Read Lelemi Hiob 13 Bible Online

Hiob 13 - Lelemi bible

Hiob 13

¹“Ala ani ƒui na bɛ́ka mɛni ni, adi átabɛ-mi. Lɛ́ɛnu, na línu-nya ƒui, na ngyi-nya kalɔ lɛnɔ.

²Na ala ani na bɛgyi ni, ami lɛnɔ ngyi-nya, na bitakali bɛnii lɛ́sɔ na bina kudɔ.

³Nsu mɔɔwia ka ami ku Katɔti Ɔyikune Ƒui ɔmmɔ bɔtɛmi, na ami ku-nwu bɔni litemi lɛmmɔ bɔnu.

⁴Ɔkɔ ɔlɛ babwine na bina ƒui bɛdi. Na ɔkɔ etemila ani neeebo kɔsia kani na binye bɛɛká taasu-mi.

⁵Si bíbile kenye bilie kpoo muedi ni, bekyuli badubɔnu-mii aani banundane mmomu!

⁶“Bise atu na binu mina unyeƒi ɔni na mɔɔkya.

⁷Bɔnyi na bɛdubo ɔkɔ bɔnyi bɛnii Katɔti kenye na biidie?

⁸Bɔkana na bɛdubɔkana na bɛtu-nwu litemi binwini na bɛsu ka nwuna litemi geen kenye na biidie na litemi katɛkɔ?

⁹Na si banii ɔlɔ-mii katɛ ni, bɛdubɔkana anwu lɛnɔ bɔtɔlɔ kalɛ na bɛɛtɔ́lɔ bekyuli bamba?

¹⁰Ina dɛ na bɛɛnu bekyuli anumi taabla ala ni, ɔdubo bɔnu bɔti na ɔdɔnku-mii.

¹¹Nwuna bukeye ku nwuna lɛlɔ liƒu bulákya-mii bɔyia?

¹²Bina lɛnunda ku agba ani na biibó ƒui adi ɔtumu, na uuubo kɔsia kɔdi, ɔsika unyeƒi ukpludi kani na ɔdi.

¹³“Bibile kenye kpoo na binu lɛla lɛni na mɔɔsu. Ɔmmɔ kama na bitaasu lɛla lɛni na amii lɛnɔ bɛgyi.

¹⁴Lɛ́tuna ka liti mina ngba lɛkpa ƒaa.

¹⁵Ina bɔdu na ɔnii wadu-mi muedi ni, nwuna lɛlɔ kani na mina anu asia. Na anwu na ndubudie ala ani muukpóku-mi lɛsu.

¹⁶Na ɔƒɛni kalɛ mina kayi buse bɔmmɔ ndubunwini mina ngba bɔƒɔ, ɔsika ukyuli ukpidi ɔdi uuubo na ɔdubuse kayi ɔda ɔlɛ Unwoti anumi ku lɛla lɛdi.

¹⁷Binu-mi etemila kalɔ kaduɛ, na binu lɛla lɛni kalɔ na muudie.

¹⁸Lɛ́klibi lɛlɔ líte mina litemi kaduɛ, na ngyi ka mbo ubo.

¹⁹Na si úbo úte ka mina likpidi lɛ́lɛ keyi ka lɛ́ƒiɔ na ńtati bɔbla ni, ndububile kenye kpoo na likpi ƒaa.

²⁰“Mmomu ni, O Unwoti, alakpa anyɔ adi kani na muuvele-ɔ na abla-nya ete-mi asa na mbenye-ɔ anumi.

²¹Da-mi kɔtu kɔmɛni udu bɔni ya, na edie liƒu biala lɛnɔ na mina kemmo.

²²Ɔmmɔ kama na alɔ-mi katɛ na lidie kenye, iye na aya na liye-ɔ mina litemi na edie kenye.

²³Buvele, die mina alaekpidi ani na lɛ́bla keyi. Na atina-mi bɔƒiɔ bɔmmɔ na lɛnu lɛti.

²⁴Bi ɔsu na énwini kama ákya-mi, na bi ɔsu na éti-mi énwini ukisine?

²⁵Bɔyɔ na ɔɔyɔ́-ɔ kaƒɔ ka eteebo-mi taavinku aani kalɛ na ɔƒɛƒɛɛ uubó livete lɛnudi?

²⁶Mɔɔnu ka enye aadú-mi kɔtɔ geen ku kɔnyi na aadá-mi kenye ku ekpidi ani na lɛ́bla ɔ́si mina lɛnamu uwi ƒui.

²⁷Na ébo-mi lɛkpu ése, na aanu mina kɔnyakɔ ƒui teese likpo.

²⁸“Na mina ngba bɔyii udu aani kalɛ na lɛla lɛdi liibun, iye kalɛ na kubweyi kuubile adala.”