Read Lelemi Hiob 24 Bible Online

Hiob 24 - Lelemi bible

Hiob 24

¹“Bi ɔsu na Katɔti ulese litemi bɔtɛ limeyi ulete bekyuli? Na bi ɔsu na ɔ́ya na nwuna bekyuli benye baanu-nwu anumi taanɔ ka ubatɛ bana litemi ute-ma?

²Alaekpidi bablane benye baavumana lɛmingyii, na béyu bekyuli baƒonu bada baanyuɛ.

³Na béƒie bekpinebi ku bekpinele bebuo ala betine ku ɔmantɛ bakɔ bagyani báƒɔ na kayu kenye.

⁴Na baanya bawabane taakya, na baabɔku-ma taalɛku bana kɔlɔ kemmo.

⁵Na bawabane bamɛni baakɛ taavi kalɔ kakwiidi kammɔ kemmo taawia ama ku bana bebi lɛdila aani bebuo ala betine bani mɔɔkɛ taavi kalɛ kalɛ.

⁶Na si uwi ɔni na útulo-ma ni, belikplune bamɛni mmo na beesié taatála amukɔ ku egyiibi asa na bakɛ lɛla lɛni na badi.

⁷Kɔyɔ lɛlɔ na baatɛ, ɔsika beeebo adala ani na bebi lɛlɔ.

⁸Na si ɔƒɛƒɛɛ kpakplaa ku ɔnantu ɔɔna ni, atakpɛ abi kaƒɔna ku libu kemmo na beesié taatábɛ.

⁹Bebi bani na bana bati békpi ni, beeyé-ma taasiku bana beni kudɔ na bana bati kayu kenye.

¹⁰Ina kɔka kɔɔda-ma ni, beenye-ma lɛlɔ ka batuma. Na bakɛ kasɔngya ɔsika beeebo adala.

¹¹Ama mɔɔmana egyiibi teedie-nya ntu teete bana benwoti. Nsu bakɛ ku utukwɛ.

¹²Na ɔma unengudi ɔmmɔ kesii biala ni, adubɔnu bekyuli bani na ala étulo na baayɔ́ bekpi mɛni ka batɛ beedumo. Na beevele ka ɔdi ubebunku-ma, nsu Katɔti ulákpete na ɔbla lɛla lɛdi.

¹³“Bekyuli badi bakya bani náta bénye Katɔti ulu lɛlɔ, ɔsika ɔdi lɛla lɛni na bekisi. Anwuɔsu na balábla bana ala na bukeye kemmo.

¹⁴Ɔƒɛ bɔnu kani na benye bagya, na badu bawabane ku bani ƒui mɔɔyaki ala. Na usien ɔmmɔ kani na beeyú ala lɛnɔ.

¹⁵Na basɔnɔdine lɛnɔ benye bagya usien, kalɛ na besie ukyuli bamba uleku iye ɔgya kudɔ na batátɛ, na baakali ka ukyuli ɔdi ulanu-ma.

¹⁶Alánu beyune kadi nwaa, nsu ya na ɔƒɛ ɔsa, badubɔbwɛ beduo bekyuli lɛtɔ na beyu ala, ɔsika balayɔ bukeye.

¹⁷Baayɔ́ usien teetulo ɔƒiiwi kadi nwaa. Ɔsika likyulikpi ku liƒu ala bɔbla ndi bana bakpana.

¹⁸“Bese aani ntu avlɔvɔ ani muusé lɛlɔ na asia ntu anumi. Na bana ablala ɔsu Katɔti úwida bana mmo ku kɔlɔ, na kɔsɔ kuládia edula adi.

¹⁹Na kalɛ na kaƒɛndi etubankɛ aayii taakya na liwulu ɔsu ni, lɛni kani na kalɔ keebweli bekyuli bekpidi bamɛni udu.

²⁰Si bana ɔyikun ɔ́sa na kalɔ kamɛni lɛlɔ na bekyuli báyiƒala-ma ni, beklubi baakɛ́ adila ani na ebo-ma emini na kalɔ kemmo.

²¹Alaekpidi bablane baakɛ́ kɔsia na bekpinele ku bedinkɔ bani neeebo kablakɔ kadi lɛlɔ.

²²Si ina bekyuli bekpidi bamɛni belie ngba na uwi uutu na ala aatɛ-ma muedi ni, Katɔti ɔɔda-ma teedie na baayii udu ɔkɛnku nwuna ɔyikun lɛlɔ.

²³Katɔti ɔkana na unye ɔnu-ma, na ɔbla-ma aani lɛla biala lɛ́ɛtɛ lɛ́wɔlɔ, nsu ɔɔɔdi ɔni na basu banii ulánu-ma ɔsu.

²⁴Beelie taaƒɔ lɛnyi uwi klukwii ɔdi kemmo, na si békpi ni, ɔ́sa ƒui kede kede! Use aani kalɛ na baamɛnɛ livo teewi kalɔ na lɛyɛyɛ likpi lɛyii udu.

²⁵“Na si mɔɔnyi ɔkɔ na lɛla lɛni na lɛ́su mɛni kemmo ni, na edie-mi bɔƒiɔ.”