Read Lelemi Hiob 11 Bible Online

Hiob 11 - Lelemi bible

Hiob 11

¹Amu na Soƒar ɔni nási Naama ɔ́kya Hiob litemi kenye na úye ɔnini,

²“Etemila pii amɛni ƒui ni, budie na ɔdi ulakana-nya kenye budie? Bunye na bɔɔsɔ bunye butaanu na utaatɛmi atɛ keeke lɛni?

³Aabu ka ala ani na enye aaká mɛni adubɔya na bekyuli bebile kenye? Na baladɔnku-ɔ banii aatɛmi enyekpi yoo?

⁴Ákana na ásu Katɔti anini, ‘Bɔƒiɔ bɔdi buuubo-mi kayi kemmo, na nse siin na ƒula anumi.’

⁵O, si nka Unwoti ɔmmɔ ɔlati ubimi kenye na udie-ɔ lɛla lɛmɛni kenye ni, nka ɔdia-mi.

⁶Na ɔsu-ɔ ka lɛnunda lɛɛɛdi unwi, na abɛla lɛnɔ akya-nwu kemmo. Ɔlɛka ɔbla-a nwaa ka bɔyiƒala muedi na Unwoti ɔ́yiƒala ƒula ekpidi adi bene.

⁷“Bɔkana na adubɔkana Unwoti Ɔyikune Ƒui akɔla ala budie taatina bɔkɔku bɔnu, na awia-nya kalɔ ati etédu ana kawɔkɔ?

⁸Nwuna lɛnunda lɛ́kuku líbo lɛ́vi katɔ ƒui. Na lɛnunda lɛmmɔ kemmo lɛnɔ kágyu ketulo kekpine ƒui. Na bi na adubɔkana na ati na amɛni ƒui lɛlɔ?

⁹Lɛnunda lɛmɛni líne líbo lɛ́vi kalɔ kammɔ ƒui, na lɛ́bɛbɛ litulo ɛpu ƒui.

¹⁰“Si banii Katɔti ɔ́ya na bákya-a ɔtɔ iye úti-ɔ úsienku litemi lɛdi katɛkɔ ni, ɔma ndubɔkana na ɔta unye-nwu lɛlɔ?

¹¹Geen geen ni, Unwoti ɔɔnu bekyuli bekpidi taati, na ulénye likpidi kama, mmomu uudie-ni keyi.

¹²Use kpɛtɛ kpɛtɛ ka atumini ebuo ala utine na unu litemi ukyuli kalɛ, utulo ka atina ɔdɔlɔdi ala na unwini ɔnundane.

¹³“Nyonu ƒula lɛlɔ ƒui te Unwoti, na akpali-nwu evele ala ani muukpóku-ɔ.

¹⁴Na edie ƒula alaekpidi ƒui atu, ku ani na ábla na bɔbɛ kemmo ƒui.

¹⁵Na ɔmmɔ ɔdubɔya na kɔƒa kɔsɔ kulékpo-ɔ, na kayi kelie-ɔ kalɔ na enye kpakplaa na asɔ alayia lɛnɔ.

¹⁶Na ala ani muukpóku-ɔ ƒui ni, adubo-nya bɔyiƒala aani ntu nágba bɔ́tɔlɔ.

¹⁷Na ƒula ngba emeyi kemmo adubukeye butulo ɔƒiiwi. Na kasuudikɔ kammɔ kabla nwaa aani ɔtanta kadi bugye.

¹⁸Adubulie kalɔ kpi ku lɛnunsia na anu aka amana lɛlɔ na akɛ bɔnwuna ƒaa.

¹⁹Adubo bɔtɛ bɔlɛɛ na lɛla lɛdi lɛsɔ lilakya-a liƒu. Na bekyuli pii badububo bebeye-ɔ kebunku.

²⁰Nsu balalane ama badubɔnu ulu banɔ, na balákɛ kebunku ku kekelikɔ kadi. Na lɛla linwi lɛni kani na badubɔsia anu ndi ka kukpi kubeti-ma.”