Read Lelemi Hiob 17 Bible Online

Hiob 17 - Lelemi bible

Hiob 17

¹“Lɛlɔ lítu mina kɔyu. Na mina emeyi lɛnɔ áda liku. Kaƒiɔtɔ kani nébu-mi ɔƒaani, na nsɔ liiibo lɛnunsia lɛdi.

²Bekyuli benye bámana-mi baamá-mi. Na mina anumi aanu-ma ƒui.

³“Unwoti, si awɔ átanu-mi kɔnyana na ebunku-mi ni, ɔma ndubɔkana na ɔƒɔ kayu kadi na mina lili na udie-mi?

⁴Awɔ náya na bana kasusu kékpi na bébulo ala kalɔ bunu. Anwuɔsu adubo-ma likpidi keyi budie na bekyuli banu kalɛ na báƒiɔ.

⁵Ukyuli ɔni mɔɔví nwuna ɔkpana kalɔ kalɛ na ɔkɛ bɔdi ni, nwuna bebi anumi adubɔbwɛ.

⁶“Unwoti, awɔ geen ɔsu na línwini ukyuli ɔni na beedumi taama, na beetuo lisuo lɛnɔ teewi-mi.

⁷Mina kɔnyana buwulo bɔ́ya na anumi ábla-mi ƒluƒlu, na ami ukyuli umodi ɔmmɔ ƒui nkɛ aani kɔyu kɔyu.

⁸Nsu bekyuli bani nse siin bánu ɔmɛni na bana kayi kékpoku-ma, na bátatuna ku bani ɔbladu neeebo kɔsia kɔdi mɛni.

⁹Bekyuli bani nse siin beenye bana ala siin bɔbla lɛlɔ, na bana ɔyikun ɔɔkɔ́ katɔ teebu uwi biala.

¹⁰“Nsu mina bakpana, amii bilátina ka bina kasusu kese nwaa lɛni.

¹¹Mina ngba búudu kawɔlɔkɔ, na lɛ́yila lɛnunsia biala na kasusu kani na nda ku mina kayi lɛyɔla biala lɛlɔ.

¹²Na kayi kekpludi kani na bagyi ukyuli buse, na si bánu usien ni, banii kadi bugye bɔdi.

¹³Ami mina lɛnunsia ƒui ɔƒaani ni, ani ndi kekpine kesii kani na ndubusie ntátɛ kpoo na kasuudikɔ mmɔ.

¹⁴Ndubuti kaƒiɔtɔ linwini mina ɔti, na liti beklubi bammɔ linwini mina uni ku banwani belekubi.

¹⁵Wɛ na mina lɛnunsia lɛdi lɛsɔ lɛkya? Na ɔma mbo lɛnunsia lɛdi ute-mi na ɔmɛni kama?

¹⁶Na lɛnunsia lɛmmɔ lɛdubo-mi bɔsiaku na bɔdubusie butéduo kekpine kesii kani na lísela mmɔ?”