Read Lelemi Hiob 12 Bible Online

Hiob 12 - Lelemi bible

Hiob 12

¹Hiob údie kenye ɔnini,

²“Sɔsɔ na ɔdi, bɛɛnu ka amii kani ndi amii. Na si bíkpi ni, bíti lɛnunda bɛ́tɔlɔku!

³Nsu ni, ami lɛnɔ mbo kasusu aani bina kalɛ, na ńtasɔ liiitulo-mii. Ɔma naaagyi ala ani na bɛɛsu mɛni ƒui?

⁴“Ɔƒɛni amu lɛ́ta línwini lɛmala líte mina bakpana, ina ka lɛ́kpali Unwoti na únu úte-mi. Ndi lɛmala, ina ka nda lɛlɔ siin na bɔƒiɔ buuubo-mi lɛlɔ.

⁵Bekyuli bani nli ƒaa ni, ama mɔɔpii lilikpi ala. Na baanu bani muugyile teebuli aani lɛla lɛni na ama báƒɔ béboku.

⁶Kasusu kelekpoku beyune ku bakantankpine na bana kakyakɔ. Na bani mɔɔkya Unwoti kɔnyi ni, bɔyia bɔdi buuubo-ma kemmo, ɔsika bada bana baƒiɔ enu kemmo kɔkɔɔkɔ.

⁷“Nsu si aawia lɛla ati ni, na esie lɛku kemmo bebuo ku kayaa baasɛ kudɔ, na badubɔtina-a ala.

⁸Iye ni, sia anu na anu kalɔ lɛlɔ ala ƒui kaduɛ iye ɛpu bebweyi lidu ƒui na badubɔtina-a lɛla lɛdi.

⁹Bana ƒui bagyi ka Unwoti Katɔti nábla ala amɛni ƒui.

¹⁰Na Unwoti lɛkɔkɔ kemmo na lɛla lidiedi biala lɛkya. Na anwu muute ɔyawine biala ngba ɔƒɛƒɛɛ ɔni na ɔɔnwuna.

¹¹Atu na buuti teenu, na unyemi na buuti taati adila emini.

¹²Benengu bani néelie bétu uwi kudɔ na bɔɔkɛ́ lɛnunda, na bana ala bɔtina mɔɔyá na buunú ala kalɔ.

¹³“Nsu ɔna ƒui kawɔlɔkɔ ni, Katɔti ndi lɛnunda ku ɔyikun ƒui kasikɔ. Na anwu mɔɔtina-bu kasiakɔ ku ala kalɔ bunu.

¹⁴Na lɛla lɛni na Unwoti úbile ni, ukyuli ɔdi uuubo na wasɔku-ni waklibi. Lɛni kani na si úbo badi lɛkpu ɔ́kya kesii kadi ni, na ɔdi ulakana-ma budie.

¹⁵Katɔti ɔkana na ɔya na ɔnantu ɔda na kalɔ kakwii. Na anwu kani mɔɔyá na kayaa kaalɛmi na ɔnantu ɔna utulo ku lɛlɔ.

¹⁶Katɔti ubo ɔyikun na ɔɔdi bekyuli ƒui lɛlɔ. Ɔɔdi ɔkɔ banyine bani mɔɔtɔ́lɔ bekyuli ku bani na baatɔ́lɔ ƒui lɛlɔ.

¹⁷“Unwoti ɔɔyila kadi benengu kasusu betene udu, na ɔɔyá na bana etemila batɛne beenwíni badɔlɔdi.

¹⁸Na ɔɔƒɔ́ ɔyikun taalɛku baga enu kemmo, na beenwíni bekyuli bamba kabla bablane.

¹⁹Ɔɔbɔku bakpane teedie bana kunyekɔ. Na bayikune bani náƒɔ lɛnyi ni, uukpeli-ma taava kalɔ.

²⁰Na ɔɔƒɛ bani mbo kenye ogya linyemi, na basɔ balati bɔtɛmi. Na ɔɔyá na banundane baayila bana lɛnunda.

²¹Uudie ɔbu na bagadine lɛlɔ, na bekyuli basɔ balánu-ma taakya lɛla lɛdi kemmo. Na ɔɔƒɔ́ bana lɛlɔ bɔdi ɔyikun bana kudɔ.

²²“Ɔɔyá na alaekpidi ani nábɛ akya kasuudikɔ ina kekpine muedi ni, aadá taalɛ keyi, na bukeye bɔƒɔ lɛla biala.

²³Ɔɔyá na kadi bekyuli badi balɛ lili na bakɛ ɔyikun, asa na uboku-ma kalɔ. Na ɔɔyá na badi bemomo asa ugyingya-ma ɔkya.

²⁴Ɔɔbla na bana bɔtɔnkune benwini badɔlɔdi na babla susuusu, na bayii lɛla biala bɔbla ulu.

²⁵Bekyuli bammɔ baakɛ teebo enu ɔni na baaada asogya ɔdi na kasuudikɔ mmɔ, na baagbánta aani bekyuli bani nékpi ntɛ.”