Read Lelemi Hiob 30 Bible Online

Hiob 30 - Lelemi bible

Hiob 30

¹“Ɔmwi ni, bakloƒu bákɛ-mi benye beedumi ɔni na nka bana bati muedi ni, bátamanku mina bakpewe bani mɔɔnu-mi baƒonu lɛlɔ na babla kabla basala.

²Na bekyuli bani muudumi-mi mmɔ alati beeebo kablakɔ kadi.

³Kɔka geen mɔɔda-ma lɛla lɛdi tadi tadi, na si uwi ɔni na útulo-ma lɛni ni, na bakɛ usien umodi baakun egyii ligyiitu lɛni na beegyeli teedie na kalɔ kakwiidi kammɔ kemmo.

⁴Alakpi ani na ukyuli ulati-nya emini na beekpeli taakun na ana ligyiitu na baasala ogya taakɛ liwulu na kɔyɔ uwi.

⁵Na baabɔku-ma taalɛku lɛma kemmo aani beyune ku ayoli.

⁶Awɛ ku lɛbonka kemmo na bábla bana kuliekɔ na atakpɛ akɔ.

⁷Na baabla kudu mmɔ aani bebuo ala betine nánu livo lɛni baakun.

⁸Na si bátásala lisu ni, baabɔku-ma taatɔlɔku mmɔ aani bebuo ala betine bani neeebo kasusu.

⁹“Nsu ɔmwi ni, ami mmomu nénwini ɔkungyii líte bekyuli bamɛni udu, na bada-mi lɛnyi baatu ɔnu taavinku kesi kesii.

¹⁰Muusé-ma lɛlɔ, na beenye taabwɛ lisuo muedi teewi-mi

¹¹Na ka Katɔti ɔ́yila-mi udu na nsɔ liiibo kablakɔ kadi ɔsu ni, baakana na babla lɛla lɛni na baayɔ́ ƒaa na ɔɔɔkɛ-ma.

¹²Nse aani ukyuli ɔni na bébo lɛkpu na ulakana bukeli muedi. Bekyuli bekpidi bani néti kɔnyi bákya-mi kati kati mɛni baláda-mi bukpoku baláya, na liiibo ukyuli ɔni naƒɔ-mi.

¹³Báda-mi ulu na báka-mi bákya lɛƒɛnyi ƒui lɛlɔ kalɛ na bayila-mi udu, na ukyuli ɔdi uuubo na ɔbala-ma.

¹⁴Kesi kesii kani na nka lɛsia lɛlɛ ni, mmɔ na bakɛ badubo bebéwi-mi lɛlɔ na besusu-mi kpɛtɛ kpɛtɛ.

¹⁵Liƒu sɔɔn náka lɛ́mana-mi ɔƒɛni amu. Na mina lɛkɛ o-o, mina lɛnyi lɛni na lɛ́ƒɔ o-o, ana ƒui áyii ákya-mi, aani kalɛ na liƒlukutu lɛɛyii taakya kayaa.

¹⁶“Na bɔsa kani na mina ngba bɔ́sa búsela, ɔsika mina lɛbibo liiibo kawɔkɔ kadi.

¹⁷Usien ni, ekubi aadu-mi. Na kalɛ na muunú ɔlɛ ni, uláƒana uwi ɔdi na ɔbla ka lɛ́kɛ bɔnwuna blii.

¹⁸Katɔti úsusu-mi ɔlɔna aani kalɛ na baaƒɛ kɔdi. Únyimi-mi limɔ na mɔɔyɔ́ likpi muedi.

¹⁹Na úbo-mi útákya aba kemmo ɔni na ami ɔlati ɔmmɔ utulo ka aba ammɔ na línwini.

²⁰“O Unwoti, lɛ́kpali-ɔ, nsu éni na átakpete-mi. Na lɛ́ta línye, nsu ébulo na bunye kani na enye aanu-mi ɔnusɛ.

²¹Ɔƒaani ulikplu ala geen na enye aabla-mi.

²²Na édie ɔƒɛƒɛɛ kpakplaa ákya-mi na uubó-mi taavinku.

²³Ngyi nwaa ka kekpine kammɔ na éti-mi éselaku, ɔsika kesiekɔ na kadi kete ukyuli ɔyawine biala.

²⁴“Nsu ni, nka ukyuli ɔni na ala étulo na uuvele kebunku ni, basɔ belekpoku-nwu.

²⁵Buwulo na ami ɔlati ɔmɛni ńtewulo ńtete bawabane ku bekyuli bani ƒui na ala eekpóku? Munuu bunu na ńtenu ɔlɛ pii na mina kɔyu kemmo na ama ɔsu?

²⁶Nsu ka ami muuvele kebunku na lɛkɛ bɔnwuna ni, ɔgbankpi kani na lɛ́siaku na ɔƒɛ ɔ́sa ɔ́kya-mi na mina ulu lɛlɔ.

²⁷Lɛƒɛda lɛ́ƒɔ-mi lɛlɔ kemmo ƒui na nnye muususu lɛlɔ uwi ndi uwi. Na lɛbibo kani náƒɔ-mi ngba emeyi ƒui kemmo.

²⁸Lɛbibo línwini aani ɔƒɛ na ɔ́kyula-mi ɔlɔna ɔ́bla tonwu tonwu. Na bekyuli kasakɔ na muunye taakpali-ɔ teevele nnii bo bebunku-mi.

²⁹Na muuwulo kɔnyana keku aani beƒukutu iye bekuku.

³⁰Mina ɔlɔna ɔ́kywi ɔ́bla tonwu na ɔɔvumi. Na lɛlɔ kemmo kaadu-mi teetéduoku-mi ekubi kemmo kemmo.

³¹Na lɛbentaa ku atoloyii ani lɛnu mini mini na ńteenu ni, ɔƒɛni amu línwini kɔnyana ku keku buwulo sɔɔn.