Read Lelemi Hiob 21 Bible Online

Hiob 21 - Lelemi bible

Hiob 21

¹Hiob ɔ́su Soƒar ɔnini,

²“Si kɔnu na anii aasia-mi bɔdi ni, amu se atu na enu lɛla lɛni na mɔɔsu-ɔ awɔlɔ.

³Na si lɛ́tɛmi lɛ́wɔlɔ ni, akana na asɔ ese ƒula edumi kalɔ ƒaa.

⁴“Katɔti na líti mina litemi muute, nsu naaakɛ kebunku kani mɔɔwia!

⁵Na mina bɔnukplu muedi ni, kaƒɔ kadubɔdu-ɔ na ebimi kenye ewi.

⁶Na si mɔɔbla kasusu taasiku lɛla lɛni nálɛku-mi mɛni lɛlɔ ni, na mɔɔyia na lɛlɔ ƒui lɛɛtɔ́-mi.

⁷Bi ɔsu na bekyuli bekpidi beelie teetu uwi na baakɛ́ ɔyikun lɛni?

⁸Bi ɔsu na beelie taanu bana bebi na babi lɛlɔ?

⁹Lɛla lɛdi lilekpoku-ma na bana kɔduli, na Katɔti ulani-ma kɔtu kɔdi.

¹⁰Bana ɔmantɛ bakɔ baawɔ bebi na beemomo na bana ɔdi ulékpi.

¹¹Lɛlɔ lɛɛyɔ́ bana bebi na ama lɛti baatɔ́ taavi ku ebiti.

¹²Baatɔ́ taasia lɛbentaa ku atoloyii ku akasaa kɔku lɛlɔ ku lɛlɔyɔ.

¹³Beelie taadi ngba ku ebiti kalɛ na baayɔ́ asa na bekpi besie kekpine ku keyi buɛɛ.

¹⁴Nsu baasu Katɔti banini, ‘Nyonu-bu! Buláwia ƒula lilu lɛdi bɔnii bɔɔnu bɔti.

¹⁵Ɔma ndi Ɔyikune Ƒui ɔmmɔ na butaabla-nwu kabla? Na bi na bɔdubo bɔkɛ na butaakya lili kalɔ taakpali-nwu?

¹⁶Ala ani ƒui na bubo ni, abu alati néti bula ɔyikun kemmo bɔ́kɛ-nya.’ Na bana ala bɔsu bɔmɛni ɔsu ni, lɛ́da lɛlɔ lɛ́mami ama ku bana kɔkwɛ kɔni na baakya lɛlɔ.

¹⁷“Áanu dii ka Katɔti ɔ́ni bekyuli bamɛni udu kɔtu? Na kɔlɛ na ɔɔyá na ɔgbankpi uubo-ma lɛlɔ na nwuna kɔnyi ɔsu? Kudii!

¹⁸Kɔlɛ na ɔɔní-ma kɔtu aani kalɛ na ɔƒɛƒɛɛ uuduo keti kemmo teebo-ka teegyingya?

¹⁹Na aasu-mi ɔƒɛni anini, ‘Katɔti ɔɔní alaekpidi bablane bammɔ bebi kɔtu na bana bawɔne kenye.’ Bɔsu na ami nda nnini, ‘Ɔlɛka ɔni alaekpidi bablane bammɔ kɔtu ama alati utédu kesii kani na wayu-ma ɔlɛ kaduɛ.’

²⁰Na Katɔti Ɔyikune Ƒui ɔmmɔ unye-ma lɛlɔ na bani ama alati ekpidi lɛbibo lɛtuni lɛni na ɔdubute-ma na nwuna kɔnyi kemmo aani kalɛ na baaní lɛla lɛdi teedie ɔɔƒɛɛ kemmo.

²¹Ɔsika si békpi ni, basɔ baaagyi lɛla lɛni mɔɔlɛ́ku bana bebi na bana kama.

²²“Ɔma ndubɔtina Katɔti lɛla lɛni na ɔlɛka ɔbla? Anwu mɔɔtɛku lɛlɔ badine bayikune ƒui litemi.

²³Bekyuli beelie ƒaa kalɛ na baayɔ́ asa na bekpi.

²⁴Na beelie lɛmwi ɔni na adubɔnu ati ka bádi lɛla lɛni na baayɔ́. Anwuɔsu bana lɛlɔ ekpo ku ekubi ƒui ása-ma, na bana ɔlɔna ɔɔdia bɔnu.

²⁵Na badi ama beekpi ku lɛbibo na kɔwaba kemmo.

²⁶Nsu bula ƒui kukpi kunwi kɔmmɔ kani na buukpi, na beklubi baatu taada-bu aani kɔdi na bébi-bu lɛlɔ.

²⁷“Ngyi lili likpidi lɛni udu na bɛɛsa na mina lɛlɔ na biti bibile-mi.

²⁸Anwuɔsu na biiye bɛnini, ‘Wɛ na ukyuli unengudi ɔni náƒɔ lɛnyi, nsu alaekpidi kani na úlie útaabla mmɔ kaduli kávi tɔ?’

²⁹Bítenu kudii ka bekyuli bani na ɔlɔgyu ku bani na bede ƒui baasu banii,

³⁰si ɔgbankpi ɔdi ɔ́lɛ ni, bekyuli bekpidi mmomu na lɛla lɛdi lilábla?

³¹Ukyuli biala ulátɛmi taasiku bana ekpidi lɛlɔ iye bani-ma kɔtu muedi.

³²Na bana kekwa mɔɔyu, na bekyuli beemwi-ma.

³³Bana kavakɔ na baaklibi kaduɛ na bekyuli lisu bonwu muutiku-ma taatáva.

³⁴“Nsu kenyekplu etemila ani neeebo kɔsia kɔdi mmomu na amii bɛda bɛɛsia-mi kɔnu.”