Read Lelemi Hiob 19 Bible Online

Hiob 19 - Lelemi bible

Hiob 19

¹Hiob údie kenye ɔnini,

²“Bi ɔsu na biikpóku-mi na bɛɛkya-mi ɔlɛ lɛlɔ ku bina atɛ lɛni?

³Leevudi mɛni ka binye bɛɛdú-mi kɔtɔ taasia kama, na biidumi-mi teewi-mi anumi kalɔ.

⁴Na si sɔsɔ na ɔdi ka ami náƒiɔ ni, mina litemi na lɛdi.

⁵Bitakali bɛnii amii bɛdia bitulo-mi bɛ́gya ɔsu na bɛɛnu bɛnii mina ekpidi ɔsu na muubó abi.

⁶Mɔɔyá na bɛti ka Katɔti mmomu náƒiɔ-mi na ɔɔní-mi kɔtu ɔnii lɛ́bla likpidi.

⁷“Ina ka muuwulo ni, ami na báƒiɔ. Na ka mɔɔkpali lɛnɔ ni, Katɔti úni, na ulátɛ mina litemi ulu lɛlɔ ulete-mi.

⁸Katɔti ɔ́bala-mi ulu na naaakɛ́ kasiakɔ. Na ɔ́ya na mina ulu ɔ́bla suu.

⁹Údie ɔbu biala na mina lɛlɔ, na úbimi-mi kagabwa lɛnɔ na mina lili.

¹⁰Úbo-mi kalɔ na ulu biala lɛlɔ na lɛ́yii udu. Na ɔ́gyu mina lɛnunsia biala údie aani kalɛ na baagyú kugyii na kuna kenyekɔ.

¹¹Úti kɔnyi ɔ́kya-mi kati kati, na ɔɔká-mi takya nwuna bekisine akɔ.

¹²Ɔ́ya na nwuna bekpone báta bebekpoku-mi. Na báka bámana mina kevo.

¹³“Katɔti ɔ́ya na mina lɛlɔ bekyuli ƒui béni-mi, na línwini ɔƒɔ líte mina bekyuli batidi lɛnɔ.

¹⁴Na banwa ku bakpana bammɔ ƒui báda-mi bése.

¹⁵Bekyuli bani na lɛ́ƒɔ na mina kaduli ku mina kaduli belekubi kabla bablane ƒui báyiƒala-mi, na baanu-mi aani ɔƒɔ.

¹⁶Na ɔmwi si lɛ́kpali mina kabla ɔblane iye lívele-nwu dɛ muedi ni, ulákpete-mi.

¹⁷Mina ɔƒɛƒɛɛ ɔni mɔɔlɛ́-mi kenye muedi uunwenyi mina uleku, na muusé mina banwani bananabi lɛlɔ.

¹⁸Na ku banamu wɛlɛwɛlɛ muedi baanu-mi taama, na beekeli-mi si bánu-mi.

¹⁹Mina bakpana geen ƒui muedi ku mina bayɔne béni-mi, na baláwia-mi balanu kunyɔ.

²⁰Ukyuli ekubi ekubi kani na ndi nkɛ, na ɔɔɔdi ngba na basɔ baalɔ ɔmɛni.

²¹“Bɛkɛ bɛnu-mi kɔnyana blii o-o, mina bakpana! Katɔti néti nwuna anumi ɔ́lɛ-mi na úbo-mi útáva lɛni.

²²Bi ɔsu na amii lɛnɔ bɛsiaku-mi biikpóku-mi aani Katɔti kalɛ? Bɛnyonu-mi!

²³“Si bunweni na badubunweni mina etemila bakya ɔku ɔdi kemmo bese ni, nka ɔdia!

²⁴Iye si lɛbuala lɛdi na badubuti na bebeyi-nya basia lɛtakpɛ lɛdi lɛlɔ na utaasia uwi ƒui ni, nka ɔdia.

²⁵Ngyi ka mina Udiene ɔkya ɔni na kawɔlɔkɔ ni, ɔdubo ubenye kalɔ kamɛni lɛlɔ.

²⁶Na ina dɛ na ɔlɛ ɔmɛni úsusu-mi ɔlɔna ɔku úbile ni, ɔlɔna ɔmɛni kemmo kani na ndubo Katɔti bɔnu anumi ku anumi.

²⁷Ami ɔmɛni ɔlati ndubo-nwu bɔnu ku mina anumi na ɔɔɔdi ukyuli bamba. Na nnye ngya uwi ɔmmɔ lɛnɔ.

²⁸“Ngyi ka binye bɛɛwia ulu ɔni lɛlɔ na bɛsia na bikpoku-mi, ɔsika bɛɛsu bɛnii ala amɛni ƒui kakwɛkɔ kási ami ɔlati.

²⁹Nsu ni, mɔɔsu-mii nnii ɔlɛka bɛyia kewii kani na Unwoti ɔdubuti ɔda uboku ubani bekyuli kɔtu. Na mmɔ na bɛdubɔti ka litemi bɔtɛ geen bɔkya.”