Read Lelemi Hiob 22 Bible Online

Hiob 22 - Lelemi bible

Hiob 22

¹Eliƒas ɔni nási Teman ɔmmɔ ɔ́kya Hiob kenye na úye-nwu ɔnini,

²“Bi kɔsia geen na abu bekyuli bubo bute Katɔti ku abu bani ƒui mɔɔnu lɛlɔ banundane?

³Na ina likpidi lɛdi lɛɛɛma-a lɛlɔ munu munu muedi ni, bi na aabu anii ɔmmɔ ɔdubɔbla Katɔti?

⁴“Aabu anii ƒula bɔdia bɔvili ɔsu na Katɔti ɔɔní-ɔ kɔtu na lɛbibo lɛmɛni udu lɛɛsiáku-ɔ?

⁵Oowo! Mmomu ƒula likyulikpi ku ekpidi lidu lɛni na enye aabla ɔsu na úbo úte lɛni.

⁶Áƒɔ bekyuli bamba ku bawabane ala ése ɔkpa na kayu kani na bada-a kenye na éƒie-ma adala áƒɔ na bakɛ kasɔngya.

⁷Na bani na kɔka ku utukwɛ ɔɔda ni, éni-ma adila ku ntu bute,

⁸ina ka ɔyikune na adi na ebo ala pii, na bekyuli lɛnɔ baabu-ɔ.

⁹Na ɔɔɔdi buni kani na éni bekpinele bubunku, mmomu ábla bekpinebi lɛnɔ ulikplu na éƒie-ma ala áƒɔ.

¹⁰Anwuɔsu na aanu ka liƒu ala sɔɔn náka ámana-a na ƒula ngba bɔni na eli ɔƒɛni kemmo.

¹¹Na akya lɛdisa kemmo na use aani kalɛ na ketu keeti ukyuli.

¹²“Katɔ ƒui na Katɔti uli na úbo ɔ́vi ayabi ƒui, na ɔɔnu lɛla biala taasiku mmɔ.

¹³Nsu aatina anini, ‘Bi na Katɔti ɔdubo bɔnu bɔti bɔsiku liƒlukutu bonwu lɛni nábala anwu ku bekyuli ntɛ mmɔ kemmo? Na ɔkana-bu litemi bɔtɛku?

¹⁴Liƒlukutu bonwu lɛmmɔ lítile Katɔti anumi uwi ɔni na ɔkɛ kayaa ɔɔví na kalɔ kammɔ katɔ.’

¹⁵Da kasusu kani nákya bati kukuuku alaekpidi bablane taƒɔ tadi mmɔ die ƒula ngba kemmo.

¹⁶Báyii udu aani kalɛ na ntu buuti lɛla lɛdi kɔnakunwi taatɔlɔku, na baaagyi beeese ɔni na nka bana uwi útedu tɔ.

¹⁷Bekyuli bammɔ néni Katɔti Ɔyikune Ƒui na bákali banii uuubo ɔyikun ɔdi bana lɛlɔ.

¹⁸Nsu ina amu ni, Katɔti ɔmmɔ náya na bákɛ akɛla pii. Na bana kasusu kekpidi kamɛni ɔsu na lɛ́mami-ma lɛlɔ na ami ku-ma bulábla kasusu taasala.

¹⁹“Bekyuli bani nse siin bánu bana kawɔlɔkɔ, na lɛlɔ lɛ́yɔ-ma na báma-ma básu banini,

²⁰‘Bula bekisine báyii udu, na ogya ɔ́kyula bana ala ani na bebo ƒui.’

²¹“Hiob, boku lɛlɔ kalɔ te Katɔti Ɔyikune Ƒui na awɔ ku-nwu biwi kenye ntu na akɛ keyi buɛɛ. Ɔsika lɛni na adubɔbla asa na ala adianku-ɔ.

²²Nu-nwu ala bɔtina na eti-nya akya kayi.

²³Geen ni, sɔku lɛlɔ te Katɔti ku lɛlɔ kalɔ buboku na ƒula keyi kayɔ na ala adianku-ɔ. Die ƒula lɛlɔ ƒui atu.

²⁴Na sika ugyiedi ɔni náƒɔ-ɔ kuye utulo ƒui mmɔ ni, die-nwu atu aani kalɛ na beebó ala teewiakun ɔtumu ɔkɔ na utukwalɛ.

²⁵Na aya na Katɔti Ɔyikune Ƒui unwini ƒula sika ugyiedi ku ɔƒualadi ɔni náƒɔ kuye geen ute-ɔ.

²⁶Na ebiti ku lɛlɔyɔ lɛdubɔƒɔ-ɔ lɛlɔ kemmo ƒui ka aabla-nwu kabla ɔsu, na eti ƒula anu ƒui asia-nwu lɛlɔ.

²⁷Na si ákpali-nwu ni, ɔdubunu ute-ɔ na ɔbla ƒula lɛyɔla. Na kenye kani na ése-nwu lɛnɔ ni, adubɔdi-ka lɛlɔ.

²⁸Adubɔnu ulu nwaa asia na ƒula ngba kemmo. Na lɛla biala na ásu-nwu anii ɔbla ni, Katɔti ɔdubɔbla-ni lɛni kani.

²⁹Lɛlɔ katɔ bɔkɔliku ɔsu na Katɔti uuboku ukyuli kalɔ. Na anwu Katɔti ɔmmɔ kani mɔɔkɔliku ukyuli katɔ si úboku lɛlɔ kalɔ na ɔ́kpali-nwu.

³⁰Katɔti uudie alaekpidi bablane na bakɛ bɔƒɔ si ɔ́nu ka báda ekpidi ammɔ bɔbla báya na baabla ala siin.”