Read Lelemi Hiob 29 Bible Online

Hiob 29 - Lelemi bible

Hiob 29

¹Hiob ɔ́mu ɔdaku nwuna kɔtɛ ɔnini,

²“Muunyimo uwi ɔni na Katɔti ɔ́da-mi kaduɛ mmɔ, na mɔɔwia ka nka emeyi ammɔ asɔ enwini ebo-mi.

³Uwi ɔmmɔ ni, nwuna bukeye búteewi-mi na mɔɔnu taavi kesii kani na kese suu!

⁴Uwi ɔmmɔ na ala ádianku-mi na ami ku Katɔti keliela kése kaduɛ, na útaagyumana-mi ku mina kaduli bekyuli ƒui geen.

⁵Uwi ɔmmɔ na Katɔti ɔmu úlieku-mi, na mina bebi ƒui báka bámana-mi.

⁶Uwi ɔmmɔ na mbo ala geen, na bebuo bákya-mi kaduɛ. Na mbo nnɔ ntulo kalɛ na mɔɔwia muedi.

⁷“Na uwi ɔmmɔ ni, ńtalɛ teetélie ɔma ɔban kenye na ɔma kasakɔ.

⁸Na si lísie kasakɔ mmɔ ni, na bakloƒu besie kama na benengu bamba bata benye asa lílie kalɔ na ɔbu kenye.

⁹Si ina bi unengu na adi na ńtéduo mmɔ ni, ɔlɛka ada ɔtɛmi aya na ebile kenye kpoo.

¹⁰Si lɛ́tɛmi na uwi ɔmmɔ ni, na ukyuli biala ku benengu bammɔ ƒui unyemi ubo-ma likpo na ɔdi ɔsɔ ulasu lɛla bamba lɛdi.

¹¹Si énu-mi butemi na uwi ɔmmɔ ni, adubɔti ka ukyuli mɔɔtɛmi. Na si ánu-mi lɛnɔ ni, adubɔti ka ásiaku ukyuli ɔdi, na mina litemi kani na bekyuli beeti.

¹²Na baabla ɔmɛni ɔsika muudie bawabane ku bekpinebi bani muuwulo kɔnyana ka baawia kebunku na beeebo katamikukɔ kadi ɔsu.

¹³Na bekyuli bani na ala étulo na nka bukpi na bada muedi ni, lídie-ma na beete-mi kusɛ kusɛ. Na bekpinele kayi káyɔ-ma ƒaa na bédie lɛlɔyɔ lɛnu.

¹⁴“Kɔnyana bɔnu ku ala bɔbla ulu lɛlɔ siin teete bekyuli ndi mina ngba bɔni na lílie.

¹⁵Na utulo ka mina anumi na banumbwɛne bada baanu teesie. Na mina lɛgba na bani na báƒɛ bewi kalɔ bada beesié.

¹⁶Na línwini ɔti líte bani ƒui mɔɔyaki ala. Na baƒɔ muedi mɔɔƒɔ́-ma etemila taasia lɛlɔ na litemi katɛkɔ si lɛla lɛdi líbo-ma lɛlɔ.

¹⁷Lɛ́ƒɛ balalane avwi, na líƒie bekyuli bani na baayɔ́ ka nka babla kalala lɛ́ƒɔ-ma enu kemmo na bákɛ bɔnwuna.

¹⁸“Na nka lɛ́sia anu ka ndubulie ngba gyɔlɔɔ na baláti-mi emeyi muedi baláka, asa na likpi buɛɛ na mina kaduli.

¹⁹Uwi ɔmmɔ ni, na nka línye kpakplaa aani kugyii kɔni mɔɔkɛ́ ntu uwi biala, na amii muedi alákwii kuna evete lɛlɔ usien umodi ƒui.

²⁰Líkeye na bekyuli anumi ku ɔyikun ɔni naaayii udu, na línye kagyumana uwi biala kemmo.

²¹“Bekyuli bése atu bénu-mi butemi uwi biala, na báwia ka benu mina bɔlɛ lɛnɔ.

²²Na sɔsɔ si lɛ́su-ma lɛla lɛdi ni, basɔ balákya unyeƒi ɔdi, mmomu baaƒɔ́-ni kpoo.

²³Bátaaƒɔ-mi etemila aani kalɛ na baawia ketudi ɔnantu.

²⁴Na si bánu-mi ka mɔɔmɔsi ni, lɛlɔyɔ sɔɔn mɔɔƒɔ́-ma lɛlɔ kemmo, na beesé kayi ku lɛnunsia.

²⁵Líti lɛ́sia lɛlɔ aani bana ɔtɔnkune kalɛ na ńtaatina-ma kasiakɔ kabuni aani kalɛ na bekpone unengu ɔɔtɔnku nwuna bekpone. Na mɔɔyala-ma kɔƒɔ na mɔɔkya-ma ogya si enu áƒɛ-ma.”