Read Lelemi Hiob 27 Bible Online

Hiob 27 - Lelemi bible

Hiob 27

¹Hiob úsie anumi na ɔ́su ɔnini,

²“Ndubunye Katɔti ɔni nli uwi ƒui anumi na lɛtɛmi lɛlɛku. Ɔyikune Ƒui ɔni néni ɔnii ulábla lɛla lɛni ndi ulu ulete-mi, na ɔ́ya na nnye muubó abi ku ɔdu.

³Na uwi ɔni na útaƒɔ tɔ mina ngba, na nwuna kɔyu kɔkya-mi lɛlɔ kemmo ni,

⁴ndubo mina kenye bubimi bɔsu litemi geen lɛni na lɛ́nu, na lɛɛɛdubo ɔkɔ ɔdi bɔnyi.

⁵Lɛɛɛdubo bɔtuna kudi kudii nnii lɛla lɛni na ábla lɛdia wetédu mina kukpi limeyi. Na lɛɛɛdubo mina litemi geen lɛni na mɔɔsu mɛni lɛnɔ bɔda bɔsu bɔya.

⁶Ndubunye mina ala bɔbla ulu siin lɛlɔ uwi biala, na lɛɛɛdubo kama bunwini bɔkya-mu. Na mina kayi lɛnɔ kaládu-mi kɔtɔ na mina ngba bulie kemmo.

⁷“Muuvele nnii bekyuli bani ƒui mɔɔta teenye-mi lɛlɔ na beekpóku-mi ni, Katɔti ɔni-ma kɔtu aani bekyuli bekpidi bamba kalɛ.

⁸Ɔsika bekyuli bammɔ beeebo kɔsia kɔdi. Anwuɔsu na Katɔti ɔdubo-ma bɔda budie ngba bɔmmɔ kemmo, na bana ngba bɔda liku.

⁹Na ɔɔɔdubo-ma bɔkpete ina beekpi-nwu kɔtɔ banii ɔnu-ma kɔnyana.

¹⁰Na lɛni geen na ɔlɛka Katɔti ɔbla, ɔsika bekyuli bammɔ balayɔ-nwu na bátakpali-nwu bétevele lɛla lɛdi kudii.

¹¹“Ɔƒaani ni, ndubo kalɔ budie búte-mii nwaa lɛla lɛni na Katɔti Ɔyikune Ƒui ɔɔbla, ku kalɛ na nwuna ɔyikun úbomo.

¹²Na bina ƒui bɛ́ɛnu ala amɛni bɛ́ti, anwuɔsu biiibo kenye kadi na biidie.

¹³“Binu kalɛ na Katɔti Ɔyikune Ƒui ɔɔbla belikplune ku balalane.

¹⁴Badubɔkana na bawɔ bebi pii, nsu kɔka sɔɔn ndubo-ma butaada. Na ogya ogya kukpi ndubo bana pii bɔdu.

¹⁵Na ɔlɛ na badi lɛnɔ badubo buƒi bukpi, na bana bekpinele muedi belewulo-ma.

¹⁶Ina bi akɛla na bákɛ na bátɛ sika ɔƒualadi ku adala pii bése béte lɛlɔ aani kalɛ na beekú lɛti taalɛ lisu ni,

¹⁷bekyuli bani nse siin na bátabla likpidi lɛdi ndubo-ma ala ammɔ bule bɔdi.

¹⁸Na kɔduli kɔni na békulo ƒui kuuubo udu bɔyii aani anasi ɔkpaala, iye nvo bɔni na bagyumane bálɛ na bábɛ-nwu kalɔ.

¹⁹Balalane bamɛni badubɔnu ala ani nse-ma aani balakɛne asa na bayu batɛ. Nsu badubɔta na banu ka ala ammɔ ƒui áyii-ma anumi kɔnakunwi, na benwini bawabane.

²⁰Ɔgbankpi ɔdubɔsiaku-ma aani kalɛ na ketu keeƒie ukyuli, iye ɔƒɛƒɛɛ kpakplaa uukpó teeti ala taatɔlɔku usien.

²¹Ɔƒɛƒɛɛ ɔdubɔsi ɔƒɛ katukɔ na ubékpo na ɔkpala-ma udie bana kɔkyakɔ ƒui ɔtɔlɔku, na bana ɔdi ɔsa.

²²Na ɔɔɔdubo-ma buse buɛɛ, ina dɛ na bákali banii beekeli ɔƒɛƒɛɛ ɔmmɔ kenye, ɔsika ɔdubuti-ma ku ɔƒɛɛlɛ ɔtɔlɔku.

²³Na ɔƒɛƒɛɛ ɔmmɔ kudu ku kɔku kɔdubɔtina kalɛ na ɔ́gya enukpɛ ɔ́bɔku-ma.”