Amu na Yetro ɔ́su-nwu ɔnini, “Kusɛ kusɛ ɔsiaku-ɔ.”

¹⁹Uwi ɔni na Mose ɔ́mu ɔkya Midian kalɔ lɛlɔ ni, Unwoti ɔ́su Mose ɔnini, “Nwini teesie Egyipte kalɔ lɛlɔ, ɔsika bekyuli bani ƒui nkya mmɔ na baawia-a badu béekpi.”

²⁰Anwuɔsu Mose úti ulekudi ku nwuna bebi bananabi na úti-ma ɔ́sia ɔƒlumu kama. Na bátɔlɔ bésie Egyipte. Na úti Katɔti ugyii ɔdadi ɔmmɔ ɔ́da.

²¹Amu na Unwoti ɔ́su Mose ɔnini, “Si énwini ésie Egyipte ni, nu ka ábla akɔla budie taatina ammɔ na Ɔga Ƒarao anumi ɔkɛnku ɔyikun ɔni na líte-ɔ kenye. Nsu ndubɔya na Ɔga Ƒarao kayi kayu ɔkplu ɔni na ɔɔɔdubo bɔtuna na Israelƒuɔ batɔlɔ Egyipte kalɔ lɛlɔ.

²²Mmɔ na adubɔsu ɔga ɔmmɔ anini, ‘Unwoti ɔnii Israel ndi mina ubi udeedi,

²³na lɛ́su-ɔ nnini, “Ya na mina ubi ɔtɔlɔ, kalɛ na usie utábla-mi kabla na ɔkya-mi lili kalɔ.” Nsu éni na étedie-nwu ulu na ɔtɔlɔ, anwuɔsu ndubo ƒula ubi ɔnanabi udeedi bɔdu.’ ”

²⁴Amu ka bakɛ ulu na bétédu keduokɔ kadi ni, Unwoti útásiaku Mose ubidi na ɔ́yɔ ka nka ɔdu-nwu.

²⁵Nsu ulekudi Sipora úti lɛtabi lɛni kenye mbo ɔbi na úkulo ubidi lego kenye na úti útuku Mose lɛgba na ɔ́su ɔnini, “Geen ni, ubugya kemmo ɔgya na adi-mi.”

²⁶Ɔmmɔ ɔsu Unwoti ɔ́sɔ útabla Mose ubidi lɛla lɛdi. Na uwi ɔni na Sipora ɔ́su ka ubugya kemmo ɔgya na ɔdi-nwu mmɔ ni, ɔɔtɛmi taasiku bana lego bukulo ɔdi lɛlɔ.

²⁷Amu na Unwoti ɔ́su Aaron ɔnini, “Ta na eteesie na atásiaku Mose na ketele kemmo.” Anwuɔsu úsie na útásiaku Mose na Katɔti kɔbi lɛlɔ. Na ka ɔ́nu-nwu ni, bákya lɛlɔ kɔgbu.

²⁸Amu na Mose ɔ́su Aaron lɛla biala na Unwoti ɔ́su-nwu. Na ɔsɔ ɔ́su-nwu akɔla ala budie taatina lidu lidu lɛni na úbo-nwu ɔda ka ɔbla.

²⁹Ɔmɛni ɔsu Mose ku Aaron bénwini na bésie Egyipte na bátálɔ Israel batɔnkune básala.

³⁰Na Aaron ɔ́su batɔnkune bammɔ lɛla biala na Unwoti ɔ́su Mose. Na Mose lɛnɔ ɔ́bla akɔla budie taatina lidu lidu na batɔnkune bammɔ anumi.

³¹Na ka bánu akɔla ala budie taatina ammɔ ni, báƒɔ bádi. Na ka bénu ka Unwoti úbo-ma lɛlɔ kasusu na ɔ́nu kalɛ na bakya beebó abi ni, bana ƒui béboku lɛlɔ kalɔ béte-nwu na bémwi-nwu.