Read Lelemi Hiob 32 Bible Online

Hiob 32 - Lelemi bible

Hiob 32

¹Na ala amɛni ƒui kawɔlɔkɔ ni, Hiob bakpana ɛtɛ bammɔ báda unyeƒi bɔkya ku Hiob báya, ɔsika úni ɔnii ulenu kalɔ ɔnii anwu nábla lɛla likpidi lɛdi.

²Nsu Barakel ubidi Elihu ɔni ndi Busini na ɔ́si Ram ɔtɔ kemmo mɛni úti kɔnyi ɔ́kya Hiob geen na ɔni na uni ɔnii ulaƒɔ enu ka ɔ́ƒiɔ, na Katɔti mmomu na ɔɔdú kɔtɔ ɔsu.

³Na ɔ́kɛku nwuna bakpana bakladi lɛnɔ kɔnyi ka bátakana na bati lɛla lɛdi basu Hiob na ɔnu ɔti ka ɔ́ƒiɔ. Nsu kɔtɔ kani na benye baadú-nwu banii útati bɔbla.

⁴Elihu ndi Hiob bakpana bammɔ akɔ ɔnamudi ƒui, anwuɔsu úte kuƒi na nwuna batɔnkune báka bɔtɛmi.

⁵Nsu uwi ɔni na ɔ́nu ka nwuna batɔnkune bátakana na bedie batina Hiob ka anwu náƒiɔ Katɔti ni, ɔ́kɛku-ma kɔnyi.

⁶Anwuɔsu Barakel ubidi Elihu ɔni na ɔdi Busini mɛni údie kenye na ɔ́su ɔnini, “Ami ndi bina ƒui ɔnamu. Na ka ngyi ka bɛtɔ-mi ɔsu ni, líbile kenye kpoo nli mɔɔnu-mii, na ńtayɔ ka lɛtina-mii ka ami lɛnɔ ngyi lɛla lɛdi.

⁷Na lɛ́su mina lɛlɔ nnii muute-mii kuƒi na amii bani ndi mina batɔnkune bɛtɛmi bina lɛnunda kɔtɛ.

⁸Nsu ɔƒaani ni, lɛ́nu lɛ́ti ka lɛnunda ni, Katɔti muuti-ni teete ukyuli.

⁹Na ɔɔɔdi benengu bani nábi lɛlɔ kani mɔɔdá anu kalɛ na benu ala kalɔ na banu lɛla lɛbuni bati.

¹⁰“Ɔmmɔ ɔsu na mɔɔsu-mii nnii bise atu na ami lɛnɔ lɛsu-mii lɛla lɛni na ngyi.

¹¹Líse atu na línu ala ani ƒui na binye bɛɛsu. Na lɛ́kɛku-mii kayi uwi ɔni na binye bɛɛwia lɛla lɛni na bɛsu.

¹²Na ɔni na lɛ́nu ala ani na bɛ́su mmɔ kemmo ƒui ni, bina ɔdi útakana na udie Hiob bɔƒiɔ ɔtina-nwu nwaa na unyeƒi ɔni na bɛɛkya kemmo.

¹³Útalɛka bɛsu-nwu bɛnii amii bɛgyi lɛla lɛni ndia. Mmomu ɔlɛka bɛya na Katɔti ɔlati udie Hiob lɛla lɛni na ɔ́su kenye. Mmɔ na mɔɔnu ka bɛ́bla, na ɔɔɔdia.

¹⁴“Hiob útasu lɛla lɛdi na ɔta unye-mi lɛlɔ iye ɔtu-mi kenye kadi. Na lɛnɔ ni, lɛɛɛdubo bina unyeƒi ɔni na bɛɛkya mmɔ etemila buti budie-nwu lɛla lɛdi kenye.

¹⁵“Hiob, bana kenye kékpi na basɔ baaagyi lɛla lɛni na basu-ɔ, ɔsika etemila ása-ma kenye.

¹⁶Na bunye na ami lɛnɔ mɔsɔ linye ntaanu na naaasu lɛla lɛdi, ka bana etemila ása-ma kenye na basɔ balati lɛla lɛni na basu-ɔ ɔsu?

¹⁷Oowo! Ami lɛnɔ ndubudie lɛla lɛni na ásu mmɔ kenye kalɛ na mina kasusu kátina-mi.

¹⁸Etemila emomo-mi kenye na lɛsu, na Katɔti Kɔyu néti ala amɛni ɔ́kya-mi kenye. Na unye-mi lɛlɔ uudí-mi ka lɛsu-nya lɛlɛku.

¹⁹Aanu, ami ukyuli umodi ɔmmɔ nse aani ntɛ ku ɔsii ɔni na bétile-nwu kenye na úƒu na ɔɔyɔ́ utulo ɔbwɛ.

²⁰Na ɔlɛka lɛtɛmi lɛlɛku na lidie lɛla lɛmɛni kenye na lɛkɛ bɔnwuna.

²¹Na lɛɛɛdubo ɔdi anumi bɔnu bɔnyi ɔkɔ bɔtɔlɔ-mii.

²²Ɔsika lɛɛɛdi ɔkɔ ɔnyine na lɛɛɛgyi kalɛ na baatɔ́lɔ ukyuli lɛnɔ. Si lɛni na nse ni, nka Katɔti ɔ́ɔni-mi kɔtu kukuuku.”