Read Lelemi Hiob 16 Bible Online

Hiob 16 - Lelemi bible

Hiob 16

²“Líinu ala ani na bɛɛsu mɛni udu pii, nsu kɔnu kɔni na bɛnii bɛɛsia-mi ni, ɔlɛ mmomu na bɛɛyá na muunú na mina kayi kemmo!

³Bi ɔsu na binye bɛɛká ala ekpludi gyɔlɔɔ amɛni? Bi ndi lɛla lɛni muukpóku-mii ɔsu na binye bɛɛkyaku-mi unyeƒi?

⁴Si banii bɔ́vumana kunyekɔ na bise aani kalɛ na nse mɛni ni, nka ndubɔsu litulo-mii na lɛkunku lili lɛkya-mii.

⁵Nsu mina etemila ni, adubɔkya-mii ɔkplu, na ala ani na ndubɔsu aya na kaƒɔ kaba-mii buɛɛ.

⁶“Na bi na lɛ́su o-o, bi na ńtasu o-o ni, mina ɔlɛ bunu buláƒana.

⁷O Unwoti, áya na mina ɔyikun ɔ́sa na lɛ́bla kpɛtɛ kpɛtɛ, na áyila mina kaduli bekyuli ƒui udu.

⁸Áya na mina ɔlɔna ɔ́kwii ɔma-mi ekubi lɛlɔ, na ébo-mi lɛkpu aani ƒula ɔtɔntɛne.

⁹Unwoti úti kɔnyi ɔ́kya-mi na ɔ́duli-mi ɔ́va kalɔ. Na unye ɔɔnu-mi ɔnusɛ aani nwuna ukisine kalɛ.

¹⁰Na bekyuli bébimi kenye baanu-mi taapii-mi. Na básala baatu etemila taalɛ-mi na baaƒiɛmi-mi kɔnu utugya.

¹¹Katɔti údie-mi atu na ɔ́nyonu-mi ɔ́kya bekyuli bekpidi enu kemmo.

¹²Nka lɛla lɛdi lilekpoku-mi, nsu Katɔti ɔ́da-mi na ɔ́mana-mi ɔkwɛ na ɔ́kunku-mi na úbo-mi útáva. Na úti anumi ɔ́lɛ-mi ka ɔdu-mi.

¹³Uubó nwuna atula taalɛ-mi taasiku lɛƒɛnyi ƒui lɛlɔ. Na ɔ́ƒuala-mi ɔƒɛnyi na ubugya ɔɔyu teewi kalɔ.

¹⁴Katɔti útada-mi bukpoku útaya uwi ɔdi.

¹⁵“Anwuɔsu na líti kɔnyana ala lɛ́da na mina lɛbibo ku lɛƒɛda kemmo, na líbo nli ɔtumu akɔ na mɛni.

¹⁶Líwulo laa na mina anumi egyie na éƒu.

¹⁷Nsu ngyi nwaa ka ńteti mina enu ńtabla likpidi lɛdi iye lɛta linye ɔdi lɛlɔ, mmomu mɔɔkpali Katɔti ku kayi sɛɛn uwi ndi uwi.

¹⁸“Muuvele geen nnii si úbo úte ka líkpi ni, kalɔ ketebi mina ubugya ku kɔvanu lɛti!

¹⁹Ngyi nwaa ka ukyuli ɔni ndubudie-mi kenye ɔkya katɔ, na anwu ndi-mi ubunkune.

²⁰Mina ɔkpana ndi ukyuli ɔni muuvele teete-mi uwi ɔni na muuwulo taakpali Katɔti.

²¹Na uudie taatina Katɔti ka ńtabla lɛla lɛdi aani kalɛ na ukyuli uuvele teete nwuna ɔkpana.

²²“Ɔsika akwa alɛɛ kani nébu-mi na likpi, na nsɔ lɛɛɛdubo bunwini bubo lɛnɔ.”